Kaat Matéô

24 Ndi kiki Yésu a bé nyodi i témpel, banigil bé ba kôôge nye bebee inyu unda nye maoñ ma témpel. 2 A timbhe, a kal bo le: “Baa ni ntehe maoñ mana momasôna? Me nkal bé maliga le, i ngok ini yosôna y’a léña yaga ’isi, to yada y’a yégle bé i kéhi i ngii ipe.”+

3 I ngéda a bé a yii i ngii Hikôa Ôlivé, banigil ba lo nye bebee botama ndigi, ba kal le: “Kal le bés, i mam mana m’a tagbe imbe ngéda? Kii y’a ba ki yimbne le u yé ha*+ ni le i nkoñ ’isi unu* u yé i mamélél?”+

4 Yésu a timbhe bo le: “Yoña yihe le mut to wada a yumus bañ bé,+ 5 inyule ngandak y’a lo, i gwéélak jôl jem, i kalak le: ‘Men me yé Kristô,’ y’a yumus ki ngandak bôt.+ 6 N’a nok mbimba i gwét ni manwin ma gwét. Hala a kônha bañ bé woñi inyule mam mana ma nlama bôña, ndi hala a yé ngi ba lisuk.+

7 “Inyule loñ y’a telep ikolba loñ, yak ane i kolba ane;+ njal ikeñi y’a ba,+ yak nyeñg disi bahoma bahoma.+ 8 I mam mana momasôna ma yé bibôdle bi nkôôga.*

9 “Ha nyen bôt b’a boñ le ni kôhna njiiha,+ b’a nol ki bé,+ yak biloñ gwobisôna gw’a oo bé inyule ni yé banigil bem.+ 10 Hala nyen ngandak y’a nimis hémle yap,* ba liibanaga bo ni bo, ba oonaga ki bo ni bo. 11 Ngandak bapôdôl ba bitembee y’a telep, i yumus ki ngandak bôt;+ 12 inyule liyanmbén l’a bôl, gwéha i libim li bôt y’a sune. 13 Ndi nu a nhônba letee ni lisuk nyen a’ tohlana.+ 14 Yak unu ñañ nlam u Ane w’a añlana ni nkoñ ’isi wonsôna, i ba biloñ gwobisôna+ mbôgi, ndi to le lisuk li nlo.

15 “Jon i ngéda n’a tehe yom nyega i i nlona tjiba i téé i homa mpubhaga,+ ndik kiki mpôdôl Daniel a kal (nu a ñañ* a tibil hek pék), 16 ha nyen ba ba yé i Yudéa ba bôdôl ke ngwéé i dikôa.+ 17 I mut a yé i ngii ndap, a sôs bañ inyu yoñ gwom bi yé ikété ndap yé, 18 yak i mut a yé i wom, a témb bañ inyu bada mbot yé ngii. 19 Ngoo ni bôda ba mém, ni ba ba nyuñus bon mu dilo di! 20 Ni waa bañ soohe le ngwéé nan u ba bañ i ngéda mbéñ, to i kel sabat; 21 inyule ha nyen njiiha ikeñi+ y’a ba, i nya i yé ngi ba ibôdôl i bibôdle bi nkoñ ’isi letee ni nano, to, y’a ba ha bé ki.+ 22 Ni maliga, ibale ba nhubus bé dilo di, ki mut nye ki nye a nla bé kôhna tohi; ndi inyu mimpohlak mi bôt, b’a hubus dilo di.+

23 “Ndi ibale mut a nkal bé le: ‘Nuna-ki, Kristô a yé hana,’+ tole: ‘A yé nyoo!’ Ni hémle bañ jam li.+ 24 Inyule bikristô bi bitembee ni bapôdôl+ ba bitembee b’a telep, ba boñ biyimbne bikeñi ni bihélha bi mam inyu boñ le, ibale ba nla, ba yumus+ yak mimpohlak mi bôt. 25 Nuna-ki, me mal béhe bé. 26 Jon ibale bôt ba nkal bé le: ‘Nuna-ki, a yé i ñoñ,’ ni ke bañ nyoo; tole: ‘Nuna-ki, a yé ikété ndap,’* ni hémle bañ jam li.+ 27 Inyule ndik kiki nwegnwek a nwek i likôl ndi a bayak letee ni hiôñg, hala nyen y’a ba i ngéda Man mut a’ ba ha.*+ 28 To numbe homa mim u yéne, ha nyen minyôgôl nw’a kodba.+

29 “Ndék ngéda ndigi i mbus njiiha i dilo di, hiañgaa hi’a kôp jiibe,+ to sôñ y’a ti ha bé mapubi mé, tjôdôt ki d’a nyodi i ngii, di kwok; yak mimpémba mi mam mi ngii nw’a nyeñg.+ 30 Ha nyen yimbne i Man mut y’a nene i ngii, bôt ba matén momasôna ma nkoñ ’isi b’a bép manyuu map ikété ndutu,+ b’a tehe ki Man mut+ a yé lo ikété ond i ngii lôñni lipémba, ni lipém likeñi.+ 31 I ngéda sép ikeñi y’a héma, a ga ep biañgel gwé, bi kot mimpohlak nwé mi bôt mi mi yé i makas ma-na ma nkoñ ’isi,* ibôdôl lini likas li ngii letee ni lii lipe.+

32 “Nano ni ôt biniigana munu hihéga hi e faigé: I ngéda ntjep wé u ntip too, u pémés ki tjai, ni nyi le sép i yé bebee.+ 33 Jon nlélém jam inyu nan, i ngéda ni ntehe i mam mana momasôna, ni yi le a yé bebee i manwemel.+ 34 Me nkal bé maliga le, i hiai hini hi’a tagbe bé kekikel letee mam mana momasôna ma yon. 35 Ngii ni ’isi b’a tagbe ndi bibañga gwem gw’a tagbe bé kekikel.+

36 “Inyu kel i, to ngeñ i, mut to wada a nyi bé yo,+ to biañgel bi ngii, to Man, ndik Isañ nyetama.+ 37 Inyule ndik kiki dilo di Nôa di bé,+ hala nyen y’a ba i ngéda Man mut a mba ha.*+ 38 Inyule, kiki ba bé niñ mu dilo di ilole Ntida malép u mbôdôl, ba jek, ba nyok, bôlôm ba biiak, bôda ba kenek i mabii, letee ni kel Nôa a jôp ikété nkuu,+ 39 ndi ba bi yoñ bé yihe letee Ntida malép u lo, u sas bobasôna,+ hala nyen y’a ba i ngéda Man mut a’ ba ha. 40 Ha nyen bôt iba b’a ba i wom, b’a yoñ wada, ba tjôô nuu numpe. 41 Bôda iba b’a ba ba nkok i ngok kôgôl, b’a yoñ wada, ba tjôô nuu numpe.+ 42 Jon yéna péé ibabé waa inyule ni nyi bé imbe kel Nwet nan a nlo.+

43 “Ndi yina i jam lini le, ibale nwet ndap a yi imbe ngeñ* mut wip a nlo,+ ki a bi yén péé ibabé waa, a nwas bé le ba bôk ndap yé.+ 44 Jon yak bé ni ba nkôôbaga+ inyule Man mut a nlo i ngeñ ni nhoñol bé le a nlôl.

45 “Njee a yé toi nkol u maliga ni u pék,* u nwet wé a ntéé i ngii bôt bé ba ndap inyu ti bo bijek gwap i loñge ngéda?+ 46 Maséé ni nkol u ibale nwet wé a nlo, a koba nye a mboñ hala!+ 47 Me nkal bé maliga le, a’ téé nye i ngii nkus wé wonsôna.

48 “Ndi ibale i nkol unu u yé béba, u hoñol ki mu ñem wé le: ‘Nwet wem a yé i tiñha,’+ 49 ndi u bôdôl bép mini minkol mimpe, u jek, u nyok ni bôt ba ngwés ngandak nyôba, 50 nwet nkol unu a’ lo i kel nkol u mbem bé nye, ni i ngeñ u nyi bé,+ 51 a’ kogse nye ni kogse ikeñi, a leñ ki nye i homa bôt ba bihéñba ba yé. Nyoo nyen a’ ee, a jek masoñ.+