Minson mi baôma

27 I ngéda makidik ma bi yôña le di nke i Italia lôñni sitima,+ ba ti Paul ni bôt ba mok bape i moo ma ñane mbôgôl bisônda wada ba nsébél le Yuliô, mut ntôñ bisônda u Agustô. 2 Kiki di nyoñ sitima i i bé lôl i Adramitia, i kenek i tjagak i mabôñ ma pes mbok i Asia, di yoñ njel tuye; yak Aristarkô+ a bé lôñni bés, mut Tésalônika, i pes mbok i Makédônia. 3 I kel i bé noñ, di tjak i Sidôn; Yuliô a unda Paul loñgeñem,* a ti nye kunde le a kee i tehe mawanda mé, a kon ki maséé ni maleege map.

4 Kiki di nyodi nyoo, di yoñ njel tuye, di kil bebee ni ngwañ ôn Kiprô inyu solop mbebi i i bé lôl bés i bisu. 5 I mbus, di tagbe i ñem tuye bebee ni ngwañ Kilikia ni u Pamfilia, di tjak i libôñ li Mira, i pes mbok i Likia. 6 Ha nyen ñane mbôgôl bisônda a bi tehe sitima i nlôl i Aléksandria, i kenek i Italia; a jubus bés mu. 7 I mbus, di ke mbeñel mbeñel jôga li dilo, di pam ni ngandak ndutu i Knidô. Kiki mbebi i bé nwas bé bés le di kee ni bisu, di tagbene bebee ni Kréta, i Salmôné inyu solop mbebi. 8 I mbus, di luk ni ndutu ipañ ngwañ, di pam i homa wada ba nsébél le Mabôñ Malam, bebee ni tison Laséa.

9 Ndi kiki ngandak ngéda i bi tagbe, ni le i bé ha bé loñge i luk sitima inyule yak ngéda sôga je i kel Bikwak*+ i bi tagbe, jon Paul a bi ti maéba, 10 a kal bo le: “A bôt, me yé i tehe le di nla nimis ngandak munu liké lini, ha mambegee ni sitima gwotama bé, ndi di nla yak nimis biniñ gwés.”* 11 Ndi ñane mbôgôl bisônda a emble nluk sitima lôñni nwet sitima iloole a emble i mam Paul a bé kal. 12 Kiki libôñ li bé bé loñge inyu tégbaha mbéñ, libim li bôt li ti kiñ le ba nyodi ha, ba yoñ njel tuye inyu tehe too ba nla pam i Fénikia, libôñ li Kréta jada li li nun mbebi i nlôl i ñombok u likôl ni i nwelmbok u likôl, le ndi ba tégbaha mbéñ nyoo.

13 I ngéda mbebi i i nlôl i nwelmbok i bi hôñ ndék, ba hoñol le ba nla pam i homa ba bééna ngôñ i ke, ha nyen ba bi bédés hikoba, ba bôdôl kil bebee ni ngwañ Kréta. 14 Ndi i mbus ndék ngéda ndigi, mbuk mbebi ikeñi ba nsébél le Urakilô* a kahal hôñ ni ngui. 15 Ha nyen mbebi i bi pôgôs sitima ni ngui kayéle sitima i la ha bé ke ni bisu i kolba mbebi; kiki di bé la bé boñ jam jo ki jo, di nwas mbebi le yon i kena bés. 16 I mbus, di tagbe bebee ni man ôn wada le Kauda inyu solop mbebi; ndi to hala, di bi joba ngandak inyu boñ le di nimis bañ man môñgô* nu a bé i makol ma sitima. 17 Ndi i ngéda ba bi bédés man môñgô i sitima, ba gwélél minkôô inyu kañ sitima le ndi ba nit yo. Kiki ba bé kon woñi le lisege li Sirtis* li tiga hék sitima, ba hohol minkôô mi libadô li sitima, mbebi i kahal kena bo. 18 Ndi kiki mbuk mbebi a bé ndéñgés bés ni ngui, ba bôdôl hôyôs sitima i kel i bé noñ ha. 19 I hilo hi nyônôs aa, bomede* ba lep minkôô mi sitima.

20 Kiki to hiañgaa to tjôdôt bi bi nene bé inyu ngandak dilo, yak mbuk mbebi ikeñi* a hôñôk i ngii yés, di bôdôl nimis botñem yés yosôna le d’a pei. 21 Kiki bôt ba bi yén ngandak ngéda ngi je, jon Paul a bi telep ipôla yap, a kal le: “A bôt, ibabé pééna, ibale ni emble maéba mem le di jôp bañ i tuye i Kréta, ki di nkôhna bé i ndutu ini, to nimis i nya ini.+ 22 To hala, me nti bé makénd le ni bana ñem ngui inyule mut to wada* ikété nan a’ wo bé, sitima yotama yon y’a ôbi. 23 I u unu, añgel+ i Nyambe nu me ngwélél, me béghak ki, i ntelep me ipañ, 24 i kal le: ‘U kon bañ woñi, a Paul. U nlama telep i bisu bi Kaisa;+ nun-ki, Nyambe a mal ti we bôt bobasôna ba yé lôñni we i sitima.’ 25 Jon, ni bana ñem ngui, a bôt, inyule me nhémle Nyambe le mam m’a tagbe toi kiki a nkal me. 26 Ndi sitima yés i nlama ôbi bebee ni ôn yada.”+

27 I ngéda u u nyônôs 14 u bi kép, mbebi i bé ndéñgés bés i ñem Tuye Adria; i kosi juu, baluk sitima ba bôdôl hégda le ba yé i tiige bebee ni ngwañ wada. 28 Kiki ba nhek ndip tuye, i pam jam kiki bo 36 méta;* i mbus, ba kônde ke ndék ni bisu, ba témb ba hek, i pam jam kiki bo 27 méta.* 29 Kiki ba bé kon woñi le di nla kwo i ngii maaa, ba léñél dikoba dina i makol ma sitima, ba bôdôl hes le kel i ye. 30 Ndi i ngéda basal i sitima ba bi bôdôl yéñ nyodi i sitima inyu so, ba kahal suhus man môñgô i tuye, ba boñok wengoñle ba nsômbôl hohol dikoba di yé i ño sitima, 31 Paul a kal ñane mbôgôl bisônda lôñni bisônda le: “Ibale i bôt bana ba nyégle bé i sitima, ki n’a pei bé.”+ 32 Ha nyen bisônda bi bi kit minkôô mi man môñgô, bi nwas nye a kwo.

33 Bebee ni maye ma kel, Paul a ti bobasôna makénd le ba je ndék bijek, a kal le: “Len a yé hilo hi nyônôs 14 le ni nhônba, to je ni nje bé to yom. 34 Jon me nti bé makénd le ni je ndék bijek, hala a yé nseñ inyu loñge nan; inyule mut nye ki nye ikété nan a’ nimis bé hiôñ to hiada hi ño wé.” 35 Kiki a mpot hala, a yoñ bret, a ti Nyambe mayéga i bisu gwap bobasôna, a bek yo, a bôdôl je. 36 Ha nyen bobasôna ba bi bana makénd, yak bo ba bôdôl je. 37 Bésbobasôna ikété sitima di bé 276 bôt.* 38 I ngéda ba bi mal je, ba nuu, ba kahal leñ blé i tuye inyu hôyôs sitima.+

39 I ngéda kel i bi ye, ba tehe ngim nkoñ ba bé yi bé;+ ndi kiki ba ntehe libôñ jada li li bééna tegep ngwañ, ba nai ndik le ba nkena sitima nyoo ibale ba nla. 40 Ha nyen ba bi kit minkôô mi dikoba, ba nwas tjo di kwo i tuye. I nlélém ngéda, ba hohol minkôô mi bipagô bi makol ma sitima; i mbus, ba bédés libadô li ño sitima inyu kap mbebi, ba éga sitima le i pam i ngwañ tuye. 41 Ha nyen ba bi ôm i homa lisege li yé ngandak isi malép, mangudga ma bébék sitima bipes gwo biba. Kiki sitima i ntihba hisi, ño wé u pagbe, sitima i nyiñgha ha bé; ndi mangudga ma kahal bép makol ma sitima, ma bôk mo ngéñ ngéñ.+ 42 Ha nyen bisônda bi bi kit le bi nol bôt ba mok inyu boñ le to wada wap a hok bañ le ndi a so. 43 Ndi kiki ñane mbôgôl bisônda a bi yoñ makidik le a mpéyés Paul, a sôña bo i yônôs sômbôl yap. A ti oda le i bôt ba nyi nhoga ba kwoo i tuye, ba bôk pam i ngwañ, 44 bana bape ba bé lama noñ bo i mbus, bahogi i ngii mabam, bape i ngii bipes bi sitima. Hala nyen bobasôna ba bi pam loñge i ngwañ.+