Sakaria
6 Me bi pa ki mis, me tehe bikak bi gwét bina bi bi bé lôl ipôla dikôa diba; dikôa di bé ni mamuna. 2 Bikôyôp bi bihosi gwon bi bé ôt kak gwét i bisu, bihinda bi bihosi bi ôdôk kak gwét i nyônôs iba.+ 3 Bipuba bi bihosi gwon bi bé ôt kak gwét i nyônôs aa, bihosi bi bi gwé maton ni mabéé+ bi ôdôk kak gwét i nyônôs ina.
4 Me bat añgel i i bé kwel ni me le: “A Nwet wem, i bikak bi gwét bini bi yé kii?”
5 Añgel i timbhe me le: “Bi yé bihégél bi mbuu+ bina bi ngii, bi bi mpémél nyoo i homa bi bak bi téé i bisu bi Nwet nu hisi hiosôna.+ 6 I kak gwét bihinda bi bihosi bi ñôt, i nke i pes ñombok;+ bipuba bi bihosi bi nke nyoo uu ngwañ tuye, yak bihosi bi bi gwé maton ni mabéé bi nke i pes nwelmbok i loñ. 7 I bihosi bi gwé mabéé bi bé nyamnda ni ngôñ i pam, le bi kiiña inyu béñge hisi.” I mbus, añgel i kal le: “Ni kee, ni kiiña inyu béñge hisi.” Ha nyen bi bi ke, bi kahal kiiña inyu béñge hisi.
8 Añgel i sébél ki me, i kal me le: “Nun-ki, i bikak bi gwét bi nke i pes ñombok i loñ, bi mboñ le hiun* Yéhôva a gwééne pes ñombok i loñ hi sôs.”
9 Yéhôva a témb a pôdôs me, a kal le: 10 “I makébla bôt ba nlôl i minkôm ba bi ti, yôñôl mo yak Heldai, Tôbiya, ni Yédaya; i nlélém kel, kee i ndap Yôsia, man Sôfônia, we ni i bôt bana ba bi lôl nyoo minkôm i Babilôn. 11 U ga yoñ silba ni gôl, u boñ ntut, u ha wo mu ño u Yôsua,+ man prisi keñi le Yéhôsadak. 12 U kal ki nye le:
“‘Lana nyen Yéhôva nu mintôñ mi gwét a nkal: “I mut nunu nyen ba nsébél le Pom.+ A ga too i homa wé, a oñ ki témpel Yéhôva.+ 13 Nyen a ga oñ témpel Yéhôva, nye ki nyen a ga kôhna lipém. A ga yén mu yééne ane, a ane ki; a ga ba yak prisi mu yééne yé ane,+ a gwel ki i minson mi nwo ima loñge.* 14 Ntut* u ga yégle i témpel Yéhôva inyu bigda* Hélem, Tôbiya, Yédaya+ ni man Sôfônia le Hen. 15 I bôt ba yé haa ba ga lo inyu hôla maoñ ma témpel Yéhôva.” Ha nyen ni ga yi toi le Yéhôva nu mintôñ mi gwét nyen a ñep me i bééni. Ñ, i mam mana ma ga bôña ibale ni nôgôl toi kiñ Yéhôva Nyambe nan.’”