Sakaria
5 I ngéda me bi témb me pa mis, me tehe nhôôk kaat u u mpuue. 2 Añgel i bat me le: “Kii u yé i tehe?”
Me timbhe yo le: “Me yé i tehe nhôôk kaat u u mpuue, u ñap 20 ma dikéñéé di moo,* pôk yé i bak 10 li dikéñéé di moo.”
3 Ha nyen añgel i bi kal me le: “I nhôôk kaat unu u gwé ndiihe i i yé i tjama ni hisi hiosôna. Inyule bôt ba wip+ ba nkôhna bé kogse, ki le i yé ntilga mu mbus ilam i nhôôk kaat le wip u yé ntiihege; to bôt ba nkum soñ i bitembee+ ba nkôhna bé kogse, ki le i yé ntilga mu mbus ibe i nhôôk kaat le i kum soñ i bitembee i yé ntiihege. 4 Lana nyen Yéhôva nu mintôñ mi gwét a mpot: ‘Me mal ep i ndiihe ini, i ga jôp ikété ndap i mut wip ni ikété ndap i mut a nkum soñ i bitembee i jôl jem. Ndiihe i ga yén mu ndap i, i tjé yo, i tjé ki bikék gwé ni ngok yé.’”
5 I mbus, i añgel i bé kwel ni me, i tiige bebee, i kal me le: “Soho pa mis, beñge yom i yé i lo.”
6 Me bat yo le: “Kii i?”
Añgel i timbhe me le: “Sel éfa* yon i yé i lo.” Añgel i kal ki le: “Lana nyen bibéba bi bôt bi nkoñ ’isi wonsôna bi yé.” 7 Ha nyen me bi tehe ba mpa ngudul lipidô i i yé ngiiña, muda a bé a yii mukété sel. 8 Añgel i kal ni me le: “Jôl li muda nunu le Béba.” Ha nyen añgel i bi nyos muda ikété sel; i mbus, i yip sel ni ngudul lipidô i i nyét.
9 Me pa ki mis, me tehe bôda iba ba nlo; mbebi i bé pa bo. Ba bééna bipapai kiki bipapai bi nyodol lom. Ba pa sel ipôla ngii ni ’isi. 10 Ha nyen me bi bat i añgel i bé kwel ni me le: “Hee ba yé i kena sel?”
11 Añgel i timbhe me le: “Ba yé i kena sel i loñ Sinar.*+ Nyoo nyen ba ga ôñôl i muda nu ndap. I ngéda ba ga mal oñ ndap yé, ba ga suha nye i homa a nlama ba.”