Amôs
7 I jam lini jon Yéhôva Nwet Bayemlikok a bi unda me: nuna-ki! A bi om liuñ li bitandi i ngéda bijek ba nsal i mbéñ* bi bi bôdôl o. Hala a bé i ngéda ba bi mal é bikai i nwom mi kiñe. 2 I ngéda liuñ li bitandi li bi mal je bikai gwobisôna ikété loñ, ha nyen me bi kal le: “A Yéhôva Nwet Bayemlikok, soho nwéhél litén joñ!+ Lelaa Yakôb a nla pei?* A gwééba bé!”+
3 Yéhôva a bi héñha mahoñol.*+ Yéhôva a kal le: “Hala a ga bôña bé.”
4 I jam lini jon Yéhôva Nwet Bayemlikok a bi unda me: nuna-ki! Yéhôva Nwet Bayemlikok a bi om hié inyu kogse litén jé. Hié hi bi ligis tuye nkeñi ni pes loñ. 5 Ha nyen me bi kal le: “A Yéhôva Nwet Bayemlikok, soho u boñ bañ hala.+ Lelaa Yakôb a nla pei?* A gwééba bé!”+
6 Yéhôva a bi héñha mahoñol.*+ Yéhôva Nwet Bayemlikok a kal le: “Yak i jam li, li ga bôña bé.”
7 I jam lini jon Nyambe a bi unda me: nuna-ki! Yéhôva a bé a téé i ngii libap li ba bi boñ ni nkôô lipidô,* nkôô lipidô u bak nye woo. 8 Ha nyen Yéhôva a bi kal le: “Kii u yé tehe a Amôs?” Me timbhe le: “Nkôô lipidô.” Yéhôva a kal le: “Me mbii nkôô lipidô ikété litén jem Israel. Me ga nwéhél ha bé me bo.+ 9 Bahoma ba nyôgi ba Isak+ b’a tjiba, yak bahoma ba bibégés ba Israel ba ga tjiba;+ me ga kogse ndap Yérôbôam ni pansoñ.”+
10 Amazia, prisi i Bétel,+ a bi ômle Kiñe Israel le Yérôbôam+ i nwin unu: “Amôs a yé i uune we jimb i ñemkété u litén li Israel.+ Bôt ba loñ ba nla ha bé hônba bipôdôl gwé gwobisôna.+ 11 Inyule Amôs a yé kal le: ‘Yérôbôam a ga wo ni pansoñ, bôt ba Israel ba ga ke i minkôm haa ni loñ yap.’”+
12 Ha nyen Amazia a bi kal Amôs le: “A ntehemam nunu, kee ngwéé i loñ Yuda, yéñ bijek* bi kel nyoo, podok yak mbañ nyoo.+ 13 Ndi u nlama bé pot mbañ i Bétel,+ inyule a yé homa bibégés nu kiñe+ ni témpel i ane.”
14 Amôs a timbhe Amazia le: “Me bé bé mpôdôl, to lok mpôdôl; ndi me bé ntééda bémba,+ me yoñok ngéda ni bie bi sikômôr.* 15 Ndi Yéhôva a bi héya me i mbus bémba, Yéhôva a kal me le: ‘Kenek, pôdlak litén jem Israel mbañ.’+ 16 Nano, emble lipôdôl li Yéhôva: ‘We u nkal le: “U pot bañ jam li nkolba Israel,+ u añal bañ+ to jam li nkolba ndap Isak.” 17 Inyu hala nyen Yéhôva a nkal le: “Nwaa woñ a’ yila muda libambe ikété tison, bilok gwoñ ni bingond gwoñ bi ga wo ni pansoñ. Ba ga hek nkoñ woñ ni nkôô, ba kébha ki wo bôt, wemede u ga wo i loñ i nyega; ndi ibabé pééna bon ba Israel ba ga ke i minkôm haa ni loñ yap.”’”+