Yôsua

1 I mbus nyemb i ngwélél Yéhôva le Môsi, Yéhôva a pôdôs Yôsua*+ man Nun, nu a bé nhôla+ Môsi, a kal nye le: 2 “Ngwélél wem le Môsi a nwo.+ Nano ni, yap Yordan, we ni i litén lini jolisôna, u jôp ki mu loñ me nti bon ba Israel.+ 3 M’a ti bé hiki homa ni ga téé kôô, kiki me bi bôn Môsi.+ 4 Nkoñ nan u ga bôdle i ñoñ, u kenek i Libañ letee ni i lom nkeñi le Ufraté, ñ, yak loñ yosôna i Lôk Hét,+ ikepam i Tuye Nkeñi* i pes hiôñg.*+ 5 Mut to wada a ga la bé yémbél we mu dilo tjodisôna di niñ+ yoñ. Nlélém kiki me bé ni Môsi, hala ki nyen m’a ba ni we.+ M’a yôi bé we, to tjôô we.+ 6 Bana ñem ngui, u lédés+ ki, inyule we nyen u ga boñ le i litén lini li kôdôl loñ me bi kum soñ le m’a ti basôgôlsôgôl bap.+

7 “Ñ, bana ñem ngui, u lédés yaga, u tibil ki tééda Mbén yosôna ngwélél wem Môsi a bi ti we. U yék bañ yo le u kee i pes walôm tole i pes waé,+ le ndi u boñ mam ni pék to hee homa u ga ke.+ 8 U waa bañ pot+ i mam ma yé ntilga munu kaat Mbén ini,* u nlama añ yo ni kiñ si* juu ni njamuha, inyu boñ le u tibil nôgôl i mam momasôna ma yé ntilga mu;+ ha nyen mam moñ m’a ke loñge, u ga boñ ki mam ni pék.+ 9 Baa me bé nyen me nti we i oda ini? Bana ñem ngui, u lédés ki. U sehla bañ, u kon bañ to woñi, inyule Yéhôva Nyambe woñ a yé ni we to hee homa u ga ke.”+

10 Ha nyen Yôsua a bi ti baane ba litén oda le: 11 “Tagbana mu homa litén li nyééne, ni ti bo i oda ini: ‘Kôôbana bijek, inyule i mbus dilo daa, ni ga yap i Yordan nunu, le ni jôp, ni yoñ ki i loñ Yéhôva Nyambe nan a nti bé.’”+

12 Yôsua a pôdôs ki Lôk Ruben, Lôk Gad ni pes litén i Manasé, a kal bo le: 13 “Ni bigda i oda ini ngwélél Yéhôva le Môsi a bi ti bé:+ ‘Yéhôva a yé i ti bé noi, a nti ki bé i loñ ini. 14 Baa banan ni bon banan ba ga yégle,* yak bémba nan i ga yégle munu loñ Môsi a bi ti bé nyono ini pes* i Yordan;+ ndi bébobasôna ba ni yé mimpémba mi bôt ba gwét,+ ni ga yap i bisu bi lôkisoñ nan, ni bak ntjegek kiki mintôñ mi gwét. Ni nlama hôla lôkisoñ+ nan 15 letee Yéhôva a ti bo noi nlélém kiki a bi ti bé yo, letee yak bo ba yoñ nkoñ u Yéhôva Nyambe a nti bo. Ha nyen ni ga témb mu nkoñ ni bi kôhna, ni yén ki mu; mu nkoñ Môsi, ngwélél Yéhôva, a bi ti bé i pes likôl i Yordan.’”+

16 Ba timbhe Yôsua le: “Di ga boñ i mam momasôna u nkal bés, di ga ke ki to hee homa u ga om+ bés. 17 Nlélém kiki di bi nôgôl Môsi mu mam momasôna a bi kal, hala nyen di ga nôgôl yak we. Yéhôva Nyambe woñ a ba ni we, nlélém kiki a bé ni Môsi.+ 18 Nu ni nu a ga kolba oda yoñ, a tjél ki nôgôl to imbe mbén u nti nye, a nlama nôla.+ Ndi we, bana ñem ngui, u lédés ki.”+