Kaat bisu i Miñañ

22 I mbus, David a kal le: “Ndap Yéhôva bañga Nyambe y’a ba hana, hana ki nyen juu li bisesema bi ntul i hié li Israel+ li ga ba.”

2 David a bi ti oda le ba lona nye bakén+ ba bôt ba ba bé i loñ Israel, a ti bo bôlô i bol ngok ni i kôñg yo inyu oñ ndap i bañga Nyambe.+ 3 David a bi kôôba ngandak bikei* inyu boñ batone i tômôl makôga ma manwemel ni inyu boñ bibéndél;* a bi kôôba ki ngandak mamuna kayéle ba bi la bé hek kilô,+ 4 a kôôba yak bikék bi sidar+ bi bi bééna bé nsoñgi, inyule bôt ba Sidôn+ ni bôt ba Tir+ ba bi lona David ngandak bikék bi sidar. 5 David a bi kal le: “Man wem Salômô a yé mañge, a yé ngi to boñ i nya bôlô i;*+ ndi i ndap i nlama ôña inyu Yéhôva i ga ba ilam iloo hihéga,+ jôl jé ni bilama+ gwé bi kenek ngan i biloñ+ gwobisôna. Jon m’a kôôbana nye bisélél.” Inyu hala nyen David a bi kôôba ngandak bisélél ilole a nwo.

6 A bi sébél Salômô, a kal nye le a oñ ndap Yéhôva, Nyambe nu Israel. 7 David a kal Salômô le: “Me bééna ngôñ i oñ ndap inyu jôl li Yéhôva Nyambe+ wem. 8 Ndi Yéhôva a bi kal me le: ‘U nkôp matjél ngandak, u njo ki gwét ngandak. W’a oñ bé ndap inyu jôl+ jem inyule u nkôp matjél ngandak hana ’isi i bisu gwem. 9 W’a bana man munlôm+ nu a ga ba mut nsañ,* me ga ti nye noi, kayéle baoo bobasôna ba ba nkéña nye+ ba ga lo bé i jôs nye, inyule jôl jé li ga ba le Salômô;*+ i dilo+ tjé, m’a lona nsañ ni nwee i Israel. 10 Nyen a ga oñ ndap inyu jôl+ jem. A ga yila man wem, me m’a yila isañ.+ M’a lédés ki yééne yé ane i Israel i boga ni boga.’+

11 “Nano a man wem, Yéhôva a ba ni we, mam ma kee ki loñge inyu yoñ, u oñ ki ndap Yéhôva Nyambe woñ, kiki a bi pot inyu yoñ.+ 12 Yéhôva a ti we pék+ ni yi i ngéda a ga ti we ane i Israel, inyu boñ le u noñ mambén ma Yéhôva Nyambe+ woñ. 13 Mam m’a ke loñge inyu yoñ ibale u noñ matiñ+ ni matéak Yéhôva a bi ti Môsi inyu Israel.+ Bana ñem ngui, u lédés ki. U kon bañ woñi, u sehla bañ to.+ 14 Me nyoñ ngéda ngandak i kôôba maoñ ma ndap Yéhôva: 100 000 talént* i gôl ni 1 000 000 talént i silba, yak ni ngandak mamuna ni bikei*+ kayéle ba nla bé hek kilô; me nkôôba ki bikék ni ngok,+ ndi w’a kônde gwom bipe mu. 15 U gwé ngandak bôt ba bôlô: bakôñg ngok,+ baoñ mandap, bikapinda ni mintén mi bôt nwominsôna mi mi gwé makeñge ma bôlô.+ 16 Gôl, silba, mamuna ni bikei* bi yé ngandak kayéle mut a nyi bé gwo nsoñgi.+ Telep, bôdôl bôlô, Yéhôva a ba ni we.”+

17 I mbus, David a ti baane ba Israel bobasôna oda le ba hôla man wé Salômô. A kal bo le: 18 “Yéhôva Nyambe nan a yé lôñni bé, a bi ti bé noi bipes gwobisôna. Nyen a bi boñ le me ane bôt ba loñ yosôna, loñ yosôna i yé ki i moo ma Yéhôva ni i moo ma litén jé. 19 Nano, yoña makidik i yéñ Yéhôva Nyambe nan ni miñem* minan nwominsôna, ni niñ nan yosôna.+ Ni bôdôl ki oñ témpel Yéhôva, bañga Nyambe;+ inyu boñ le ba lona nkuu Malômbla u Yéhôva ni bisélél bipubhaga bi bañga Nyambe+ mu ndap y’a ôña inyu jôl li Yéhôva.”+