Kaat Tésalônika bisu

4 Jon a lôk kéé, nlélém kiki di bi niiga bé lelaa ni nlama boñ mam* inyu lémél Nyambe,+ ndik kiki ni mboñ yaga mo, hala ki nyen di nsoohe bé, di yemhege ki bé ni njel Nwet le Yésu le ni kônde boñ hala i nya i yôni. 2 Inyule ni nyi biniigana* di bi ti bé ni njel Nwet le Yésu.

3 Inyule sômbôl i Nyambe i yé le, ni nlama ba bapubhaga,+ ni tjél ki malal ma nyega.*+ 4 Hiki wada nan a nlama yi lelaa a gwel nyuu*+ yé nyemede ikété libak lipubhaga+ ni li lipém, 5 ndi ni kwo bañ ikété ngôñ malal ni huluk ñem i bôt ba nyi bé gwel nyuu,+ kiki bôt ba matén ba ba nyi bé Nyambe.+ 6 Mut to wada a lel bañ minwaa nwé inyu boñ maasañ béba munu jam lini, inyule Yéhôva* a nlona kogse inyu mam mana momasôna, kiki di bi bôk di kal bé, di tibil yaga ki béhe bé. 7 Inyule Nyambe a bi sébél bé bés inyu nyega, ndi inyu libak lipubhaga.+ 8 Jon i mut a nyan biniigana bini, mut binam bé nyen a nyan, ndi Nyambe+ nu a nti bé mbuu wé mpubi.+

9 Ndi, inyu gwéha lisañ li bôt,+ ni gwé ha bé ki ngôñ le di tilna bé mu, inyule Nyambe a mal niiga bébomede le ni gwéhna bé ni bé.+ 10 Ni maliga, ni yé i boñ hala inyu lôk kéé yosôna ikété Makédônia yosôna. Ndi di nti bé makénd, a lôk kéé, le ni kônde boñ hala i nya i yôni. 11 Boña biliya i niñ ikété nwee,+ ni ha bañ to nyo i mañan mam,+ sala ki ni moo manan,+ ndik kiki di bi niiga bé, 12 le ndi ni laa boñ mam* i nya i kôli i mis ma bôt ba mbégdé,+ ibabé le jam jo ki jo li héñél bé.

13 Handugi hala, a lôk kéé, di nsômbôl bé le yi i héñél bé* inyu bôt ba yé i ke ’ilo ikété nyemb,+ inyu boñ le ni bana bañ nduña i ñem kiki bôt bape ba ba gwé bé botñem.+ 14 Inyule ibale di nhémle le Yésu a bi wo, a tuge ki,+ hala nyen Nyambe a’ tugul yak bôt ba bi ke ’ilo ikété nyemb ikété adna ni Yésu, kayéle ba ba lôñni Yésu.+ 15 Inyule i jam lini jon di nkal bé ni njel bañga i Yéhôva,* le bés bayômi ba d’a ba i niñ i ngéda Nwet a mba ha, di yé mbén i bôk i ngii, i bisu bi bôt ba bi ke ’ilo ikété nyemb; 16 inyule Nwet nyemede a’ lôl i ngii, a sôs, a ti oda ni kiñ i ñane biañgel+ lôñni sép i Nyambe, ha nyen ba ba bi wo ikété adna ni Kristô b’a bôk ba tuge.+ 17 I mbus, bés bayômi ba d’a ba i niñ, d’a bet ikété ond+ lôñni bo inyu boma Nwet+ i ngii;* ha nyen d’a ba lôñni Nwet ngéda yosôna.+ 18 Jon kena ni bisu i tina bé ni bé hogbe lôñni i bibañga bini.