Kaat Yôhanes

21 I mbus hala, Yésu a témb a pémél banigil bé i Tuye Tibéria. Haana nyen a bi pémél bo: 2 I bôt bana bon ba bé lôñ, Simôn Pétrô, Tômas (nu ba nsébél le Lihas),+ Natanael+ mut Kana nu Galiléa, bon ba Sébédéô,+ lôñni banigil ba Yésu iba bape. 3 Simôn Pétrô a kal bo le: “Me nke i lop tjobi.” Ba kal nye le: “Yak bés di nke lôñni we.” Ba pam i mbégdé, ba bet i môñgô, ndi ba gwel bé to yom i u u.+

4 Ndi kiki kel i nye ndigi, Yésu a telep i ngwañ tuye, ndi banigil ba bi yi bé le Yésu nu.+ 5 Ha nyen Yésu a bi kal bo le: “A bon bem, baa ni gwé yom* i je?” Ba timbhe le: “To!” 6 A kal bo le: “Leña mbunja i pes walôm i môñgô, ndi n’a gwel yom.” Jon ba bi leñ mbunja, ndi ba la ha bé ôt yo inyule i bi gwel ngandak tjobi.+ 7 Ha nyen i nnigil Yésu a bé gwés+ a kal Pétrô le: “Nwet nu!” I ngéda Simôn Pétrô a bi nok le Nwet nu, a haba* mbot yé inyule a bé nyuu nso,* a leñba ikété tuye. 8 Ndi bana banigil bape ba lo ikété man môñgô, ba ôdôk mbunja nyonok ni tjobi inyule ba bé bé haa ni ngwañ, hala a bé jam kiki bo 90 ma méta.*

9 Kiki ba bi pam i ngwañ, ba tehe juu li makalak ni tjobi mu ngii lôñni bret. 10 Yésu a kal bo le: “Ni lona ndék mu tjobi ni ntip gwel.” 11 Ha nyen Simôn Pétrô a bi bet i môñgô, a ôt mbunja i ngwañ, i bé nyonok ni tjobi dikeñi, di bé 153.* To hala kiki tjobi di bé ngandak, mbunja i bi pédi bé. 12 Yésu a kal bo le: “Loga i je.” Nnigil to wada a bééna bé makénd i bat nye le: “U yé njee?” Inyule ba bé yi le Nwet nu. 13 Yésu a lo, a yoñ bret, a ti bo yo, a boñ nlélém jam ni hiobi. 14 Hala a bé ngélé i nyônôs aa+ le Yésu a pémél banigil i mbus bitugne gwé.*

15 I ngéda ba bi mal je, Yésu a bat Simôn Pétrô le: “A Simôn, man Yôhanes, baa u ngwés me iloo bini?”* A timbhe nye le: “Ñ, a Nwet, u nyi le me ngwés we.” Nwet a kal nye le: “Jés bon bem ba mintômba.”+ 16 A témb a bat nye inyu ngélé i nyônôs iba le: “A Simôn, man Yôhanes, baa u ngwés me?” Pétrô a timbhe le: “Ñ, a Nwet, u nyi le me ngwés we.” Nwet a kal nye le: “Tééda bon bem ba mintômba.”+ 17 A témb a bat nye inyu ngélé i nyônôs aa le: “A Simôn, man Yôhanes, baa u ngwés me?” Hala a tééñga Pétrô le a mbat nye inyu ngélé i nyônôs aa le: “Baa u ngwés me?” Jon Pétrô a bi kal nye le: “A Nwet, u nyi mam momasôna; u nyi le me ngwés we.” Yésu a kal nye le: “Jés bon bem ba mintômba.+ 18 Me nkal yaga we maliga le, i ngéda u bé mañge wanda, u bé haba mbot yoñ wemede, u kenek i homa u ngwés. Ndi i ngéda w’a un, w’a sambal moo moñ, mut numpe nyen a ga ha we mbot, a kena ki we i homa u ngwés bé.” 19 A bi kal hala inyu toñol ni umbe ntén nyemb Pétrô a’ ti Nyambe lipém. Kiki a mpot hala, a kal nye le: “Noñ me ibabé waa.”+

20 Pétrô a hielba, a tehe le i nnigil Yésu a bé gwés+ a yé i noñ bo; nyen a bi sedep ni mbus, a nigip i tôl Yésu i ngéda ba bé je* ndi a bat le: “A Nwet, njee a yé i liibana we?” 21 Jon kiki Pétrô a ntehe nye, a bat Yésu le: “A Nwet, kii i ga pémél i mut nunu?” 22 Yésu a timbhe nye le: “Ibale sômbôl yem inyu yé i yé le a yén i niñ letee me lo, hala a mbéñge we ni kii? We noñ me ibabé waa.” 23 Jon ñañ u bi ke ipôla lôk kéé le i nnigil nu a’ wo bé. Ndi Yésu a bi kal bé le i nnigil nu a’ wo bé. A bi kal ndigi le: “Ibale sômbôl yem inyu yé i yé le a yén i niñ letee me lo, hala a mbéñge we ni kii?”

24 I nnigil+ nu nyen a mbok i mbôgi ini inyu mam mana, nye ki nyen a bi tila i mam mana, di nyi ki le mbôgi yé i yé maliga.

25 Ni maliga, Yésu a bi boñ ki ngandak mam ipe, ibale ba bak le ba tila toi momasôna, me nhégda le ki nkoñ ’isi womede u nkola bé inyu begee i minhôôk mi bikaat mi nwominsôna.+