Lôk Lévi

14 Yéhôva a kônde pôdôs Môsi, a kal nye le: 2 “I mbén ini yon mut lô a nlama noñ i kel i ga kéla le a mpubhana, i ngéda ba ga kena nye yak prisi.+ 3 Prisi i ga pam i mbus liyééne li litén, i béñge nye: ibale lô yé i mal, 4 prisi i ga kal nye le, inyu pubhana,+ a lona dinuni dipubi diba, di bak yômi, ni kék sidar, ni bôñgô i i nkôyôp tjôôm, ni tjai di hisôp.* 5 Prisi i ga ti oda le ba nol hinuni hiada ikété hibee hi biték, hi hi gwé malép ba nyôñôl i lép.* 6 Ndi a nlama yoñ hinuni hi hi yé yômi, ni kék sidar, ni bôñgô i i nkôyôp tjôôm, ni tjai di hisôp, a yube gwobisôna ikété matjél ma hinuni hi nôla i ngii hibee hi biték, hi hi gwé malép ba nyôñôl i lép. 7 I mbus, a ga yoñ i matjél ma, a nwes mo ngélé isaambok i ngii mut a yé i pubhana inyu lô yé; ha nyen prisi i ga kal le a yé mpubhaga, a ga nwas ki hinuni hi hi ngi yii yômi le hi kee i bikai.+

8 “I mut a yé i pubhana a nlama jôwa mambot mé, a homb ño wé, a homb yak nyuu yé yosôna, a nogop ki ikété malép; ha nyen a ga ba mpubhaga. I mbus ha, a ga la jôp i homa litén li nyééne, ndi a ga jôp bé i ndap yé libadô inyu dilo disaambok. 9 I hilo hi nyônôs isaambok, a nlama homb tjôñ tjé di ño tjodisôna, ni liyéé jé, ni gwii gwé bi mis. I ngéda a ga mal homb tjôñ tjé tjodisôna, a ga jôwa mambot mé, a yoñ malép, a nogop; ha nyen a ga ba mpubhaga.

10 “I hilo hi nyônôs juem, a ga yoñ bon ba balôm ba mintômba iba ba ba gwé bé lem yo ki yo, ni ñin man ntômba+ nu a gwé bé lem yo ki yo, a bak a ngi yii mu nwii wé u bisu, a yoñ ki jam kiki bo kilô ina* i flawa ilam i i yé mbôôk ni môô, le bi ba likébla li bijek,+ ni hihéga hiada hi lôg* i môô.+ 11 I prisi i nkal le i mut nu a yé mpubhaga, yon i ga kena i mut a yé i pubhana ni i makébla mana i bisu bi Yéhôva, i lijubul li ndap libadô i likoda. 12 Prisi i ga yoñ man nlôm ntômba wada, a ti nye lôñni hihéga hiada hi lôg i môô kiki sesema inyu hô hihôha;+ a ga ndéñgés ki gwo le bi ba likébla ba ndéñgés i bisu bi Yéhôva.+ 13 I mbus, prisi i ga nol man nlôm ntômba i homa ba mbéna nôlôl+ sesema inyu béba ni sesema i ntul i hié, i homa wada mu homa mpubhaga, inyule kiki sesema inyu béba, yak sesema inyu hô hihôha i yé inyu prisi.+ I yé yom i nlôôha pubhaga.+

14 “Ha nyen prisi i ga yoñ ndék matjél mu sesema inyu hô hihôha, a ha mo i hipét hi ôô walôm u mut a yé i pubhana, a ha ki mo i nlôm hinoo nu woo wé walôm, ni i nlôm hinoo nu kôô wé walôm. 15 Prisi i ga yoñ ki ndék môô+ mu hihéga hiada hi lôg, a kôp mo mu libai li woo wé waé. 16 I mbus, prisi i ga tjak hinoo hié mu môô ma yé nye i libai li woo wé waé, a nwes ki ndék môô ni hinoo hié ngélé isaambok i bisu bi Yéhôva. 17 Prisi i ga yoñ ki ndék môô mu môô ma nyégle i libai jé li woo, a ha mo i hipét hi ôô walôm u mut a yé i pubhana, a ha ki mo i nlôm hinoo nu woo wé walôm, ni i nlôm hinoo nu kôô wé walôm, hala wee i bahoma a mbôk a ha matjél ma sesema inyu hô hihôha. 18 Prisi i ga yoñ i môô ma nyégle i libai jé li woo, a ha mo mu ño u mut a yé i pubhana; hala nyen prisi i ga boñ le ndi i mut nu a kôhna nwéhél* i bisu bi Yéhôva.+

19 “Prisi i ga ti sesema inyu béba,+ a bat ki nwéhél* inyu mut nu a yé i pubhana inyu nyega yé; i mbus ha, a ga nol sesema i ntul i hié. 20 Prisi i ga ti sesema i ntul i hié ni likébla li bijek+ mu juu li bisesema, a bat ki nwéhél inyu béba* i mut+ nu; ha nyen a ga ba mpubhaga.+

21 “Ibale i mut nu a nyep, a ban-ga bé gwom bi mbéda, a ga yoñ man nlôm ntômba kiki sesema inyu hô hihôha le a ba likébla li ba ndéñgés, le ndi nyemede a sañgla ni Nyambe; a ga lona gwo lôñni kilô yada ni jam* i flawa ilam i i yé mbôôk ni môô, le bi ba likébla li bijek, a lona ki hihéga hiada hi lôg i môô, 22 ni bakukuu iba tole bon ba dibeñ iba, inoñnaga ni i yom a gwé. Hibeñ hiada hi ga ba inyu sesema inyu béba, hii hipe hi bak inyu sesema i ntul i hié.+ 23 I hilo hi nyônôs juem,+ inyu boñ le a pubhana, a ga lona i gwom bini yak prisi i lijubul li ndap libadô i likoda i bisu bi Yéhôva.+

24 “Prisi i ga yoñ man nlôm ntômba nu sesema inyu hô hihôha,+ lôñni hihéga hiada hi lôg i môô; prisi i ga ndéñgés ki gwo le bi ba likébla ba ndéñgés i bisu bi Yéhôva.+ 25 I mbus, prisi i ga nol man nlôm ntômba nu sesema inyu hô hihôha, a ga yoñ ki ndék matjél ma sesema inyu hô hihôha, a ha mo i hipét hi ôô walôm u mut a yé i pubhana, a ha ki mo i nlôm hinoo nu woo wé walôm, ni i nlôm hinoo nu kôô wé walôm.+ 26 Prisi i ga kôp ndék môô mu libai li woo wé waé,+ 27 prisi i ga tjak ki hinoo hi woo wé walôm mu môô ma yé nye i libai li woo wé waé, a nwes ndék môô ni hinoo hi woo wé walôm ngélé isaambok i bisu bi Yéhôva. 28 Prisi i ga yoñ ki ndék môô mu môô ma yé i libai jé li woo, a ha mo i hipét hi ôô walôm u mut a yé i pubhana, a ha ki mo i nlôm hinoo nu woo wé walôm, ni i nlôm hinoo nu kôô wé walôm, hala wee i minlélém mi bahoma a mbôk a ha matjél ma sesema inyu hô hihôha. 29 I mbus, prisi i ga yoñ i môô ma nyégle i libai jé li woo, a ha mo mu ño u mut a yé i pubhana, le ndi i mut nu a kôhna nwéhél* i bisu bi Yéhôva.

30 “A ga lona bakukuu iba tole bon ba dibeñ iba, inoñnaga ni i yom a gwé;+ 31 mu dinuni a nla bana, hiada hi ga ba sesema inyu béba, hii hipe hi bak inyu sesema i ntul i hié+ lôñni likébla li bijek; hala nyen prisi i ga boñ le ndi i mut nu a yé i pubhana a kôhna nwéhél* i bisu bi Yéhôva.+

32 “I mut a bé kon lô, ndi a bana bé i gwom bi mbéda i hilo ba nkal le a mpubhana, i mbén ini yon a nlama noñ.”

33 Yéhôva a kal ki Môsi bo Arôn le: 34 “I ngéda ni ga jôp i loñ Kanaan,+ loñ me ga ti bé kiki ngababum,+ ndi me nwas le lô*+ i ba ikété ndap yada mu loñ nan, 35 nwet ndap a nlama ke yak prisi, a kal nye le: ‘Me ntehe yom mu ndap yem, i mpôna lô.’ 36 Ilole prisi i nke i béñge lô mukété ndap, a ga ti oda le ba pémés gwom bi ndap gwobisôna, tiga le a kal le gwom bi ndap gwobisôna bi yé nyega; i mbus nyen prisi i ga jôp i ndap inyu béñge yo. 37 A ga béñge i homa a gwé kon, ibale mabap ma ndap ma gwé mabéi ma ma yé maô-maô ni kwem-kwem, tole ma kôibak, ma nen-ge wengoñle ma mpidbe ikété libap, 38 ha nyen prisi i ga pam i ndap, a telep i lijubul li ndap, a kwés ki yo inyu dilo disaambok.+

39 “I hilo hi nyônôs isaambok, prisi i ga tiimba béñge ndap: ibale kon u nyandla mu mabap ma ndap, 40 prisi i ga ti oda le ba bôk ngok i gwé kon mu libap li ndap, ba pamna yo mu tison, ba leñ yo i homa a yé nyega. 41 I mbus, prisi i ga boñ le ba homb kété ndap yosôna. Ba ga yoñ biték bi litebel, ba pamna gwo mu tison, ba leñ gwo i homa a yé nyega. 42 Ba ga ha ngok ipe i homa ba nhéya ngok bisu, ha nyen a ga gwélél biték bi litebel bipe, a boñ le ba séñ gwo mu ndap.

43 “Ndi ibale kon u ntémb u lo, u nene mu ndap ki le ba mal héya ngok mu, ba homb yo, ba séñ ki yo, 44 ha nyen prisi i ga jôp mu ndap, i béñge ki yo: ibale kon u nyandla mukété ndap, wee béba lô*+ yon i yé mu ndap; i ndap ini i yé nyega. 45 A ga boñ ni le ba bôk ndap, hala wee ngok yé, bikék gwé, ni biték bi litebel gwobisôna; ba pamna gwo mu tison, ba leñ gwo i homa+ a yé nyega. 46 Ndi nu ni nu a ga jôp mu ndap i, ntel wonsôna prisi i nkwés+ yo, a ga ba nyega letee ni bikôkôa.+ 47 Nu ni nu ki a nañal mu ndap, a ga jôwa mambot mé; yak nu ni nu a ga jél mu ndap, a ga jôwa mambot mé.

48 “Ibale prisi i nke, ndi i tehe le kon u nyandla bé mu ndap ba ma mal séñ yo, prisi i ga kal le ndap i mpôp, inyule i kon u bak mu ndap u mal. 49 Inyu pubus ndap,* a ga yoñ dinuni diba, kék sidar, bôñgô i i nkôyôp tjôôm, ni tjai di hisôp.+ 50 Prisi i ga ti oda le ba nol hinuni hiada ikété hibee hi biték, hi hi gwé malép ba nyôñôl i lép.* 51 I mbus, a ga yoñ kék sidar, ni tjai di hisôp, ni bôñgô i i nkôyôp tjôôm, ni hinuni hi hi yé yômi, a yube gwo ikété matjél ma hinuni hi hi nôla, ni ikété malép ba nyôñôl i lép; ha nyen a ga nwes mo mu ndap ngélé isaambok.+ 52 Hala nyen a ga pubus ndap* ni matjél ma hinuni, ni malép ba nyôñôl i lép, ni hinuni hi hi yé yômi, ni kék sidar, ni tjai di hisôp, yak ni bôñgô i i nkôyôp tjôôm. 53 I mbus, a ga pamna hinuni hi hi ngi yii yômi mu tison, a nwas hio le hi kee i bikai. Hala nyen a ga héya nyega mukété* ndap, ha ngéda i nyen ndap i ga pôp.

54 “I mbén ini yon mut a nlama noñ inyu mintén mi lô nwominsôna, inyu lô i ño tole lô i jas,+ 55 inyu lô i mbot+ tole lô i ndap,+ 56 inyu mabibi, mbaage, tole mabéi,+ 57 inyu yi too yom i yé nyega tole i mpôp.+ I mbén i yon i yé inyu lô.”+