Kaat Éfésô

6 A bon, nôglana bagwal banan+ ikété adna ni Nwet, inyule hala a téé sép. 2 “Ti isoñ bo nyuñ lipém,”+ hala a yé mbén bisu, i i nkiha ni i mbônga unu: 3 “Le mam ma kee loñge inyu yoñ,* u nom ki ntandaa ngéda hana ’isi.” 4 A basañ, ni hombok bañ bon banan,+ ndi kena ni bisu i néñés bo ikété biniigana+ ni mabéhna* ma Yéhôva.*+

5 A minkol, nôglana bet banan hana ’isi,*+ ni konok woñi, ni tinak bo lipém, ni boñok hala ni miñem minan nwominsôna wengoñle inyu Kristô; 6 ni boñ ndik bañ hala i ngéda ba mbéñge bé inyu lémél bôt,*+ ndi kiki minkol mi Kristô mi mi mboñ sômbôl i Nyambe ni ñem* wap wonsôna.+ 7 Ni salak kiki minkol lôñni mahoñol malam wengoñle inyu Yéhôva,*+ ndi ha inyu bôt ba binam bé, 8 inyule ni nyi le hiki loñge jam mut a mboñ, Yéhôva*+ nyen a’ timbhe nye jo, to a yé nkol, to a ta bé nkol. 9 A bet, yak bé boña nlélém jam inyu yap, ni han bañ minkol minan, inyule ni nyi le bé ni bo ni gwé nlélém Nwet nu a yé i ngii,+ a ntodol bé ki to mut nye ki nye.

10 Kiki jam li nsôk, kena ni bisu i bana ngui+ i nlôl yak Nwet ni ikété lipémba li ngui yé. 11 Ni haba bijôl bi gwét+ gwobisôna bi bi nlôl yak Nyambe inyu boñ le ni laa telep siñ ikolba dipa* di Nsohop; 12 inyule di njôs*+ bé minsôn to matjél, ndi di njôs bangomin, baane, basañnkoñ ba jiibe lini,+ mintôñ mi mimbuu mimbe mi mi yéne i ngii. 13 Inyu hala nyen yoña bijôl bi gwét gwobisôna bi bi nlôl yak Nyambe,+ le ndi ni pam i hônba i hilo hibe, ni le i ngéda ni mal boñ mam momasôna, ni telep siñ.

14 Jon telbana siñ, ni ngôli i maliga ntéñék i bôbôk,+ ni bak ni hééba ben tôl i telepsép,+ 15 makôô manan ma ban-ga bitamb le ndi ni ba nkôôbaga i añal ñañ nlam u nsañ.+ 16 Handugi mam mana momasôna, yoña ben ikeñi i hémle,+ yon n’a gwélél inyu lém makoñ* ma hié ma mut mbe momasôna.+ 17 Neebana yak kôñgô*+ i tohi lôñni pansoñ i mbuu, hala wee bañga i Nyambe,+ 18 ni soohege ngéda yosôna+ ni njel mbuu lôñni mintén mi masoohe nwominsôna, ni minyemhe.+ Jon yéna péé, ni yemhege hiki ngéda inyu bapubhaga bobasôna. 19 Soohana yak inyu yem, le ndi me kôhna bibuk i ngéda me nyibil nyo kayéle me pam i pot ni makénd i yis bôt jimb lipubi li ñañ nlam,+ 20 ni le me pam i pot inyu ñañ nlam ni makénd kiki i nsômbla; ngo inyu ñañ nlam nyen me yéne nkenwin,+ me bak ki nkañak ni minsañ mi bikei.

21 Nano, inyu boñ le ni yi kii me yé i boñ ni lelaa me yé, Tikikô,+ mankéé nugwéha ni ngwelnson nu maliga ikété adna ni Nwet, a’ yis bé mam momasôna.+ 22 Inyu hala yaga nyen me yé i ep nye i bééni, inyu yis bé lelaa di yé, a ti ki miñem minan hogbe.

23 Nsañ ni gwéha ni hémle bi bi nlôl yak Nyambe Tata ni yak Nwet le Yésu Kristô bi ba ni lôk kéé. 24 Konangoo i mbuma ñañ i ba ni bôt bobasôna ba ba ngwés Nwet wés Yésu Kristô ni gwéha i i mal bé.