Masoola Yôhanes a bi kôhna

21 Me tehe ngii yondo ni hisi hi yondo;+ inyule ngii i bisu ni hisi hi bisu bi bi tagbe,+ to tuye+ a ta ha bé. 2 Me tehe ki tison pubhaga le Yérusalem yondo, i lôlak i ngii yak Nyambe,+ i sôhôk ’isi, i bak ki nkôôbaga kiki sombo nu a ñeñgep inyu bem nlô wé.+ 3 Ha nyen me bi nok kiñ ikeñi i nlôl i yééne ane, i kalak le: “Nuna-ki! Lap i Nyambe i yé ni bôt ba binam, a ga yén ki lôñni bo, b’a ba bôt bé. Nyambe nyemede a’ ba lôñni bo.+ 4 A’ sas gwiiha gwobisôna i mis map,+ nyemb y’a ba ha bé,+ to maéya, to nlondok, to njôghe bi ga ba ha bé.+ Minlômbi mi mam mi mal tagbe.”

5 Nu a bé a yii mu yééne ane+ a kal le: “Nuna-ki! Me mboñ mam momasôna yondo.”+ A kal ki le: “Tila, inyule bibañga bini bi yé maliga,* bi yé ki ntiik.” 6 A kal me le: “Bi mal yon! Men me yé Alfa ni Ôméga,* bibôdle ni lisuk.+ I mut nyus i gwé, m’a ti nye malép yañga,*+ ma lôlak i lingen* li malép ma niñ. 7 I mut a’ yémbél nyen a’ kôdôl i mam mana, me ga ba Nyambe wé, yak nye a’ ba man wem. 8 Ndi i bôt ba nkon woñi ni bôt ba ngi hémle,+ ni i bôt ba yé nyega ikété mahindi map, ni bôt ba manola,+ ni bôt ba malal ma nyega,*+ ni bôt ba gwé lem i boñ makañ,* ni babégés bisat, ni bôt ba bitembee bobasôna,+ ngaba yap y’a ba ikété titimba i nloñ ni hié lôñni solfa.+ I titimba ini yon i yé nyemb i nyônôs iba.”+

9 Añgel yada i lo, i bé ikété biañgel bisaambok bi bi bééna biséya bisaambok bi bi bé nyonok ni dimala disaambok di nsôk,+ i kal me le: “Loo, m’a unda we sombo, nwaa Man ntômba.”+ 10 Jon a kena me ni ngui mbuu mpubi i soso hikôa hi nyôgi, a unda ki me tison ipubi le Yérusalem, i lôlak i ngii yak Nyambe,+ i sôhôk ’isi, 11 i ban-ga lipém li Nyambe.+ I bé bai kiki ngok i i nlôôha tik, kiki ngok yaspi i i mbai kiki kristal.+ 12 I bééna soso lipénd li nyôgi, i ban-ga ki 12 manwemel, yak 12 biañgel bi bé bi téé i manwemel, môl ma 12 matén ma bon ba Israel ma bé ntilga mu manwemel. 13 I pes likôl, manwemel ma bé maa; i pes ñombok, manwemel maa; i pes nwelmbok, manwemel maa; i pes hiôñg, manwemel maa.+ 14 Hikuu hi lipénd li tison hi bééna 12 ngok, 12 môl ma 12 baôma+ ba Man ntômba ma bé ntilga mu ngok.

15 Ndi nu a bé pôdôs me a bééna likai li gôl inyu hek tison ni manwemel mé ni lipénd jé.+ 16 Yak tison i bééna makas ma-na, bibôñgô gwé ni pôk yé bi bé nlélém. Añgel i hek tison ni likai, hala a ti jam kiki bo 2 220 kilôméta;* bibôñgô gwé ni pôk yé ni ntel wé bi bak nlélém. 17 A hek ki lipénd jé, hala a ti 144 dikéñéé di moo* inoñnaga ni lihegek li mut binam, li li yé nlélém ni lihegek li añgel. 18 Lipénd li bé ñoñok ni yaspi,+ yak tison i bé ni bañga gôl wengoñle léman i mpôp. 19 Mintén mi tik ngok nwominsôna mi bé lémés hikuu hi tison: ngok bisu i hikuu i bé yaspi, i nyônôs iba safirô, i nyônôs aa kalsédôn, i nyônôs ina émérôd, 20 i nyônôs itan sardônikô, i nyônôs isamal sardi, i nyônôs isaambok krisôlitô, i nyônôs juem bérilô, i nyônôs bôô tôpasô, i nyônôs jôm krisôpasô, i nyônôs jôm ni yada hiasintô, i nyônôs jôm ni iba amétistô. 21 Yak 12 manwemel ma tison ma bé 12 perl; hiki nwemel u bé ni perl yada. Nlôm njel nu tison a bé ni bañga gôl wengoñle léman i nehna.*

22 Me bi tehe bé témpel mukété, inyule Yéhôva,* Nyambe Nu ngui yosôna+ a yé témpel i tison, bona Man ntômba. 23 Tison i gwé bé to ngôñ ni hiañgaa, to sôñ inyu béyéi yo, inyule lipém li Nyambe jon li nti yo mapubi,+ Man ntômba nyen a yé lambe yé.+ 24 Biloñ bi ga hiôm ni njel mapubi mé,+ yak bikiñe bi hisi bi ga lona lipém jap mukété. 25 Manwemel mé m’a kwéhba bé njamuha kekikel, inyule u w’a sude bé mu.+ 26 Bi ga lona lipém lôñni bikeñi bi biloñ mukété.+ 27 Ndi yom yo ki yo i i yé mahindi y’a jôp bé mu kekikel,+ to mut nye ki nye nu a mboñ mam ma nyega ni ma malôga; ndik ba ba gwé môl map ntilga mu nhôôk kaat niñ u Man ntômba bon b’a jôp mu.+