Kaat Yôhanes

12 Dilo disamal ilole ngand Pasa i mbôdôl, Yésu a pam i Bétania i het Lasarô,+ nu Yésu a bi tugul ikété bawoga, a bé. 2 Ha nyen ba bi tégne nye bijek bi kôkôa; Marta nyen a bé kébél bo,+ ndi Lasarô a bé wada ikété bôt ba bé je* lôñni nye. 3 I mbus hala, Maria a yoñ jam kiki bo pes lita* i labinda, bañga njahba* i i nlôôha hee diye, a kôp yo i makôô ma Yésu, a sas ki mo ni tjôñ tjé inyu numus mo. Ndap i yon ni njiñ labinda.+ 4 Ndi Yuda Iskariôt,+ wada ikété banigil, nu a bé bebee ni liibana nye, a kal le: 5 “Inyuki ba nuñul bé i labinda ini 300 dinariô,* ba ti diyeyeba i moni mi?” 6 A bé pot bé hala inyule a bé tôñ diyeyeba, ndi inyule a bé mut wip, nyen a bééna nkuu moni, a ban-ga lem i nip moni mukété. 7 Ha nyen Yésu a bi kal le: “Nwas nye nwee, le ndi a boñ hala inyu kôôba kel majôna mem.+ 8 Inyule ni gwé diyeyeba ngéda yosôna,+ ndi n’a bana bé me ngéda yosôna.”+

9 Ha ngéda i, limut li bôt likeñi li Lôk Yuda li yi le a bé nyoo, ndi li bi lo bé ndik inyu Yésu, ndi yak inyu Lasarô, nu a bi tugul ikété bawoga.+ 10 Jon baéga biprisi ba bi ôô jimb inyu nol yak Lasarô, 11 inyule inyu yé nyen ngandak Lôk Yuda i bé ke nyoo, i hémlege Yésu.+

12 I kel i bé noñ ha, limut li bôt likeñi li li bi lo i ngand li nok le Yésu a yé i lo i Yérusalem. 13 Ha nyen ba bi yoñ masee ma maén, ba pam i boma nye, ba bôdôl ki lond le: “Tohol, di nsoohe we! Nu a nlôl i jôl li Yéhôva,*+ Kiñe Israel,+ a yé nsaibak!” 14 I ngéda Yésu a bi koba man jagas, a yén mu ngii,+ ndik kiki i yé ntilga le: 15 “U kon bañ woñi, a ngond Siôn. Nun-ki, kiñe yoñ i yé i lo, i yii i ngii man jagas.”+ 16 Banigil ba bi bôk ndugi bé ba nok i mam mana, ndi i ngéda Yésu a bi kôhna lipém,+ ha nyen ba bi bigda le i mam mana ma bé ntilga inyu yé, ni le bôt ba bi boñ nye i mam mana.+

17 I limut li bé lôñni nye i ngéda a bi sébél Lasarô le a pam ikété soñ,*+ a tugul ki nye ikété bawoga, li bé waa bé bok mbôgi inyu mam li bi tehe.+ 18 Inyu hala ki nyen limut li bé ke i boma nye, inyule li bi nok le a bi boñ i hélha jam ini. 19 Ha nyen Farisai i bi kalna bo ni bo le: “Baa ni yé i tehe? Di ta yaga bé i boñ to jam. Nuna-ki! Mbok yosôna i noñ nye.”+

20 Ndi bôt ba Grikia bahogi ba bé ipôla ba ba bi lo i bégés Nyambe i ngand. 21 Ha nyen ba bi lo i tehe Filipô,+ nu a bé mut Bétsaida nu Galiléa, ba bôdôl bat nye le: “A nwet, di nsômbôl tehe Yésu.” 22 Filipô a lo a kal Andréa. Andréa bo Filipô ba ke ba añle Yésu hala.

23 Ndi Yésu a timbhe bo le: “Ngeñ i nkola le Man mut a kôhna lipém.+ 24 Me nkal yaga bé maliga le, ibale jis li blé li nkwo bé ’isi, le ndi li wo, li nyégle ndik jis li blé jada; ndi ibale li nwo,+ ha nyen li nti ngandak mis ma blé. 25 Nu ni nu a ngwés niñ* yé, a’ nimis* yo; ndi nu ni nu a ñoo niñ* yé+ munu nkoñ ’isi unu, a’ tééda yo inyu niñ boga.+ 26 Ibale mut a nyéñ gwélél me, a noñ me; i homa me yé, ha nyen yak ngwélél wem a’ ba.+ Ibale mut a nyéñ gwélél me, Tata a’ ti nye lipém. 27 Hanano nduña i yé me i ñem,+ kii me nla kal? A Ta, tohol me le me tehe bañ i ngeñ ini.+ Ndi inyu hônba i ngeñ ini nyen me bi lôl. 28 A Ta, ti jôl joñ lipém.” Ha nyen kiñ+ i bi lôl i ngii le: “Me bi ti jo lipém, m’a kônde ki ti jo lipém.”+

29 I limut li bé li téé ha, li nok i kiñ i, li bôdôl kal le mbambat yon i mbam. Bape ba kal le: “Añgel yon i mpôdôs nye.” 30 Yésu a kal le: “I kiñ ini ni nok i ta bé inyu yem, ndi inyu nan. 31 Nano i nkoñ ’isi unu u yé i bikééhene; nano ñane nkoñ ’isi unu+ a’ léña i mbégdé.+ 32 Ndi i ngéda b’a péni me i kék+, m’a ôt mintén mi bôt nwominsôna i meeni.” 33 A bé pot yaga hala inyu unda umbe ntén nyemb a bé bebee ni kôhna.+ 34 I mbus, limut li timbhe nye le: “Di bi nok ikété Mbén* le Kristô a niñ i boga ni boga.+ Lelaa u nla kal le b’a péni Man mut i kék?+ Njee a yé i Man mut nu?” 35 Ha nyen Yésu a bi kal bo le: “Mapubi m’a ba ipôla nan inyu ndék ngéda. Ni hiôm i ngéda ni ngi gwé mapubi le ndi jiibe li yémbél bañ bé; nu ni nu a nkil i jiibe a nyi bé hee a nke.+ 36 I ngéda ni ngi gwé mapubi, undnana le ni nhémle mapubi, le ndi ni yila bon ba mapubi.”+

Kiki Yésu a mpot i mam mana, a ke, a solop bo. 37 To hala kiki a bi boñ ngandak bihélha bi mam i bisu gwap, ba bé hémle bé nye, 38 inyu boñ le bañga i mpôdôl Yésaya i yon, nu a kal le: “A Yéhôva,* njee a bi hémle i mam a bi nok ni njel yés?*+ Njee Yéhôva* a bi yeelene woo wé?”+ 39 Yésaya a bi kônde ki kal i jam li bé boñ le ba bé la bé hémle: 40 “A bi kwés bo ndim, a lédés ki miñem nwap inyu boñ le ba tehe bañ ni mis map, to nok ni miñem nwap, le ndi ba hielba kayéle me mélés makon map.”+ 41 Yésaya a bi pot i mam mana inyule a bi tehe lipém jé, a pot ki inyu yé.+ 42 Ndi to hala, yak ngandak ikété baéga i bi hémle nye;+ ndi i bé pahal bé hala inyule i bé kon Farisai woñi, le ndi ba pémés bañ bo ikété ntôñ;*+ 43 inyule i bé gwés lipém li bôt ba binam iloo lipém li Nyambe.+

44 Ndi Yésu a bédés kiñ, a kal le: “Nu ni nu a nhémle me, wee a nhémle ndik bé metama, ndi yak Nu a bi ep me;+ 45 yak nu ni nu a ntehe me, wee a ntehe yak Nu a bi ep me.+ 46 Me bi lo kiki mapubi munu nkoñ ’isi,+ le ndi nu a nhémle me a yégle bañ ikété jiibe.+ 47 Ndi nu a nok bibañga gwem ndi a tééda bé gwo, me nkéés bé nye; inyule me bi lo bé inyu kéés nkoñ ’isi, ndi inyu tohol wo.+ 48 Nu ni nu a ntjél me, nu a nleege bé to bibañga gwem, a gwé nu a nkéés nye. I bañga me bi pot yon y’a kéés nye i hilo hi nsôk. 49 Inyule me bi pot bé ni memede, ndi Tata nu a bi ep me, nyemede nyen a bi ti me mbén inyu jam me nlama kal ni lelaa me nlama kal jo.+ 50 Me nyi le mbén yé i nkena i niñ boga.+ Jon hiki jam me mpot, me mpot jo ndik kiki Tata a bi kal me.”+