Masoola Yôhanes a bi kôhna
18 I mbus hala, me tehe añgel ipe i nlôl i ngii, i ban-ga kunde ikeñi, i sôhôk ’isi, lipém jé li boñok le hisi hi bai. 2 I lond ni kiñ ikeñi, i kal le: “A mal kwo, Babilôn Nunkeñi a mal kwo,+ a nyila liyééne li mimbuu mimbe, ni lisolbene li hiki mbuu u nyega,* ni hiki hinuni hi mahindi ni hi bôt ba ñoo!+ 3 Inyule biloñ gwobisôna bi nhiôô wai i ngôñ yé ikeñi* i malal ma nyega,*+ bikiñe bi hisi bi bi boñ malal ma nyega lôñni nye,+ yak bôt ba nyuñga* ba hisi ba kwo ngwañ ni njel ngandak yé nkus i i nloo hihéga.”
4 Me nok ki kiñ ipe i nlôl i ngii i nkal le: “A bôt bem,+ pama i nyeni, ibale ni nsômbôl bé yoñ ngaba lôñni nye ikété bibéba gwé, ni ibale ni nsômbôl bé kôhna ngaba mu dimala tjé.+ 5 Inyule nwind u bibéba gwé u mpam letee ni i ngii,+ yak Nyambe a mbigda maboñok mé ma ngitelepsép.*+ 6 Boña nye kiki a bi boñ bôt bape,+ ñ, kiki a bi boñ,+ boña nye hala ngélé iba; ikété libôndô+ a bé kôôba yom i nyo, mu nyen kôôbana nye yom i nyo ngélé iba.+ 7 A bi lôôha ti nyemede lipém, a niñik ki ikété ngandak yé lingwañ; ni nôgha nye njôghe, ni ééha ki nye nlélém hala. Inyule a ngi kalak ikété yé ñem le: ‘Me yii kiki kiñemuda, me ta bé yik muda, m’a kôhna bé to maéya.’+ 8 Inyu hala nyen dimala tjé di ga lo i mpom kel wada: nyemb, ni maéya, ni njal, yak nyensôna a ga lighana ni hié,+ inyule Yéhôva* Nyambe, nu a bi kéés nye, a gwé ngui.+
9 “Bikiñe bi hisi bi bi boñ malal ma nyega* lôñni nye, bi niñ ki lôñni nye ikété ngandak yé lingwañ, bi ga tumbba ni ndutu inyu yé i ngéda bi ga tehe hiida hi hié hi nligis nye. 10 Bi ga telep haa inyule njiiha yé i nkônha bo woñi, bi kalak le: ‘Weeke, kinje béba jam! Weeke, kinje béba jam! A Babilôn, we tison ikeñi ni tison i ngui,+ inyule mbagi yoñ nôgôs i nyoñ ndigi ngeñ yada inyu kwo!’
11 “Yak bôt ba nyuñga ba hisi ba nlond, ba eek inyu yé, inyule mut a nsomb gwom gwap bi nyuñga gwobisôna a ta ha bé, 12 gwom gwobisôna bi gôl, bi silba, tik ngok, perl, biloñge bi mabadô, mabadô ma wedewede,* mabadô ma siliki,* ni ma ma nkôyôp tjôôm; hiki yom i yé mbañak ni kék i numb loñge; mintén mi gwom nwominsôna mi mi yé mbañak ni mañ mi njok, ni tik bikék, ni mamuna, ni bikei,* ni mimpuma; 13 yak hiomi, ni kule i India, ni binjinjiñ, ni labinda, ni nunumba, ni wai, ni môô ma ôlivé, ni flawa ilam, ni blé, ni nyaga, ni mintômba, ni bihosi, ni bikak, ni minkol, ni biniñ* bi bôt. 14 Ñ, biloñge bi gwom* bi bi bé kon we* ngôñ bi nke we haa, yak tik gwom yosôna ni gwom bilam gwobisôna bi nhéñél we, bi ga nene ha bé kekikel.
15 “I bôt ba nyuñga ba bé nuñul i gwom bini, ba ba bi kwo mingwañ ni njel yé, ba ga telep haa inyule njiiha yé i ga kônha bo woñi, ba ga lond, b’a ee ki, 16 ba kalak le: ‘Weeke, kinje béba jam! Weeke, kinje béba jam! A tison ikeñi, we nu u bak u hééba loñge libadô ni mbot wedewede, ni i i nkôyôp tjôôm, u eñgbak ki ngandak gwom bi gôl, ni tik ngok, ni perl,+ 17 inyule hala a nyoñ ndik ngeñ yada inyu tjé i ngandak lingwañ ini!’
“Yak hiki nkena sitima, ni hiki mut a nkil i tuye, ni baluk sitima, lôñni bôt bobasôna ba nkuhul koga kel i bôlô tuye, ba bi telep haa, 18 ba lond i ngéda ba bé béñge hiida hi hié hi hi bi ligis nye, ba kal le: ‘Imbe tison i yé kiki tison ikeñi ini?’ 19 Ba nkôp lipum li biték i ngii miño nwap, ba lond, ba bégél, ba ee, ba kalak le: ‘Weeke, kinje béba jam! Weeke, kinje béba jam inyu tison ikeñi ini! Ni njel nkus wé nyen i bôt bobasôna ba bééna bisitima i tuye ba bi kwo ngwañ, inyule hala a nyoñ ndik ngeñ yada le i tjiba!’+
20 “A ngii,+ kon maséé inyu jam li mpémél nye, yak bé bapubhaga+ ni baôma lôñni bapôdôl, inyule inyu nan nyen Nyambe a mpémhene nye mbagi nôgôs!”+
21 Mpémba añgel wada u bi pa ngok, i i bé kiki soso ngok kôgôl, u leñ yo ikété tuye, u kal le: “Hala nyen tison ikeñi le Babilôn y’a kwo tjungum, y’a nene ha bé ki kekikel.+ 22 Kiñ i bôt ba ntôp tjémbi ba kôdôk hiluñ, ni i bakôt nsik, ni i bahem hikos, ni i bahem sép y’a nôga ha bé kekikel i weeni. To ñôô gwom nye ki nye nu a mboñ to umbe ntén bôlô a’ nene ha bé i weeni, to liyôgbe li ngok kôgôl li ga nôga ha bé i weeni kekikel. 23 Mapubi ma lambe yo ki yo m’a bai ha bé i weeni kekikel, to kiñ i mbiimuda lôñni sombo y’a nôga ha bé i weeni kekikel, inyule bôt boñ ba nyuñga bon ba bé bañga bôt ba nkoñ ’isi; u bi yumus ki biloñ gwobisôna ni njel makañ* moñ.+ 24 Ñ, i nyeni nyen ba bi léba matjél ma bapôdôl ni ma bapubhaga,+ ni ma bôt bobasôna ba bi nôla hana ’isi.”+