Sakaria

12 Lipôdôl li Nyambe lini:

2 “Me nunu me yé i yilha Yérusalem libôndô* li wai, li li mboñ le biloñ bi ndiñg; baoo b’a kéña Yuda, ba kéña ki Yérusalem.+ 3 I kel i, m’a yilha Yérusalem ngok i nyét* inyu matén momasôna. Ba bobasôna ba ga yéñ le ba pa yo ba ga bep babaa;+ yak biloñ gwobisôna bi nkoñ ’isi bi ga kodba inyu jôs nye.”+ 4 Yéhôva a mpot le: “I kel i, m’a bép hiki hosi, i yôm; me bép yak hiki mut a yé i ngii hosi, a kônd njék. Jis jem l’a ba i ngii litén* li Yuda, ndi m’a kwés bihosi gwobisôna bi matén ndim. 5 Baane* ba Yuda b’a kal le: ‘Bôt ba Yérusalem ba yé ngui yés i i nlôl ni Yéhôva nu mintôñ mi gwét.’+ 6 I kel i, m’a boñ le baane ba Yuda ba yila kiki séya i i yé nyonok ni hié, i bak i ñemkété nwind u tjéé; m’a boñ ki le ba yila kiki nwai u hié ikété mimbom mi kôn ba nkit,+ ba ga ligis matén momasôna ma yé bo ipañ i pes walôm ni i pes waé;+ bôt ba Yérusalem b’a ke ni bisu i yééne i homa wap,* ñ, ikété Yérusalem.+

7 “Yéhôva a ga tohol ndugi mandap ma mabadô ma Yuda, inyu boñ le lipém* li mbôda* David ni lipém* li bôt ba Yérusalem li loo bañ lipém* li bana bôt bape ba Yuda. 8 I kel i, Yéhôva a ga sôñ bôt ba Yérusalem.+ I kel i, i mut a nlôôha bomb* ipôla yap a ga ba kiki David, yak mbôda David i ga éga bo kiki Nyambe, kiki añgel i Yéhôva i i mbôk bo i bisu.+ 9 I kel i, m’a tjé yaga biloñ gwobisôna bi bi nlo i kolba Yérusalem.+

10 “M’a kôp mbuu wem i ngii mbôda* David ni i ngii bôt ba Yérusalem inyu boñ le ba lémél me, ba yemhe ki me. B’a béñge nu ba bi ôm likoñ,+ b’a ee nye kiki ba ñee mpom man munlôm; b’a ee nye ngandak kiki ba ñee man munlôm nu a yé mbôkgwéé. 11 I kel i, maéya ma ga ba ngandak i Yérusalem kiki maéya i Hadadrimôn, i tegep mbok Mégidô.+ 12 Loñ i ga ee, hiki lihaa i yé pes: mbôda David i yé pes, yak bôda bap i yap pes; mbôda Natan+ i yé pes, yak bôda bap i yap pes; 13 mbôda Lévi+ i yé pes, yak bôda bap i yap pes; mbôda Siméi+ i yé pes, yak bôda bap i yap pes; 14 mana mahaa momasôna ma nyégle, hiki lihaa i yé pes, yak bôda bap i yap pes.