Yésaya
22 Mbagi inyu Nsôsôgô u yiinda:*+
kii i mboñ we? Inyuki bôt boñ bobasôna ba mbet i ngii minyôl?
2 Liyôgbe li bé i weeni ngandak,
u bé tison le bôt ba mbet ba sôhôk, tison i mangand.
Pansoñ bé yon i bi nol bôt boñ,
ba bi wo bé to i gwét.+
3 Baane boñ ba mbanda bobasôna ba bi ke ngwéé.+
Ba bi gwéla, ba ke i mok ibabé le mut a leñ mpihlôñgô.
I bôt bobasôna baoo ba bi koba, ba bi yila bôt ba mok,+
yak ni bôt ba bi ke ngwéé haa.
4 Inyu hala nyen me bi kal le: “Ni béñge bañ me,
nwaha me me ee.+
5 Inyule hilo hini hi yé hilo i yubda, hi tjiba ni hi mahel+
le Nwet Bayemlikok, Yéhôva nu mintôñ mi gwét a ñom
i Nsôsôgô u yiinda.
Lipénd li yé i bugi,+
yak nlondok u nôga i ngii hikôa.
7 Minsôsôgô* nwoñ minlam
mi ga yon ni bikak bi gwét,
yak bihosi* bi ga telep i manwemel ma tison,
8 ba ga héya i yom i nsôñ Yuda.
“I kel i, ni ga bôdôl bijôl bi gwét bi Ndap lipan ñem,+ 9 n’a tehe ngandak bahoma ba ba bi bugi mu lipénd li Nkoñ u David.+ N’a tééda ki malép mu titimba i makuli.+ 10 N’a soñgol mandap ma Yérusalem, n’a bôk ki mandap inyu tibil lipénd. 11 N’a boñ bômbôô pan ipôla mapénd mo ima inyu tééda malép ma nlômbi titimba, ndi n’a bôdôl bé Nhek nan nunkeñi ñem, n’a béñge bé to nu a bi kôôba i mam mana ibôdôl kôba.
12 I kel i, Nwet Bayemlikok le Yéhôva nu mintôñ mi gwét
a ga ti kunde le bôt ba ee, ba jôp malep,+
ba homb miño, ba haba ki minsugut.
13 Ndi iloole ba boñ hala, ba ga naña mangand, ba konok maséé,
ba nolok nyaga, ba nolok mintômba,
ba jek nuga, ba nyok wai.+
Ba kalak le: ‘Di jek, di nyok, inyule yani d’a wo.’”+
14 I mbus, Yéhôva nu mintôñ mi gwét nyemede a bi pot i maôô mem le: “‘I béba nan ini i ga séha bé letee ni wo,’+ hala nyen Nwet Bayemlikok le Yéhôva nu mintôñ mi gwét a mpot.”
15 Nwet Bayemlikok le Yéhôva nu mintôñ mi gwét a nkal le: “Kena yak kindak nunu le Sebna,+ nu a ñéga mam ma ndap* kiñe, kala nye le: 16 ‘Kii u gwé hana, limbe lihaa u gwé hana inyu boñ le u tém soñ hana inyu yoñ?’ A nkôñg yaga ngok i homa a nyôgi inyu soñ yé; a mbol yaga liaa inyu kôôbana nyemede linôyôi.* 17 ‘A mut nunu, Yéhôva a ga bes we ’isi, a gwel ki we ni ngui. 18 A ga kañ we, a sude, a leñ ki we kiki bol i loñ ikeñi. Nyoo nyen w’a wél, nyoo ki nyen bikak gwoñ bi gwét bi ga ba, hala a ga ba hison inyu ndap i nwet woñ. 19 M’a héya we tel yoñ, me luhul ki we i homa woñ bôlô.
20 “‘I kel i, m’a sébél ngwélél wem Éliakim,+ man Hilkia, 21 m’a ha nye mbôñgô woñ mbot, me tibil téñ nye ngôli yoñ,+ me ti ki nye énél* yoñ. Nyen a ga yila isañ inyu bôt ba Yérusalem ni inyu bôt ba mbôda Yuda. 22 Me ga kéi hiliba hi ndap David+ i bituu gwé. Ibale a nyibil, mut numpe a ta bé le a yip; ibale a nyip, mut numpe a ta bé le a yibil. 23 Me ga ôm nye siñ siñ kiki tone le ba ntômôl i homa a nlet, a ga yila kiki yééne ane i lipém inyu lihaa li isañ. 24 Ba ga kéi lipém* jolisôna li lihaa li isañ i ngii yé, mbôda yé ni boñge batitigi ba ga bôdôl nye ñem wengoñle bon ba biséya bobasôna, madis, ni dibôi dikeñi tjodisôna, bi bi kéi i tone.
25 “‘I kel i, hala nyen Yéhôva nu mintôñ mi gwét a mpot, ba ga héya i tone a yé ntômlak i homa a nlet,+ ba ga kit nye, a kwoo; gwom a bak a nit bi ga kwo, bi bôô inyule Yéhôva nyemede a mpot hala.’”