Minson mi baôma
24 I mbus dilo ditan, prisi keñi le Anania+ a sôs i Kaisaréa ni mimañ mi litén, lôñni loya* yada le Tertilô. Ba ke yak ngomin i pes mbok inyu hop wap ba bééna ni Paul.+ 2 Kiki ba nsébél Tertilô, a bôdôl ôm Paul nsohi, a kalak le:
“Kiki ni njel yoñ nyen di gwé bañga nsañ, ni le ni njel pék yoñ nyen mahéñha ma yé i bôña munu loñ ini, 3 a ngomin ikeñi le Félix, di nti we mayéga iloo hihéga ngéda yosôna ni homa nyensôna inyu mam mana momasôna. 4 Ndi inyu boñ le me lôôs bañ we ngéda, me nsoohe we ikété loñge yoñ ñem le u emble bés inyu ndék ngéda. 5 Inyule di nléba le i mut nunu a yé mut yubda,*+ a ntinde+ ki Lôk Yuda yosôna i nkoñ ’isi wonsôna i kolba ngomin; nye ki nyen a yé nkena ntôñ mbagla u bôt ba Nasaret.+ 6 A bi noode yak hindis témpel, inyu hala nyen di bi gwel nye.+ 7* —— 8 I ngéda wemede w’a bat nye mambadga, w’a léba le i minsohi nwominsôna di yé i ôm nye mi yé maliga.”
9 Yak Lôk Yuda i bi adba lôñni bo inyu soman nye, i kalak le i mam mana ma yé maliga. 10 Kiki ngomin i pes mbok a nyis nye le a nla yoñ hop, Paul a timbhe le:
“Me nyi loñge le hala a yé ngandak nwii nano le u yé nkéés munu loñ ini, jon me nkon maséé i lona hop wem i bisu gwoñ.+ 11 Hala a ntagbege bé 12 dilo le me bi bet i Yérusalem inyu bégés Nyambe, wemede u nla bat ibale u ngwés yi too maliga ma;+ 12 ba bi koba bé le me yé i nomol ni mut nye ki nye i témpel, to tinde limut i lona yubda i mandap ma bibégés tole i tison. 13 To nano, ba nla bé unda le minsohi ba ñôm me mi yé maliga. 14 Ndi me neebe i bisu gwoñ le me niñ inoñnaga ni njel ba yé i sébél le “ntôñ mbagla,”* hala nyen me mbégés Nyambe nu basôgôlsôgôl bem,+ me nhémle ki i mam ma yé ntilga ikété mbén Môsi ni ikété bikaat bi Bapôdôl.+ 15 Me mbôdôl Nyambe ñem, botñem le yak i bôt bana ba gwé, le bitugne+ bi ga ba inyu bôt ba téé sép ni inyu bôt ba téé bé sép.+ 16 Inyu hala nyen me mboñ biliya hiki ngéda i tééda kiññem i mpôp* i bisu bi Nyambe ni bi bôt ba binam.+ 17 I mbus jôga li nwii, me bi lona makébla inyu diyeyeba*+ di litén jem, me lo ki inyu ti bisesema. 18 Kiki me bé boñ i mam mana, ba koba le me mal pubus memede i témpel+ inoñnaga ni mbén Môsi, ndi me bé bé lôñni limut, me bé boñ bé to yubda. Ndi Lôk Yuda ihogi i i nlôl i pes mbok Asia, 19 yon i lamga ba hana i bisu gwoñ inyu soman me ibale ba gwé toi ngim nsohi ba nla ôm me.+ 20 Tole i bôt bana ba yé hana, bomede ba kal imbe béba jam ba nléba le me mboñ i ngéda ba bak ba nkéés me i bisu bi Ntôñ bakéés bakeñi, 21 handugi i jam lini jotama le me bi lond i ngéda me bé me téé i ñemkété wap le: ‘Inyu bitugne bi bawoga nyen ba yé i kéés me i len ini i bisu bi nan!’”+
22 Ndi kiki Félix a bé yi yaga i mam ma nkéla inyu Njel ini,+ a bat bo le ba loo lisañ lipe, a kal le: “I ngéda ñane hikôô hi bisônda le Lisia a’ sôs, m’a yoñ makidik inyu hop nan.” 23 I mbus, a ti ñane mbôgôl bisônda oda le ba tééda Paul i mok, ndi ba ti nye ndék kunde, ba nwas ki le mawanda mé ma ti nye mam ma mbéda nye.
24 Ndék dilo i mbus ha, Félix a lo bo nwaa wé Drusila, nu a bé ngond Lôk Yuda; a sébél Paul, a emble nye a ntoñol kii i hémle Yésu Kristô i nkobla.+ 25 Ndi kiki Paul a mbôdôl pot inyu telepsép, hôtnyuu, ni mbagi i i nlo,+ Félix a kon woñi, a kal le: “Inyu nano, kenek ndugi; ndi i ngéda pôla y’a nene, m’a témb me sébél we.” 26 Kiki a bé bot ñem le Paul a’ ti nye moni, inyu hala nyen a bé béna sébél nye inyu kwel lôñni nye. 27 Ndi i mbus nwii ima, Porkiô Festô a yoñ tel i Félix; kiki Félix a bééna ngôñ i lémél Lôk Yuda,+ a nwas Paul i mok.