29 I mut ba nti ngandak maéba ndi a nai ni ndok,+
tjiba yé y’a lo kunda yada, matibla ma mba ha bé.+
2 I ngéda bôt ba téé sép ba yé ngandak, litén li yé maséé;
ndi i ngéda béba mut yon i ñane, litén li ntjelel.+
3 Man nu a ngwés pék, a nkônha isañ maséé,+
ndi nu a noñ bôda ba libambe, a ñôbôs nkus wé.+
4 Ni telepsép nyen kiñe i ntéé mam i loñ,+
ndi i mut a nyoñ bitek a nkena yo i tjiba.
5 I mut a nlop mut wé libôk ni bipôdôl bilam,
wee a mbiine nye hiandi i makôô.+
6 Béba mut i ngwiya i hiandi hi béba yé,+
ndi mut a téé sép a nleñ diléla, a konok ki maséé.+
7 Mut a téé sép a nyoñ ngéda ni hop u diyeyeba,+
ndi béba mut i gwé bé jam mu.+
8 I bôt ba nkadba, ba nlona yubda i tison,+
ndi bôt ba pék ba nhôyôs hiun.+
9 I ngéda mut pék a mbôdôl pééna ni jôñ mut,
jôñ mut i mpot makeñi, i nolok, ndi mut pék a ga bana bé yéñe.+
10 Bôt ba nkôp matjél ba ñoo mut nu a yé nginsohi,+
ba nyéñ ki le ba nol bôt ba téé sép.
11 Jôñ mut i mpémés hiun hié hiosôna,+
ndi mut pék a nyén nwee, a gwel ki hio.+
12 I ngéda ñane a ñemble bitembee,
bagwélél bé bobasôna ba nyila bibéba bi bôt.+
13 Hiyeyeba hi mut ni ntét bôt ba gwé jam jada le:
Yéhôva nyen a mboñ le bo iba ba tehe mapubi.
14 I ngéda kiñe i nkéés diyeyeba lôñni telepsép,+
yééne yé ane i ga piñgla bé i boga ni boga.+
15 Hisôô ni maéba bi ntina pék,+
ndi mañge nu ba nwas le a boñok kiki a ngwés, a ga wéha nyañ nyuu.
16 I ngéda bibéba bi bôt bi mbôl, yak bibéba bi mam bi mbôl,
ndi bôt ba téé sép ba ga tehe bo kiki ba nkwo.+
17 Kodol man woñ, a ga boñ le u bana noi;
a ga kônha ki we maséé ngandak.+
18 I homa lipôdôl li Nyambe li ta bé, bôt ba mboñ kiki ba ngwés;+
ndi i bôt ba nôgôl mbén ba yé bokimasoda.+
19 Ngwélél a nwas bé le ba kodol nye ni bibañga,
inyule to a nok, a nôgôl bé.+
20 Baa u ma tehe mut a mpala yoñ hop?+
Botñem i yé inyu jôñ mut iloo inyu yé.+
21 Ibale ba mbop ngwélél ibôdôl nye mañge,
i mbus ngéda, a ga yi ha bé ti mayéga.
22 I mut a mpala unup a nlona mindañ;+
i mut njôô i mpala gwel, a ga boñ ngandak bibéba bi mam.+
23 Mut ngôk a ga kôhna wonyuu,+
ndi i mut a yé suhulnyuu a ga kôhna lipém.+
24 I mut a nkiha ni mut wip a ñoo nyemede.
Ba nsébél nye le a bok mbôgi, ndi a mpot bé.+
25 I kon bôt ba binam woñi i yé hiandi,+
ndi nu a mbôdôl Yéhôva ñem a ga pei.+
26 Ngandak bôt i nyéñ le ñane a leege bo,
ndi yak Yéhôva nyen mut binam a nkôhna mbagi i téé sép.+
27 Mut telepsép a ñoo mut a téé bé sép,+
yak béba mut i ñoo mut nu a nkil ikété telepsép.+