Kaat Matéô
11 I ngéda Yésu a bi mal ti banigil bé 12 biniigana, a nyodi ha, a ke i téé likalô ni niiga i bitison bipe.+
2 Ndi i ngéda Yôhanes a bi nok ngan i minson mi Kristô, a bak ikété ndap mok,+ a ep banigil bé+ 3 i bat nye le: “Baa wen u yé Nu a nlama lo, tole di nlama bem numpe?”+ 4 Yésu a timbhe bo le: “Kena, ni añle Yôhanes i mam ni yé nok, ni tehge ki:+ 5 nano bôt ba ndim ba ntehna,+ yak bibôk bi bôt bi nke, bakon lô+ ba mbôôp,* yak bôt ba ndok ba noga, bawoga ba ntémb i niñ, yak diyeyeba di ñemble ñañ nlam.+ 6 Maséé ni nu a mpééna bé njee me yé.”*+
7 I ngéda banigil ba Yôhanes ba bé ke, Yésu a bôdôl pôdôs mamut inyu Yôhanes: “Kii ni bi ke i béñge i ñoñ?+ Baa likai* mbebi i mpôgôs?+ 8 Ndi kii yaga ni bi ke i béñge? Mut a hééba mambot malam?* Ngo i bôt ba nhaba mambot malam ba yé i mandap ma bikiñe. 9 Ni maliga, ni bi pam ni inyuki? I béñge mpôdôl? Ñ, me nkal bé le a nloo yaga mpôdôl.+ 10 Inyu yé nyen i yé ntilga le: ‘Nuna-ki, me yé i ep nlegelnwin wem i bisu gwoñ,* nyen a’ bôk we i bisu+ inyu kôôba njel yoñ!’ 11 Me nkal bé maliga le, ikété bôt bôda ba ma gwal, to wada a yé ngi pam mu le a nloo Yôhanes Nsôble, ndi nuntitigi ikété Ane ngii a nloo nye.+ 12 Ibôdôl i dilo di Yôhanes Nsôble letee ni nano, bôt ba binam ba mboñ biliya bi ngui inyu jôp i Ane ngii, i bôt ba mboñ biliya bi ngui hala, bon ba njôp mu.+ 13 Inyule mbén Môsi ni Bapôdôl bobasôna ba bi pot ikepam i dilo di Yôhanes;+ 14 ndi to ni ngwés, to ni ngwés bé neebe hala, nyen a yé ‘Éliya nu a nlama lo.’+ 15 Nu a gwé maôô, a emble.
16 “Ni njee m’a hégha i hiai hini?+ Hi yé kiki boñge batitigi ba ba yii i bôm, ba séblak mawanda map ma mintuk, 17 ba kalak le: ‘Di bi kôt nsik* inyu nan, ndi ni bi sak bé; di bi bégél, ndi ni bi tééñga bé manyuu.’* 18 Nlélém jam, Yôhanes a bi lo, a bé je bé, a bé nyo bé, ndi bôt ba kal le: ‘A gwé mbuu mbe.’ 19 Man mut nye a bi lo, a jek, a nyok,+ ndi bôt ba kal le: ‘Nuna-ki, mut mbéna je ni mut nyôba,* liwanda li bakottas ni li baboñbéba.’+ Ndi, pék i nene ikété minson nwé.”*+
20 I mbus, a bôdôl yahal bitison i het libim li bihélha gwé bi mam li bi bôña, inyule bi bi hiel bé miñem: 21 “Ngoo ni we, a Kôrasin! Ngoo ni we a Bétsaida! Inyule i bihélha bi mam bi mbôña i bééni, ibale bi bôña i Tir ni i Sidôn, ki ba bi hiel miñem kôba, ba haba minsugut, ba yén ki ikété libu.*+ 22 Ndi me nkal bé le, i kogse y’a kwél Tir ni Sidôn i Hilo hi Mbagi y’a hoi iloo i kogse y’a kwél bé.+ 23 Yak we, a Kapernaum,+ baa u nhoñol le w’a bet letee ni ngii? To! W’a sôs letee ni Soñ;*+ inyule i bihélha bi mam bi mbôña i weeni, ibale bi bôña i Sôdôm, ki i tison i i ngi yii letee ni len. 24 Ndi me nkal we le, i kogse y’a kwél Sôdôm i Hilo hi Mbagi y’a hoi iloo i kogse y’a kwél we.”+
25 Ha ngéda i nyen Yésu a bi timbhe, a kal le: “Me mbégés we i mbamba, a Ta, Nwet ngii ni hisi, inyule u bi sôô bôt ba pék ni bayikaat mam mana, ndi u yeelene mo boñge batitigi.+ 26 Ñ, a Ta, inyule i bi lémél we i boñ hala. 27 Tata a bi ti me mam momasôna. Mut nye ki nye a ntibil bé yi Man handugi Isañ;+ nlélém jam, mut nye ki nye a ntibil bé yi Isañ+ handugi Man ni hiki mut Man a ngwés yeelene njee Isañ a yé.+ 28 Lona i meeni, a bé bobasôna ba ni ntumbba ni nson, ni bak ki ni bééga mbegee i ñét, m’a ti bé hogbe. 29 Yoña kop yem nson, ni niglene ki i meeni inyule me gwé ñem nwee ni suhulnyuu,+ le ndi ni kôs hogbe.* 30 Inyule kop yem nson i ntomb i begee, yak mbegee yem i nhoi.”