Sakaria
1 I sôñ i nyônôs juem mu nwii mi nyônôs ima mi ane Darius,+ Yéhôva a bi pôdôs mpôdôl wé Sakaria,*+ man Bérékia, man Idô, a kal nye le: 2 “Yéhôva a bi lôôha unbene basañ banan.+
3 “Kal bo le: ‘Lana nyen Yéhôva nu mintôñ mi ngwét a nkal: “‘Ni témb i meeni,’ hala nyen Yéhôva nu mintôñ mi gwét a mpot, ‘ndi m’a témb i bééni,’+ hala nyen Yéhôva nu mintôñ mi gwét a nkal.”’
4 “‘Ni yila bañ kiki basañ banan, ba bapôdôl ba ngéda kôba ba bi kal le: “Lana nyen Yéhôva nu mintôñ mi gwét a nkal: ‘Soho, ni tjôô bilem binan bibe* ni maboñok manan mabe.’”’+
“‘Ndi ba bi nôgôl bé me, ba emble bé to me,’+ hala nyen Yéhôva a mpot.
5 “‘Basañ banan ba yé ni hee i len ini? Baa bapôdôl ba bi niñ i boga ni boga? 6 Ndi bibañga gwem ni matéak mem, bi me bi legel ni njel bagwélél bem le bapôdôl, baa basañ banan ba bi tehe bé kiki bi bi yon?+ Jon ba bi témb i meeni, ba kal le : ‘Yéhôva nu mintôñ mi gwét a bi boñ bés inoñnaga ni bilem gwés yak ni maboñok més, ñ, hala yaga nyen a bi kit le a mboñ bés.’”+
7 I nwii mi nyônôs 2 mi ane Darius,+ i hilo hi nyônôs 24 hi sôñ i nyônôs 11, hala wee i sôñ Sébat,* Yéhôva a bi pôdôs mpôdôl Sakaria, man Bérékia, man Idô, a kal nye le: 8 “Me bi tehe yiinda juu. Mut wada a bé a yii i ngii kôyôp hosi, a bé a téé ipôla bie bi myrte nyoo isi hikôa; bakilhosi ba bé i mbus yé, ba bak i ngii bihosi bi bi nkôyôp, ni bihosi bi bi yé minik-minik, lôñni bihosi bi bi yé puba.”
9 Jon me bi bat le: “A Nwet wem, i bakilhosi bana ba yé bonjee?”
I añgel i bé kwel ni me i timbhe me le: “M’a unda we bonjee i bakilhosi bana ba yé.”
10 I mbus, i mut a bé a téé ipôla bie bi myrte a kal le: “I bakilhosi bana bon Yéhôva a ñep le ba kiiña mu hisi.” 11 Ha nyen bakilhosi ba bi kal añgel i Yéhôva le: “Di mal kiiña mu hisi hiosôna, ndi nun-ki! Hisi hiosôna hi yé nwee, hi bak ki ikété nsañ.”+
12 Jon añgel i Yéhôva i bi kal le: “Éé a Yéhôva nu mintôñ mi gwét, letee ni ngéda mbe u ga tjél kônôl Yérusalem ni bitison bi Yuda ngoo,+ bi u bi unbene ngandak munu 70 ma nwii mana?”+
13 Yéhôva a timbhe i añgel i bé kwel ni me ni bibuk bilam lôñni bibuk bi ntina hogbe. 14 Ha nyen i añgel i bé kwel ni me, i kal me le: “U nlama pot makeñi le: ‘Lana nyen Yéhôva nu mintôñ mi gwét a nkal: “M’a sôñ yaga Yérusalem ni Siôn bañga lisôñôk.+ 15 I biloñ bi niñ nwee,+ me ñunbene yaga gwo bañga bañga, inyule me bé yéñ ndik le me kogse litén jem ndék,+ ndi biloñ bipe gwo bi bi lôôha tét jo.”’+
16 “Lana ni nyen Yéhôva a nkal: ‘“M’a tiimba kon Yérusalem ngoo,+ nyoo ki nyen ba ga ôñôl me ndap;+ inyu hek Yérusalem, ba ga gwélél nkôô,”+ hala nyen Yéhôva nu mintôñ mi gwét a mpot.’
17 “Kônde ki pot makeñi, u kal le: ‘Lana nyen Yéhôva nu mintôñ mi ngwét a nkal: “Bitison gwem bi ga tiimba ki bana ngandak gwom bilam, yak Yéhôva a ga témb a hôgbaha Siôn,+ a tiimba ki pohol Yérusalem.”’”+
18 I mbus, me bi pa mis, me tehe bitoñ bina.+ 19 Jon me bi bat i añgel i bé kwel ni me le: “I bitoñ bini bi yé kii?” Añgel i timbhe me le: “I bitoñ bini bi yé mimpémba mi biloñ mi mi bi boñ le Yuda,+ Israel+ ni Yérusalem+ ba tjama.”
20 I mbus ha, Yéhôva a unda me baôô gwom ba-na. 21 Me bat le: “I bôt bana ba nlo i boñ kii?”
A kal me le: “I bitoñ bini bi yé mimpémba mi biloñ mi mi bi boñ le Yuda a tjama kayéle mut nye ki nye a bé la ha bé pa ño. I bôt bana bon ba ga lo inyu kônha bitoñ bi biloñ woñi, inyu bôk bitoñ bi biloñ bi bi bé pa bitoñ gwap inyu kolba loñ Yuda, kayéle bi boñ le Yuda a tjama.”