Kaat Matéô

13 I kel i, Yésu a bé a yii ipañ tuye, a ma nyodi i ndap. 2 Mamut makeñi ma kodba ipañ yé kayéle a bet i môñgô, a yén, mamut momasôna ma bé ma téé i ngwañ.+ 3 Ha nyen a bi gwélél dihéga+ inyu niiga bo ngandak mam, a kal le: “Nuna-ki, mut wada a bi pam inyu nwes mbôô.+ 4 Mu kiki a bé nwes mbôô, ihogi i kwo i nloñ, ndi dinuni di lo di je yosôna.+ 5 Ipe i kwo i bahoma ba ngok i het biték bi bé bé ngandak, i pala ki o inyule biték bi bé bé ndip.*+ 6 Ndi i ngéda hiañgaa hi bi pam, hi ligis yo inyule i bééna bé minkañ. 7 Ipe ki i kwo ipôla biloo, ndi biloo bi o, bi hô yo.+ 8 Ndi ipe i bi kwo i hisi hilam, i bôdôl num matam, ihogi i num matam 100 ngélé, ipe 60 ma ngélé, ipe ki 30.+ 9 Nu a gwé maôô, a emble.”+

10 Ha nyen banigil ba bi lo, ba bat nye le: “Inyuki u ngwélél dihéga inyu pôdôs bo?”+ 11 A timbhe bo le: “Bé bon i bi tina le ni nok mimb mimpubi+ mi Ane ngii, ndi hala a bi tina bé bo. 12 Inyule nu a gwé, b’a kônde ki nye le a bana ngandak; ndi nu a gwé bé, yak ndék a gwé, b’a yoñ yo.+ 13 Inyu hala nyen me ngwélél dihéga inyu pôdôs bo; inyule ba mbéñge, ndi i yé wengoñle ba mbéñge bé, ba ñemble, ndi i yé wengoñle ba ñemble bé, to nok ba ntibil bé nok.+ 14 Yak lipôdôl li Yésaya li yé yônôl bo, li li nkal le: ‘N’a emble yaga, ndi ni yé mbén i tibil nok; yak béñge n’a béñge yaga, ndi ni yé mbén i tehe.+ 15 Inyule miñem mi bôt bana mi nyila nledek, ba nloñ ki maôô map, ba nyip yak mis map kayéle ba yé mbén i tehe ni mis map, to nok ni maôô map, to tibil nok ndoñi ni miñem nwap, tiga le ba hielba le ndi me mélés makon map.’+

16 “Ndi maséé ma yé ni bé inyule mis manan ma ntehna, yak maôô manan ma noga.+ 17 Inyule me nkal bé maliga le, ngandak bapôdôl ni bôt ba téé sép ba bi bana ngôñ i tehe mam ni yé tehe, ndi ba bi tehe bé mo,+ yak emble mam ni yé emble, ndi ba bi emble bé mo.

18 “Nano emblana kii hihéga hi mut a bi nwes mbôô hi nkobla.+ 19 I ngéda mut a ñemble nwin u Ane, ndi a tibil bé nok kii u nkobla, mut mbe a nlo,+ a nup yom ba mbel ikété ñem wé; nyen a yé mbôô i bi kwo i nloñ.+ 20 Inyu mbôô i bi kwo i bahoma ba ngok, i yé mut nu a ñemble bañga, a neebe ki yo ngélé yada ni maséé.+ 21 Ndi kiki bañga i yé ngi o minkañ ikété ñem wé, a nom ndigi inyu ndék ngéda; ndi i ngeñ njiiha tole ndééñga i nlo inyule a ñemble bañga, a mpala baage. 22 Inyu mbôô i bi kwo ipôla biloo, i yé mut a ñemble bañga, ndi mandutu ma niñ munu nkoñ ’isi*+ ni ngui malôga i lingwañ bi nhô bañga kayéle i num bé matam.+ 23 Inyu mbôô i bi kwo i hisi hilam, i yé mut nu a ñemble bañga, a tibil ki nok yo, a num yaga ki matam, wada 100 ngélé, nuu numpe 60, nuu ki 30.”+

24 A yoñ ki hihéga hipe, a kal bo le: “Ane ngii i yé kiki mut nu a bi nwes loñge mbôô i wom wé. 25 I ngéda bôt ba bé ke ’ilo, ñoo wé a lo, a nwes mbôô i béba kai ipôla blé, a ke. 26 I ngéda blé i bi o, i num matam, ha nyen yak béba kai i bi nene. 27 Jon minkol mi nwet ndap mi bi lo, mi kal nye le: ‘A Nwet, baa loñge mbôô bé yon u bi nwes i wom woñ? Ndi béba kai i nlôl ni hee?’ 28 A kal bo le: ‘Mut nu a yé ñoo wem nyen a mboñ hala.’+ Minkol mi kal nye le: ‘Baa u nsômbôl ni le di kee, di nup yo?’ 29 A timbhe le: ‘To, tiga le i ngéda ni mba ni nup béba kai, ni nup yak blé ngi kôôba. 30 Nwaha gwo biba bi nañ letee ni i libumbul. I ngéda libumbul, m’a kal babumbul le: Ni bôk ndugi ni kot béba kai, ni kañ yo mimbom mimbom, ni ligis yo; i mbus, ni kot blé ikété ndugi yem.’”+

31 A yoñ ki hihéga hipe, a kal bo le: “Ane ngii i yé kiki hisiina hi mbôô* le mut a bi yoñ, a bel i wom wé.+ 32 I nloo mbôô yosôna bititigi, ndi i ngéda i nañ, i nloo mbônji* yosôna bikeñi, i yila e kayéle dinuni di ngii di nlo, di léba liyééne mu mintjep nwé.”

33 A yôñôl ki bo hihéga hipe: “Ane ngii i yé kiki muda nu a bi yoñ séñha, a pôdna yo ikété dihéga dikeñi di flawa daa letee flawa yosôna i hôl.”+

34 Yésu a bi añle mamut i mam mana momasôna ni njel dihéga. Ni maliga, a bé pôdôs bé bo ibabé i yoñ hihéga,+ 35 inyu yônôs jam li pôda ni njel mpôdôl nu a kal le: “M’a yibil nyo wem ni dihéga; m’a añal mam ma sôli ibôdôl i bibôdle.”*+

36 I mbus ha, i ngéda a bi huuha mamut, a jôp ikété ndap. Banigil bé ba lo ipañ yé, ba kal le: “Toñle bés hihéga hi béba kai i wom.” 37 A timbhe, a kal bo le: “Mut a nwes loñge mbôô a yé Man mut; 38 wom u yé nkoñ ’isi.+ Loñge mbôô i yé bon ba Ane, ndi béba kai i yé bon ba mut mbe,+ 39 yak ñoo nu a bi bel yo a yé Nsohop. Libumbul li yé mamélél ma ngim nkoñ ’isi,* babumbul ba yé biañgel. 40 Jon, kiki ba nkot béba kai, ba ligis yo i hié, hala nyen y’a ba i mamélél ma nkoñ ’isi.*+ 41 Man mut a’ om biañgel gwé, a ga pémés ikété Ane yé i bôt bobasôna* ba ntinde bape i boñ bibéba bi mam, ni bôt ba gwé lem i yan mbén, 42 bi leñ bo ikété juu li hié hikeñi.+ Nyoo nyen b’a ee, ba jek masoñ. 43 Ha ngéda i, bôt ba téé sép b’a bai ni ngui kiki hiañgaa+ mu Ane i Tata wap. Nu a gwé maôô, a emble.

44 “Ane ngii i yé kiki nkus u bak u sôli i wom, ndi mut a léba wo, a témb a sôô wo; inyu maséé mé, a nke, a nuñul gwom gwobisôna a gwé, a somb i wom u.+

45 “Ane ngii i yé kiki mut nyuñga* nu a nyéñ biloñge bi perl. 46 I ngéda a bi léba perl yada i i nhee diye, a bi ke, a pala nuñul gwom gwobisôna a bééna, a somb yo.+

47 “Ane ngii i yé yak kiki pése le ba nleñ ikété tuye, i nkot mintén mi tjobi nwominsôna. 48 I ngéda i nyon, ba ñôt yo i ngwañ tuye; i mbus, balop tjobi ba yén, ba ha tjobi dilam+ ikété bisel, ndi ba lep tjobi dibe.+ 49 Hala nyen y’a ba i mamélél ma nkoñ ’isi.* Biañgel gw’a loo, bi bagal bibéba bi bôt ni bôt ba téé sép, 50 bi leñ bo ikété juu li hié hikeñi. Nyoo nyen b’a ee, ba jek masoñ.

51 “Baa ni ntibil nok kii mam mana ma nkobla?” Ba kal nye le: “Ñ.” 52 Ha nyen a bi kal bo le: “Ibale hala, hiki malét,* i ngéda a mal kôhna biniigana inyu Ane ngii, a yé kiki nwet mbai, nu a mpémés ikété lisôô jé li nkus gwom bi mondo ni minlômbi mi gwom.”

53 I ngéda Yésu a bi mal yoñ dihéga dini, a nyodi ha homa nu. 54 I mbus, a ke i nkoñ wé,*+ a bôdôl niiga bôt i ndap yap bibégés, kayéle ba hel, ba kal le: “Hee i mut nunu a bi yôñôl i pék ini? Hee a bi yôñôl ngui i boñ i bihélha bi mam bini?+ 55 Baa nye bé nyen a yé man kapinda?+ Nyañ bé le Maria, ni lôknyañ bé le Yakôbô, Yôsep, Simôn ni Yuda?+ 56 Yak lôknyañ i bôda, yosôna i yé ni bés, hala bé? Hee ni a nyôñôl i mam mana momasôna?”+ 57 Jon ba bi tjél hémle nye.*+ Ndi Yésu a kal bo le: “Mpôdôl a gwé lipém homa nyensôna, ndi a gwé bé lipém i nkoñ wé to i ndap yé.”+ 58 A bi boñ bé ngandak bihélha bi mam nyoo inyu ngitophémle yap.