115 Di kôli bé ni lipém,+ a Yéhôva, di kôli bé ni jo,
ndi jôl joñ jon li kôli ni lipém,
inyu loñge yoñ ñem ni libak joñ li maliga.+
2 Inyuki biloñ bi yé le bi kal le:
“Nyambe wap a yé hee?”+
3 Nyambe wés a yé nyoo i ngii;
a mboñ kii yosôna i nlémél nye.
4 Bisat gwap bi yé silba ni gôl,
nson moo u bôt ba binam.+
5 Bi gwé manyo, ndi bi mpot bé;+
bi gwé mis, ndi bi tehna bé;
6 bi gwé maôô, ndi bi noga bé;
bi gwé môl, ndi bi nok bé njiñ;
7 bi gwé moo, ndi bi nla bé tihba to yom;
bi gwé makôô, ndi bi nke bé;+
bi mpémés bé kiñ mu ngodol+ yap.
8 I bôt ba mbañ bisat b’a yila kiki gwo,+
nlélém ni bôt ba ba mbôdôl gwo ñem.+
9 A Israel, bôdôl Yéhôva ñem,+
inyule a yé nhôla woñ ni ben+ yoñ.
10 A ndap Arôn,+ bôdlana Yéhôva ñem,
inyule a yé nhôla nan ni ben nan.
11 A bé ba ni nkon Yéhôva woñi, bôdlana Yéhôva ñem,+
inyule a yé nhôla nan ni ben+ nan.
12 Yéhôva a mbigda bés, a’ sayap ki bés;
a’ sayap ndap Israel;+
a’ sayap ndap Arôn.
13 Yéhôva a’ sayap i bôt ba nkon nye woñi,
batitigi ni bakeñi.
14 Yéhôva a’ boñ le ni bôl,
bé ni bon banan.+
15 Yéhôva a sayap+ bé,
nu a yé Nhek ngii ni ’isi.+
16 Ngii i yé i Yéhôva,+
ndi hisi, a bi ti hio bon ba bôt.+
17 Bawoga ba mbégés bé Yéhôva,+
to mut nye ki nye nu a nsôs i soñ.+
18 Ndi bés d’a bégés Yéhôva,
ibôdôl nano letee ni i boga ni boga.
Béghana Yéhôva!