Kaat Korintô iba

11 Me nsômbôl le ni nihbe me, to ibale me nene ndék jôñ. Ndi ni maliga, ni yé i nihbe me! 2 Inyule me nsôñ bé ni sôñ i nlôl yak Nyambe,* inyule memede nyen me bi bôn le me nti bé i libii yak nlôm wada, le ndi me ti bé yak Kristô kiki hingonda hi hi yé konji, hi bak ngi nsohi.*+ 3 Ndi me nkon woñi le, kiki nyoo i bi lop Éva ni mandon mé,+ ba yé le ba ôbôs mahoñol manan kayéle ma kee haa ni maliga ma ñem lôñni libak lipubi bi bi kôli ni Kristô.+ 4 Inyule ni maliga, ibale mut a nlo, a añal Yésu numpe handugi nu di bi añal, tole ni kôhna mbuu umpe handugi u ni bi kôhna, tole ñañ nlam umpe handugi u ni bi neebe,+ ni neebe i yom i mut nu a mpot. 5 Ndi me ntehe bé yom yo ki yo i i ñunda le me yé ntitigi i bisu bi bôt ba nkalba le ba yé bañga baôma.+ 6 Ndi to ibale me gwé bé loñge likeñge i yoñ hop,+ me nhañ yaga bé yi; ibabé pééna, di bi unda bé yi yés ikété manjel momasôna ni ikété mam momasôna.

7 Baa me bi boñ béba kiki me bi suhus memede inyu bédés bé, inyule me bé maséé i añle bé ñañ nlam u Nyambe yañga?+ 8 Me bi mélés* nkus u makoda mape i ngéda me bi neebe mahôla map* inyu gwélél bé nson.+ 9 I ngéda me bé lôñni bé, ndi me bana ngôñ ni ngim jam, me bi yilna bé mut nye ki nye mbegee, inyule i lôk kéé i bi lôl i Makédônia i bi ti me mam momasôna me bééna ngôñ.+ Ñ, ikété manjel momasôna, me bi yoñ bitelbene le me yilna bañ bé mbegee, me ga ke ki ni bisu i boñ hala.+ 10 Ntel wonsôna maliga ma Kristô ma yé ikété yem, m’a waa bé kadba+ inyu jam lini nyoo minkoñ mi Akaya. 11 Inyuki? Baa inyule me ngwés bé bé? Nyambe a nyi le me ngwés bé.

12 Ndi m’a ke ni bisu i boñ i jam me yé i boñ,+ inyu boñ le i bôt ba nsômbôl unda* le bés ni bo di yé nlélém, di ti bañ bo njom i unda le bés ni bo di yé nlélém ikété mam* ma mboñ le ba kadba. 13 Inyule i nya bôt ini i yé baôma ba bitembee, bôt* ba ba nlôk bape, ba ba nhéñba le* ba yé baôma ba Kristô.+ 14 Hala a ta bé jam li hélha, inyule yak Satan nyemede a nwaa bé héñba le a yé añgel i mapubi.+ 15 Jon hala a ta yaga bé jam li hélha ibale yak bagwélél bé ba nwaa bé héñba le ba yé bagwélél ba telepsép. Ndi lisuk jap l’a ba inoñnaga ni minson nwap.+

16 Me ntiimba kal le: mut to wada a hoñol bañ le me yé jôñ mut. Ndi to ibale ni nhoñol yaga le me yé jôñ mut, wee ni neebe me kiki jôñ mut, inyu boñ le yak me me kadba ndék. 17 Ndi i jam me mpot nano, me mpot bé jo kiki Nwet a bak le pot jo, ndi kiki jôñ mut i i mbôdôl yomede ñem, i kadbaga ki. 18 Hala kiki ngandak i nkadba i pes minsôn,* wee yak me m’a kadba. 19 I kal ni nkal le ni yé “bôt ba nhek pék,” baa inyu hala nyen ni nkon maséé i nihbe bijôñ bi bôt? 20 Ni maliga, ni nihbe nu ni nu a nyilha bé minkol, nu ni nu a nje nkus nan, nu ni nu a nkadal i gwom ni gwé, nu ni nu a mbédés nyemede i ngii nan, nu ni nu a mbép bé libai i su.

21 Di nwo nyuu i pot hala, inyule hala a nla nene wengoñle di mbomb.

Ndi ibale bôt bape ba nkandal nyuu (me mpot kiki jôñ mut), ngo wee yak me me nkandal nyuu. 22 Baa ba yé bon ba Lôk Héber? Ngo yak me.+ Baa ba yé bon ba Lôk Israel? Ngo yak me. Baa ba yé mbôda* Abraham? Ngo yak me.+ 23 Baa ba yé bagwélél ba Kristô? Me ntimbhe kiki mut njék, me yé ngwélél Kristô iloo yaga bo: me bi gwel nson iloo bo,+ me ke i mok ngandak ngélé iloo bo,+ me biba ndôm iloo hihéga, me ba bebee ni nyemb ngandak ngélé.+ 24 Ngélé itan, Lôk Yuda i bi bép me môm ma-na ma disôô, u héya hiada;+ 25 ngélé aa, ba bép me ni bikék,+ ba ôm me ngok ngélé yada,+ ngélé aa sitima yés i yin,+ me tégbaha u wada ni njamuha yada i ñem tuye; 26 me nloo bo i ngandak maké, i mandutu i yap balom, i mandutu ma nlôl ni bôt ba wip, i mandutu ni bôt bem bomede,+ i mandutu ni bôt ba matén mape,+ i mandutu ikété tison,+ i mandutu i ñoñ, i mandutu i tuye, i mandutu ipôla lôk kéé i bitembee, 27 i ndumbba nson ni ngandak bôlô, i ngandak lal péé,+ i njal ni nyus,+ i yén ngi je ngandak ngélé,+ i lihep ni liyep li mbot.*

28 Handugi i mam mana momasôna, jam lipe jon li ntééñga me mahoñol* hiki kel: nduña inyu makoda momasôna.+ 29 Njee a mbomb, ndi me bomb bé? Njee a mbaage, ndi ñem u loñ bé me?*

30 Ibale me nlama kadba, m’a kadba inyu mam ma ñunda bibomb gwem. 31 Nyambe ni Isañ Nwet le Yésu, Nu a nlama kôhna bibégés i boga ni boga, a nyi le me ta bé i tembee. 32 Ngomin i pes mbok i Damaskô, i i yé isi énél i Kiñe Aréta, i bé tat tison i bôt ba Damaskô inyu gwel me, 33 ndi ba bi tégbaha me i winda i lipénd li tison,+ ba suhlene me ikété sel, me tohla i moo mé.