Sakaria
3 I mbus, a unda me prisi keñi le Yôsua,+ i i bé i téé i bisu bi añgel i Yéhôva, ndi Satan+ a bé a téé i pes yé walôm inyu kolba nye. 2 Ha nyen añgel i Yéhôva i bi kal Satan le: “A Satan,+ Yéhôva a kogse we! Ñ, Yéhôva nu a mal pohol Yérusalem,+ a kogse we! Baa i Yôsua nunu a ta bé kidik hié i i nloñ, i ba nhéya i juu?”
3 Ndi Yôsua a bé a hééba mambot ma ma bé mahindi ngandak. A bé a téé i bisu bi añgel. 4 Añgel i kal i bôt ba bé ba téé nye i bisu le: “Ni héya nye mambot mé ma mahindi.” I mbus, añgel i kal nye le: “Nun-ki! Me mal sas hihôha* hioñ, u ga haba ki mambot malam.”*+
5 Jon me bi kal le: “Ba ha nye yañsi i mpôp i ngii ño.” Ha+ nyen ba bi ha nye yañsi i mpôp i ngii ño, ba ha ki nye mambot; yak Añgel i Yéhôva i bé i téé nye ipañ. 6 I mbus, añgel i Yéhôva i kal Yôsua le: 7 “Lana nyen Yéhôva nu mintôñ mi gwét a nkal: ‘Ibale u mboñ i mam me nkal we,* u tibil ki gwel minson me nti we, ha nyen u ga kéés litén jem,*+ u tééda* yak bikotoo gwem. M’a ti ki we kunde i lo i bisu gwem, nlélém kiki bana bape ba téé hana.’
8 “‘A we prisi keñi le Yôsua, yak bé biprisi* ba ni yii i bisu gwé, soho emblana, inyule ni ga ba yimbne i mam ma ga yik lo; nuna-ki! Me yé i unda bé ngwélél wem+ nu ba nsébél le Pom!+ 9 Ni béñge ngok me mbii i bisu bi Yôsua! I ngok ini i gwé mis masaambok; m’a kédél ki matila mu ngii, m’a yoñ ndik kel yada inyu sas béba i loñ ini,’+ hala nyen Yéhôva nu mintôñ mi gwét a mpot.
10 “‘I kel i, hiki wada nan a ga naña mut wé libôk isi nkôô wé wai ni isi e yé faigé,’+ hala nyen Yéhôva nu mintôñ mi gwét a mpot.”