Yôsua

24 Ha nyen Yôsua a bi kot matén momasôna ma Israel i Sikem, a sébél yak mimañ, baane, bakéés ni baéga+ ba litén; bobasôna ba telep i bisu bi bañga Nyambe. 2 Yôsua a kal litén jolisôna le: “Lana nyen Yéhôva, Nyambe nu Israel a nkal: ‘I ngéda kôba,+ basôgôlsôgôl+ banan, kiki Téra, isañ Abraham, ni isañ Nahor, ba bé yééne nyoo ii pes Lom,* ba gwéélak banyambe+ bape.

3 “‘I mbus ngéda, me bi nyodna sôgôlsôgôl nan le Abraham+ nu a bé yééne nyoo ii pes Lom,* me éga nye mu nkoñ u Kanaan wonsôna, me boñ ki le mbôda* yé i ba ngandak.+ Me ti nye Isak;+ 4 yak Isak, me ti nye Yakôb ni Ésau.+ I mbus ngéda, me ti Ésau hikôa Séir;+ ndi Yakôb ni bon bé ba sôs i Égiptô.+ 5 I mbus, me ep Môsi bo Arôn,+ me ep ki dimala i Égiptô;+ ha nyen me bi nyodna bé mu loñ i. 6 I ngéda me bi nyodna basañ banan i Égiptô,+ ba pam i tuye, bôt ba Égiptô ba bi noñ basañ banan lôñni bikak bi gwét ni bakilhosi letee ni i tuye Nkôibaga.+ 7 Basañ ba bôdôl lôndôl me, me Yéhôva,+ jon me bi bii jiibe ipôla bé ni bôt ba Égiptô, me lona ki tuye i ngii yap, a hô bo.+ Bébomede ni bi tehe ni mis manan i yom me bi boñ i Égiptô.+ I mbus hala, ni bi yééne i ñoñ ngandak nwii.*+

8 “‘Me bi kena bé i loñ i Lôk Amôr, ba ba bé yééne nyoo ii pes* i Yordan, ha nyen ba bi jôs bé gwét.+ Ndi me bi ti bo i moo manan inyu boñ le ni laa yoñ loñ yap, me tjé ki bo i ngéda ni bé jôp mu loñ.+ 9 Ha nyen Balak, man Zipôr, kiñe Môab a bi telep, a jôs bon ba Israel gwét. Jon a bi sébél Balam, man Béor, le a tiihe bé.+ 10 Ndi me bi gwés bé nôgôl Balam.+ Jon a bi sayap bé ngandak ngélé,+ me sôñ ki bé i woo+ wé.

11 “‘I mbus, ni bi yap Yordan,+ ni pam i Yérikô.+ Ha nyen baane* ba Yérikô, Lôk Amôr, Lôk Péris, Lôk Kanaan, Lôk Hét, Lôk Girgas, Lôk Hivi ni Lôk Yébus ba bi jôs bé gwét; ndi me bi ti bo i moo+ manan. 12 Jon bé ngi to pam nyoo, me bi boñ le ba nimis makénd map,* hala a boñ ki le ba kee ngwéé i bisu binan;+ i jam li jon li bi pémél yak bikiñe biba bi Lôk Amôr. To pansoñ yoñ, to mpihlôñgô+ woñ bé gwon bi bi boñ i jam li. 13 Hala nyen me bi ti bé loñ, i ni bi son bé njonok i bana, me ti ki bé bitison bi ni bi oñ bé,+ ndi ni yééne mu. Ni yé ki i je matam ma nwom mi minkôô mi wai, ni matam ma nwom mi ôlivé mi ni bi bel bé.’+

14 “Jon kona Yéhôva woñi, gwéélana ki nye ni ñem nan wonsôna* lôñni ñem maliga,*+ ni héya ki banyambe basôgôlsôgôl banan ba bi gwélél nyoo ii pes Lom* ni i Égiptô,+ ndi ni gwélél Yéhôva. 15 Ndi ibale ni ntehe le hala a yé béba i gwélél Yéhôva, wee bébomede ni pohol i len ini njee n’a gwélél,+ too banyambe basôgôlsôgôl banan ba bi gwélél nyoo ii pes Lom,*+ too banyambe Lôk Amôr ba ngwélél munu loñ i het ni nyééne.+ Ndi inyu yem ni lihaa jem, di ga gwélél Yéhôva.”

16 Ha nyen litén li bi timbhe le: “Bés di ta bé to le di hoñol i tjôô Yéhôva inyu gwélél banyambe bape. 17 Yéhôva Nyambe wés nyen a bi nyodna bés ni basañ bés i Égiptô,+ nyoo loñ i het di bé minkol,+ a boñ ki mam ma hélha mana bésbomede di tehge ni mis+ més, a sôñ yak bés mu njel di bé kil, le di kwo bañ i moo ma matén momasôna ma nyééne mu minkoñ di bi tagbene.+ 18 Yéhôva a bi luhul matén momasôna ma bi bôk ma yééne munu loñ ini, yak Lôk Amôr. Inyu hala nyen yak bés di ga gwélél Yéhôva, inyule nyen a yé Nyambe wés.”

19 Ha nyen Yôsua a bi kal litén le: “Ni nla bé gwélél Yéhôva, inyule a yé Nyambe numpubi;+ a yé Nyambe nu a mbat le ba bégés ndik nyetama.+ A ga nwéhél bé maboñok manan mabe,* to bibéba+ binan. 20 Ibale ni ntjôô Yéhôva inyu gwélél bakén ba banyambe, yak nye a ga kôm bé mbus, a tjé ki bé, to hala kiki a bi bôk a boñ bé loñge.”+

21 Ndi litén li timbhe Yôsua le: “To, d’a gwélél+ ndik Yéhôva!” 22 Jon Yôsua a bi kal litén le: “Ni yé mbôgi le bébomede bon ni mpohol le ni ngwélél Yéhôva.”+ Ha nyen ba bi timbhe le: “Di yé mbôgi.”

23 Yôsua a kal bo le: “Jon héyana bakén ba banyambe ba ba yé i bééni, ndi ni téñbe i gwélél Yéhôva, Nyambe nu Israel ni ñem nan wonsôna.” 24 Litén li kal Yôsua le: “Di ga gwélél Yéhôva Nyambe wés, nye ki nyen di ga nôgôl!”

25 Jon i kel i, Yôsua a bi boñ malômbla ni litén i Sikem, a téé i litiñ li, a yoñ ki i makidik ma. 26 I mbus, Yôsua a tila i bibañga bini i kaat mbén Nyambe,+ a yoñ soso ngok,+ a téé yo isi e ikeñi i i bé bebee ni homa mpubhaga nu Yéhôva.

27 Yôsua a kônde kal litén jolisôna le: “Nuna-ki! I ngok ini i ga ba mbôgi yés,+ inyule i nok mam momasôna Yéhôva a nkal bés. I ga ba ki mbôgi nan, inyu boñ le ni tañba bañ Nyambe nan.” 28 I mbus hala, Yôsua a huuha litén, hiki mut a témb i nkoñ ba bi ti nye kiki ngababum.+

29 Kiki i mam mana ma ntagbe, Yôsua, man Nun, ngwélél Yéhôva, a wo, a ban-ga 110 nwii.+ 30 Ha nyen ba bi jô nye i nkoñ u u bé ngababum yé, i Timnat-Séra,+ nyoo i mbok dikôa i Éfraim, i pes ñombok i hikôa Gaas. 31 Bon ba Israel ba bi ke ni bisu i gwélél Yéhôva mu dilo di Yôsua tjodisôna ni mu dilo di mimañ mi litén, mi mi bi niñ i mbus nyemb Yôsua. I mimañ mi litén mi, mi bi tehe i mam momasôna Yéhôva a bi boñ inyu litén li Israel.+

32 Bon ba Israel ba yoñ bihés bi Yôsep,+ bi ba bi nyodna i Égiptô, ba jô gwo i Sikem, mu wom Yakôb a bi somb 100 batjañtjañ ba silba+ yak bon ba Hamor,+ isañ Sikem; i hisi hi, hi bi yila ngababum i bon ba Yôsep.+

33 Yak Éléazar, man Arôn, a wo.+ Ba jô nye i hikôa hi man wé Finéhas,+ nyoo i hikôa ba bi ti Finéhas mu mbok dikôa i Éfraim.