Yérémia
25 Nyambe a bi pôdôs Yérémia inyu litén li Yuda jolisôna i nwii mi nyônôs mina mi ane i Yéhôyakim+ man Yôsia, kiñe Yuda; hala wee i nwii u bisu u ane i Nébukadnézar,* kiñe Babilôn. 2 I bibañga bini gwon Yérémia a bi pot inyu* litén li Yuda jolisôna ni bôt bobasôna ba ba nyééne i Yérusalem:
3 “Ibôdôl i nwii mi nyônôs 13 mi ane i Yôsia+ man Amôn, kiñe Yuda, letee ni i len ini, hala a mboñ 23 nwii le Yéhôva a mpôdôs me. Yak me, me mpôdôs bé, me tiimbaga,* ndi ni ñemble bé.+ 4 Yéhôva a bi ômle bé bagwélél bé bobasôna le bapôdôl, a omok bo, a tiimbaga,* ndi ni bi emble bé, ni bi sédi bé to maôô le ni nok.+ 5 Ba bé kal le: ‘Soho, hiki wada nan a kôm béba mbus, a waa boñ mam mabe;+ inyu boñ le ni nom munu loñ Yéhôva a bi ti bé lôñni basôgôlsôgôl banan ibôdôl kôba. 6 Ni noñ bañ banyambe bape, ni bégés bañ bo, ni ôôp bañ i bisu gwap, ni unbaha bañ to me ni bisat binan; tiga le me boñ le bikuu bi kwél bé.’
7 “‘Ndi ni bi emble bé me,’ hala nyen Yéhôva a mpot. ‘Ni bi unbaha me ni bisat ni bi bañ, jon bikuu bi bi kwél bé.’+
8 “Jon Yéhôva nu mintôñ mi gwét a nkal le: ‘“Kiki ni ntjél nôgôl bibañga gwem, 9 me yé i sébél matén ma ñombok+ momasôna,” hala nyen Yéhôva a mpot, “me yé i sébél Nébukadnézar,* kiñe Babilôn, ngwélél wem;+ m’a lona bo inyu jôs i loñ+ ini ni bôt ba nyééne mu, ni biloñ gwobisôna bi nkéña yo.+ M’a tjé gwo, me yilha gwo yom bilim, ni yom mandegle,* bi ga tjiba i boga ni boga. 10 M’a mélés maséé ni diléla i boni,+ kiñ i munlôm nu a mbii muda ni i muda nu a nke libii,+ liyôgbe li ngok kôgôl ni mapubi ma lambe. 11 I loñ ini yosôna i ga tjiba, i yila yom bilim. Yak i biloñ bini bi ga gwélél kiñe Babilôn 70 ma nwii.”’+
12 “‘I mbus 70 ma nwii,+ m’a kéés kiñe Babilôn ni i loñ ini inyu hihôha hiap,’+ hala nyen Yéhôva a mpot, ‘me ga yilha loñ i bôt ba Kaldéa hôlô i boga ni boga.+ 13 M’a yônôs i mam momasôna me bi pot le me ga boñ inyu kogse i loñ ini, ni mam momasôna Yérémia a bi pot inyu biloñ gwobisôna, hala wee i mam momasôna ma yé ntilga munu kaat ini. 14 Inyule ngandak biloñ ni bikiñe bikeñi+ bi ga yilha bo+ minkol ndi m’a kogse bo i nya i kôli inyu maboñok map ni minson mi moo map.’”+
15 Inyule Yéhôva Nyambe nu Israel a nkal me le: “Yoñ libôndô lini li gwé wai i hiun hiem i woo wem, u nyus yo biloñ gwobisôna i het me ga om we. 16 Bi ga nyo, bi kahal ndiñg, bi boñok kiki bôt ba njék; inyule me yé i om pansoñ i boni.”+
17 Ha nyen me bi yoñ libôndô i woo u Yéhôva, me nyus biloñ gwobisôna i het Yéhôva a bi om me:+ 18 me bi bôdôl ni Yérusalem ni bitison bi Yuda,+ bikiñe gwé ni baane bé, inyu tjé bo, inyu yilha bo yom bilim, yom bôt ba nhimil hiôa, ni yom i i yé ntiihege,+ kiki hala a yé i bôña i len ini. 19 I mbus, me nyus Faraô, kiñe Égiptô ni bagwélél bé, baane ba loñ yé, ni bôt ba loñ yé bobasôna,+ 20 yak ni bakén ba bôt ba niñ i loñ yap; me bi nyus ki bikiñe bi loñ Us; bikiñe gwobisôna bi loñ Filistia,+ Askélôn,+ Gasa, Ékrôn, ni bôt ba Asdôd ba ba bi yégle; 21 Édôm,+ Môab,+ bon ba Lôk Amôn;+ 22 bikiñe gwobisôna bi Tir, bikiñe gwobisôna bi Sidôn,+ ni bikiñe bi ôn i i yé i tuye; 23 Dédan,+ Téma, Buz, ni bôt bobasôna ba nhomb tjôñ i mapañ ma ño;+ 24 bikiñe gwobisôna bi bôt ba Arabia,+ ni bikiñe gwobisôna bi matén ma ma nyééne i ñoñ; 25 bikiñe gwobisôna bi Zimri, bikiñe gwobisôna bi Élam,+ bikiñe gwobisôna bi bôt ba Média;+ 26 bikiñe gwobisôna bi ñombok, bi bi yé haa ni bi bi yé bebee, yada ni yada; ni biane bipe bi nkoñ ’isi gwobisôna; kiñe Sésak*+ yon i ga sôk nyo.
27 “U nlama kal bo le: ‘Haana nyen Yéhôva nu mintôñ mi gwét, Nyambe nu Israel a nkal: “Nyona, ni hiôô, ni lo bilôô, ni kwoo kayéle ni nla ha bé telep,+ inyule me yé i om pansoñ i bééni.”’ 28 Ndi ibale ba ntjél yoñ libôndô i woo woñ inyu nyo, kal bo le: ‘Haana nyen Yéhôva nu mintôñ mi gwét a nkal: “Nyona yo! 29 Ibale me mbôk ndugi me lona bikuu i tison i i bééga jôl jem,+ baa bé ni nhoñol le ni ga pei kogse?”’+
“‘Ni nla bé pei kogse, inyule me yé i lona pansoñ i nol bôt bobasôna ba nyééne i nkoñ ’isi,’ hala nyen Yéhôva nu mintôñ mi gwét a mpot.
30 “U nlama añle bo i bibañga bini gwobisôna, u kal ki bo le:
‘Yéhôva a ga kônd i ngii;
nyoo liyééne jé lipubi, a ga boñ le kiñ yé i nôga.
A ga kônd ni ngui inyu kogse liyééne jé hana ’isi.
A ga leñ diléla kiki bôt ba ba ntjo matam ma nkôô wai i waa wai,
a ga tôp hiémbi ni makénd inyule a nyémbél bôt bobasôna ba nyééne hana ’isi.’
31 ‘Liyôgbe li ga pam letee ni i makas ma ’isi,
inyule Yéhôva a gwé hop ni biloñ.
A ga pémhene bôt ba binam bobasôna* mbagi.+
A ga nol bibéba bi bôt ni pansoñ,’ hala nyen Yéhôva a mpot.
32 Yéhôva nu mintôñ mi gwét a nkal le:
‘Nuna-ki! Bikuu bi mba bi nyodi i loñ yada, bi tagbe i loñ ipe,+
mbuk mbebi nkeñi a ga bôdôl i bipes bi hisi bi bi yé haa, a yé i njel.+
33 “‘I bôt Yéhôva a ga nol i kel i, ba ga ba ibôdôl i likas li ’isi jada letee ni i likas li hisi lipe. Ba ga ee bé bo, ba ga kot bé mim nwap, ba ga jô bé to nwo. Mi ga yila kiki binan hana ’isi.’
34 Béglana, a batééda mintômba, londa!
Béñbana ’isi, a mimpémba mi bôt ba litén,
inyule ngéda i nkola le ni wo, ba sand ki bé homa nyensôna,
ni ga kwo, ni bôô kiki hibee hi biték hi hi nhee diye!
35 Batééda mintômba ba gwé bé homa ba nla kil ngwéé,
mimpémba mi bôt ba litén mi gwé bé homa mi nla solbene.
36 Emblana ki! Minlondok mi batééda mintômba
ni maéya ma mimpémba mi bôt ba litén,
inyule Yéhôva a ntjé bahoma ba njés bémba yap.
37 Yom yo ki yo i ta ha bé i homa di bé yééne ikété nsañ
inyule Yéhôva a ñunup.