Minson mi baôma

4 I ngéda bo iba ba bé pôdôs litén, biprisi ni ñane batat témpel lôñni Sadukai+ ba lo i boma bo. 2 Hala a bé tééñga bo le baôma ba bé niiga litén, ba añlak ki i mbamba le Yésu a ntuge ikété bawoga.+ 3 Jon ba bi gwel bo,* ba ha bo i mok+ letee ni i kel i bé noñ ha, inyule kôkôa i bé i ma kwo. 4 Ndi ngandak ikété ba ba bi emble nkwel wap i bi hémle; yak nsoñgi u bôlôm u pam jam kiki bo 5 000.+

5 I kel i bé noñ ha, baéga ba litén ni mimañ mi litén yak ni bayimbén ba kodba i Yérusalem, 6 lôñni ñéga biprisi le Ana,+ ni Kaifa,+ ni Yôhanes, ni Aléksandrô lôñni bôt ba lihaa bobasôna ba ñéga biprisi. 7 Ba téé Pétrô ni Yôhanes i ñemkété wap, ba bôdôl bat bo le: “Ni imbe ngui tole i jôl li njee ni bi bôñôl i jam lini?” 8 Nyonok ni mbuu mpubi,+ Pétrô a kal bo le:

“A bé baéga ba litén ni mimañ mi litén, 9 ibale ba yé i kéés bés i len ini inyu jam lilam di mbôñôl bôk mut,+ ni yéñék ki yi njee a mboñ le i mut nu a mbôôp, 10 bébobasôna ni litén li Israel jolisôna, yina le i jôl li Yésu Kristô mut Nasaret,+ nu ni bi nol i kék,+ ndi Nyambe a ntugul nye ikété bawoga,+ ni njel yé nyen i mut nunu a téé hana i bisu binan, a bak mbôô. 11 I Yésu nu nyen a yé ‘ngok i bé baoñ ni bi tehe kiki yañga jam, yon i bi yila ngok likas i bisu.’*+ 12 Jam lipe ki, tohi y’a lo bé ni njel mut numpe, inyule jôl lipe li ta bé+ hana ’isi le Nyambe a bi pohol ipôla bôt ba binam inyu tohol bés.”+

13 I ngéda ba bi tehe lelaa Pétrô ni Yôhanes ba mpot ni makénd,* ba yi ki le ba yé bôt ba bi ke bé i bisuklu,* ba bak ki gwañga bi bôt,+ ba hel. Ha nyen ba sôk nok le bon ba bé lôñni Yésu.+ 14 Kiki ba bé béñge i mut a bi mbôôp a téé ha lôñni banigil bo iba,+ ba la bé timbhe bo to buk.+ 15 Ha nyen ba bi ti bo oda le ba nyodi ndugi i ndap bikééhene,* ba pam i mbégdé, ndi bomede ba bôdôl hek pék ipôla yap, 16 ba kalak le: “Kii di nlama boñ lôñni i bôt bana?+ Inyule ibabé pééna, ba mboñ hélha jam ikeñi, i nene ki i mis ma bôt ba Yérusalem bobasôna,+ di nla bé to tañ i jam li. 17 Ndi inyu boñ le hala a kônde bañ tjama ikété litén, di nyéyéi bo, di kal bo le ba pôdôs ha bañ mut nye ki nye i jôl li.”+

18 Ha nyen ba bi sébél bo, ba ti bo oda le ba pot ha bañ jam jo ki jo, to niiga i jôl li Yésu. 19 Ndi Pétrô bo Yôhanes ba timbhe bo le: “Ibale hala a yé loñge i mis ma Nyambe i nôgôl bé iloo Nyambe, bébomede kééhana i jam li. 20 Ndi inyu yés, di nla bé waa pot i mam di bi tehe, di nok ki.”+ 21 Kiki ba nkônde nyéyéi bo, ba nwas bo, inyule ba bi léba bé njom yo ki yo inyu kogse bo, ba konok litén woñi+ inyule bôt bobasôna ba bé ti Nyambe lipém inyu i jam li bi tagbe. 22 Inyule i mut ba bi bôñôl i hélha jam* ini ndi a mbôôp, a bééna iloo 40 ma nwii.

23 Kiki ba nwas bo, ba ke yak bana banigil bape, ba añle bo i mam momasôna baéga biprisi lôñni mimañ mi litén ba bi kal bo. 24 Kiki ba nok hala, ba bédés makiñ, ba soohe Nyambe lôñ, ba kal le:

“A Nwet Bayemlikok, wen u bi hek ngii ni hisi ni tuye lôñni gwom gwobisôna bi yé mukété,+ 25 wen u bi pot ni njel mbuu mpubi mu nyo u sôgôlsôgôl wés David,+ ngwélél woñ le: ‘Inyuki biloñ bi nyôgbe, yak mamut ma hegek pék inyu biyôglô bi mam? 26 Bikiñe bi nkoñ ’isi bi bi telep, yak baane ba kodba kiki mut wada inyu kolba Yéhôva* ni nhook wé.’*+ 27 Inyule ni maliga, Hérôdé ni Pontiô Pilatô+ lôñni bôt ba matén ni bôt ba Israel ba bi kodba munu tison ini ikolba ngwélél woñ mpubi le Yésu, nu u bi yilha nhook,+ 28 inyu yônôs mam u bi téé i bisu bi ngéda ni ngui yoñ lôñni sômbôl yoñ.*+ 29 Ndi nano, a Yéhôva,* tibil emble minhanak nwap, ti yak minkol nwoñ ngui i kônde añal bañga yoñ ni makénd momasôna, 30 sambal ki woo woñ i mélés makon, ni i boñ biyimbne lôñni mam ma hélha*+ i jôl li ngwélél woñ mpubi le Yésu.”+

31 Kiki ba mal yemhe,* i homa ba bé ba kôdi a nyeñg, bobasôna yaga ba yon ni mbuu mpubi,+ ba podok bañga i Nyambe ni makénd.+

32 Handugi hala, limut li bahémle li bééna ñem wada ni mahoñol mada,* to wada ikété yap a bi kal bé le yom yo ki yo a gwé i yé yé, ndi ba bééna mam momasôna lôñ.+ 33 Jon lôñni lipémba likeñi, baôma ba kônde bok mbôgi inyu bitugne bi Nwet le Yésu,+ yak konangoo i mbuma ñañ i bé i ngii yap bobasôna iloo hihéga. 34 Hodo, jam li bé héñél bé mut to wada,+ inyule i bôt bobasôna ba bééna disi tole mandap, ba bé nuñul gwo, ba lon-ga moni mi gwom ba nuñul, 35 ba biak nwo i makôô ma baôma.+ I mbus, ba bé kap nwo inoñnaga ni i yom i nsômbla hiki mut.+ 36 Yak Yôsep, nu baôma ba bé sébél ki le Barnabas+ (hala a nkobla le “Man nu hogbe”), man Lôk Lévi, mut loñ Kiprô, 37 a bééna hisi, a nuñul hio, a lona moni, a bii nwo i makôô ma baôma.+