Hiôb
23 Hiôb a timbhe le:
3 Ibale me yik to i homa me nla léba Nyambe!+
Ki me nke i homa a nyééne.+
4 Ki me nkena hop wem i bisu gwé,
me sôñ ki memede letee.
5 Ki m’a emble lelaa a ntimbhe me,
me tibil ki tééda i mam a nkal me.
6 Baa a yé le a gwélél ngui yé ikeñi inyu jôs me?
To, ki a ñemble ndik me.+
7 I bisu bi Nyambe, i mut a téé sép a yé le a sañgal mam ni nye,
nkéés wem ki a yé le a kit ngélé yada inyu yosôna le me gwé bé nsohi.
8 Ndi ibale me nke i pes likôl, Nyambe a ta bé nyoo;
to me ntémb i pes hiôñg, me nkoba bé nye.
9 I ngéda a ngwel nson i pes ñombok,* me ntehe bé nye;
yak i ngéda a nhielba i pes nwelmbok,* to hala me ntehe bé nye.
10 Ndi a nyi i njel me nôñôl.+
I ngéda a’ mal noode me, m’a yik pam kiki bañga gôl.+
11 Makôô mem ma ñodop yaga mu mabal mé;
me ntéñbe mu njel yé, me nyoñ bé njel ipe.+
12 Me ntjôô bé mambén a bi ti me.*
Me ntibil tééda bibañga+ gwé iloo kiki a bé bémél me.*
13 I ngéda a mal yoñ makidik, njee a nla kolba nye?+
I ngéda a nyéñ boñ jam, a mboñ ndik jo.+
14 Inyule a ga yônôs mam momasôna a bi kit* inyu yem,
a ngi téédaga ki ngandak mam kiki ma.
15 Inyu hala nyen me nkon Nyambe woñi;
i ngéda me nhoñol nye, ñem u mbôô me matjél.
16 Nyambe a nkônha me woñi,
Nu ngui yosôna a nsés me.
17 Jiibe likeñi li nhô me su,
ndi to hala, m’a yip bé nyo.