Yésaya
58 “Lond ni ngui yoñ yosôna; yom yo ki yo i kéñ bañ we njel!
Bédés kiñ yoñ kiki hioñ.
Yeelene bôt ba litén jem liboñok jap libe,+
yak mbôda Yakôb, bibéba gwap.
2 Ba nyéñ me kel yosôna,
ba kalak le ba nkon maséé i noñ manjel mem,
wengoñle ba yé litén li li bi boñ mam ma téé sép,
ni li li bi tjôô bé telepsép i Nyambe wap.+
Ba mbat me mbagi i téé sép
wengoñle ba nkon maséé i kooge bebee ni Nyambe:+
3 ‘I ngéda di nsôga je, inyuki u ntehe bé?+
Inyuki di nyôiba ndi u nyimbe bé hala?’+
4 Hiki ngéda ni nsôga je, hala a nsôk ni momol ni bisañ,
ni ñôm bôt bikut ni béba ñem.
Ni hoñol bañ le kiñ nan i nla nôga i ngii i ngéda ni nsôga je kiki ni mboñ i len ini.
5 Baa i nya sôga je ini yon me mbat?
Baa i nlama ndik ba kel mut a nyôiba,
a ôôp kiki likai, a ôm mbom ’isi,
a nañal i ngii minsugut ni libu?
Baa hala nyen u nsébél le sôga je ni hilo hi hi nlémél Yéhôva?
6 To, ini sôga je yon me mbat:
héya minsañ mi béba ñem,
hohol minkôô mi kop nson,+
i bôt u tééñgaga, nwas bo le ba kenek,+
bôk kop nson ngéñ ngéñ;
7 kabna bijek* gwoñ ni mut njal i gwé,+
leege hiyeyeba i weeni, yak ni nu a gwé bé liyééne,
ibale u ntehe mut a yé nso, ti nye mbot,+
u kôm bañ manyuñ mbus.
8 Ha nyen mapubi moñ ma ga bai kiki maye ma kel,+
yak mbôô woñ u ga pala lo.
Telepsép yoñ i ga bôk we i bisu,
lipém li Yéhôva li ga tat we nyono i mbus.+
9 Ha nyen u ga sébél, Yéhôva a timbhe we;
w’a lond inyu bat mahôla, a ga timbhe we le: ‘Me nunu!’
Ibale u nhéya kop nson i ndééñga i weeni,
u nwas ki i nand bôt hinoo ni i pot ni béba ñem,+
10 i mut njal i gwé, ibale u nti nye i yom i nkon wemede ngôñ,+
ibale u nhôgbaha i bôt ba nok ndutu,
mapubi moñ ma ga bai, to ikété jiibe,
yak jiibe joñ li ga ba wengoñle kosi i nkwo.+
11 Yéhôva a ga éga we ngéda yosôna,
a ga yoñ ngéda ni we to u yé i nnumuk nkoñ;+
a ga lédés bihés gwoñ,
u yila kiki wom u u gwé ngandak malép,+
kiki lingen li li nsa bé.
Ba ga sébél we le ntibil mapénd ma ma bi bugi,+
ntibil minloñ le bôt ba yééne mu mapañ.
13 Ibale u ntjél ke* i boñ mam ma nlémél we* i kel sabat inyule i yé hilo hiem hipubhaga,+
ibale u ntehe ki sabat kiki jam li maséé, hilo hipubhaga hi Yéhôva, u tinak hio lipém,+
ibale u nti hio lipém iloole u ke i yéñ yéñe yoñ, tole u kahal pot bipopoda,
14 ha nyen me Yéhôva, me ga boñ le u kon maséé ngandak,
me ga boñ le u luk bihosi gwoñ i bahoma ba nyôgi ba hisi.+