Bakéés

16 Kel yada, Samsôn a bi ke i Gasa, a tehe muda libambe nyoo, a jôp i nyeni. 2 Ba kal bôt ba Gasa le: “Samsôn a nlo i bééni.” Ha nyen ba bi kéña nye, ba amb ki nye u wonsôna i nwemel u tison. Ba mom nwee u wonsôna, ba kalnaga le: “I ngéda kel i nye, di nol nye.”

3 Ndi Samsôn a bi nañal letee ni kosi juu. I kosi juu, a telep, a gwel makôga ma tison lôñni i mél ima ma bé ma bééga mo, a nup mo lôñni bihimbil gwap. A bii mo bituu gwé, a kena mo letee ni i ngii hikôa hi yé i bisu bi Hébrôn.

4 I mbus ngéda, a gwés muda wada nu a bé yééne bebee ni nsôsôgô* u Sôrek, jôl li muda nu li bé le Dalila.+ 5 Baane ba bôt ba Filistia ba bi ke yak muda nu, ba kal nye le: “Lop nye,*+ u yi kii i nti nye i nya ngui i, ni lelaa di yémbél nye, di kañ nye, le a tééñga ha bañ bés. Ibale u mboñ hala, hiki wada wés a nti we 1 100 batjañtjañ ba silba.

6 I mbus, Dalila a kal Samsôn le: “Soho, kal me hee ngui yoñ ikeñi i nlôl, kii di nla gwélél inyu kañ we le ndi u tééñga ha bañ bés?” 7 Samsôn a kal nye le: “Ibale ba nkañ me ni minkôô mi mpihlôñgô* mi mondo minsaambok le ba numus bé, m’a nimis ngui yem me yila kiki bôt bobasôna.” 8 Baane ba bôt ba Filistia ba bi lona i muda nu minkôô mi mpihlôñgô mi mondo minsaambok le ba numus bé, a kañ Samsôn lôñni nwo. 9 Bôt ba bé ba sôli ikété tuñ ipe, muda a lond le: “A Samsôn, bôt ba Filistia ba yé we i nyuu!” Ha nyen, Samsôn a bi pat minkôô mi mpihlôñgô wengoñle bôñgô le ba ntiigaha bebee ni hié.+ Mut a bé yi bé hee ngui yé i bé lôl.

10 I mbus, Dalila a kal Samsôn le: “U nlôk me,* u nkal me bitembee. Soho ndigi, kal me kii ba nla gwélél inyu kañ we.” 11 A kal muda le: “Ibale ba nkañ me ni minkôô mi mondo le ba yé ngi gwélél inyu nson, m’a nimis ngui yem, me yila kiki bôt bobasôna.” 12 Dalila a yoñ minkôô mi mondo, a kañ nye lôñni nwo, a lond le: “A Samsôn, bôt ba Filistia ba yé we i nyuu!” (Mu ngéda i, bôt ba bé ba sôli ikété tuñ ipe.) Ndi a bi pat minkôô mi kiki nso bôñgô,+ mi nyodi nye munu moo.

13 I mbus, Dalila a kal Samsôn le: “Letee ni nano, u nlôk me, u nkal me bitembee.+ Kal me kii ba nla gwélél inyu kañ we.” Samsôn a kal nye le: “Yoñ bibabaga gwem gwo bisaambok, u téñ gwo ni bôñgô ba ngwélél inyu bañ mabadô.” 14 Ha nyen muda a bi kañ gwo i kék, a lond le: “A Samsôn, bôt ba Filistia ba yé we i nyuu!” Samsôn a ubla ’ilo, a nup kék ni bôñgô.

15 Ha nyen muda a bi kal nye le: “Lelaa u nla kal le: ‘Me ngwés+ we,’ ndi ki le ñem woñ u ta bé lôñni me? Ngélé aa ini le u nlôk me, u nkal bé me hee ngui+ yoñ ikeñi i nlôl.” 16 Hiki kel, muda a bé hombok nye, a tééñgaga nye kayéle Samsôn a waa nye, a la ha bé nihbe.*+ 17 Sôk i nsôk, a yible muda ñem wé, a kal le: “Me ma homb bé ño wem, inyule me yé mut Nazir inyu Nyambe ibôdôl i ligwéé+ jem.* Ibale ba nhomb me ño, me nimis ngui yem, me yila kiki bôt bobasôna.”

18 I ngéda Dalila a bi tehe le Samsôn a nyible nye ñem wé, a pala ke a sébél baane+ ba bôt ba Filistia, a kal bo le: “Lini lisañ, lona inyule a nyible me ñem wé.” Baane ba bôt ba Filistia ba lo yak muda, ba lona nye moni ba bi bôn nye. 19 Muda a bi kis nye ’ilo maboñ mé; a sébél mut le a homb bibabaga gwo bisaambok bi bé nye mu ño. I mbus hala, muda a bôdôl bémbe nye, inyule a bé nimis ngui yé. 20 Ha nyen muda a bi lond le: “A Samsôn, bôt ba Filistia ba yé we i nyuu!” Samsôn a ubla ’ilo, a kal le: “M’a boñ kiki lem,+ me pei.” Ndi a bi yi bé le Yéhôva a bé ha bé lôñni nye. 21 Bôt ba Filistia ba gwel nye, ba tôp nye mis. I mbus, ba sôhna nye i Gasa, ba kañ nye ni minsañ mi mamuna ima, a yila nu a nkok blé i ndap mok. 22 I ngéda ba bi homb+ nye ño, tjôñ tjé di bi témb di bôdôl nañ.

23 Baane ba bôt ba Filistia ba bi kodba inyu ti nyambe wap Dagôn+ sesema ikeñi ni inyu lôôs ngand, inyule ba bé kal le: “Nyambe wés a nhôla bés i yémbél ñoo wés Samsôn!” 24 I ngéda bôt ba bi tehe Samsôn, ba bégés nyambe wap, ba kal le: “Nyambe wés a nhôla bés le di yémbél ñoo wés, nu a bi tjé loñ+ yés, a nol ki bôt bés ngandak.”+

25 Kiki bôt ba bé maséé, ba kal le: “Séblana Samsôn le a nôlha bés.” Ha nyen ba bi pémés Samsôn i mok, ba lona nye le a nôlha bôt; ba téé nye ipôla mél. 26 Samsôn a kal i mañge a bé gwel nye i woo le: “Boñ le me tihba mél ma témpel, inyu boñ le me nigbene mu.” 27 (Témpel i bé nyonok ni bôt, bôlôm ni bôda. Baane bobasôna ba bôt ba Filistia ba bé ha, yak jam kiki bo 3 000 di bôt, bôlôm ni bôda, di bé i ngii nyôl, di béñgege Samsôn, di nolok.)

28 Ha nyen Samsôn+ a bi lôndôl Yéhôva, a kal le: “A Yéhôva, Nwet Bayemlikok, soho bigda me, lédés me,+ soho ndigi inyu ngélé i nsôk; A Nyambe, boñ le me pun to jis+ jem jada ndigi inyu jam bôt ba Filistia ba bi boñ.”

29 I mbus, Samsôn a gwel mél mo ima ma bé i ñemkété témpel, ma nidik yo; jél jada li bak i woo wé walôm, lipe li bak i woo wé waé. 30 Samsôn a lond le: “M’a wo ni bôt ba Filistia!” I mbus, a nyuge mél ni ngui yé yosôna, témpel i bugi, i kwél baane ni bôt+ bobasôna mukété. Hala nyen i bôt Samsôn a bi nol i nyemb yé, ba bi loo i bôt a bi nol i ngéda a bé niñ.+

31 I mbus, lôknyañ ni lihaa li isañ jolisôna ba sôs i Gasa inyu begee mim wé. Ba bedna wo, ba jô wo ipôla Zôra+ ni Éstaôl, i soñ i isañ wé Manôa.+ Samsôn a bi ba nkéés i Israel 20 ma nwii.+