Yérémia

33 Yéhôva a bi témb a pôdôs Yérémia inyu ngélé i nyônôs iba, i ngéda a bé a ngi yii i mok i kotoo Batat,+ a kal nye le: 2 “Yéhôva nu a bi hek ’isi, Yéhôva nu a bi boñ hio, a ôm ki hio siñ siñ; jôl jé le Yéhôva, a mpot le: 3 ‘Sébél me, m’a timbhe we, me ga añle we bañga mam ni mam ma ma nlet i nok, le u nyi bé.’”+

4 “Inyule haana nyen Yéhôva, Nyambe nu Israel a mpot inyu mandap ma tison ini ni mandap ma bikiñe bi Yuda, ma bôt ba yé i bôk inyu kolba bijôl bi gwét ni pansoñ+ i baoo, 5 ni inyu bôt ba ba nlo i jôs bôt ba Kaldéa le ba yônôs bahoma bana ni mim mi bôt me bi nol ikété hiun hiem ni liyot jem; béba i bôt bana yon i bi tinde me i kôm i tison ini mbus: 6 ‘Me ga tibil yo, me mbuubaha ki yo;+ ñ, me ga mbuubaha bo, me boñ ki le ba ba ikété ngandak nsañ ni maliga.+ 7 M’a témbna bôt ba Yuda ni bôt ba Israel ba ba yé i minkôm,+ me témb me oñ bo kiki me bi boñ i bibôdle.+ 8 M’a sas i kogse yosôna ba bééga inyu bibéba gwobisôna ba bi boñ i ngéda ba bé ndogbene me,+ m’a nwéhél bo bibéba gwap ni mam mabe ba bi boñ me.+ 9 I tison ini i ga yila jam li maséé inyu yem, biloñ bi nkoñ ’isi gwobisôna bi ga bégés me, bi ti ki me lipém i ngéda bi ga nok i mam malam momasôna me mbôñôl i bôt ba bé i minkôm.+ Bi ga kon woñi, bi sehla+ ki i ngéda bi ga tehe mam malam momasôna ni nsañ me ga ti i tison ini.’”+

10 “Haana nyen Yéhôva a nkal: ‘Ni ga kal le i homa nunu a yé hôlô, a gwé bé mut, to bilém; ni le bitison bi Yuda ni minloñ mi Yérusalem mi yé hôlô, mi gwé bé mut, to mut nu a nyééne mu, to bilém; ndi ba ga témb ba nok 11 diléla ni bôt ba nkon maséé+ hana homa nunu, yak kiñ i munlôm nu a mbii muda ni i muda nu a nke libii, kiñ i bôt ba nkal le: “Tina Yéhôva nu mintôñ mi gwét mayéga, inyule Yéhôva a yé loñge;+ loñge yé ñem* i nom mba ni mba!”’+

“‘Bôt ba ga lona makébla i témpel Yéhôva inyu ti nye mayéga,+ inyule a ga boñ le i bôt ba bé i minkôm ba témb i loñ kiki i ngéda bisu,’ hala nyen Yéhôva a mpot.”

12 “Haana nyen Yéhôva nu mintôñ mi gwét a mpot: ‘I loñ ini i yé hôlô, i i gwé bé mut, to bilém, yak bitison gwé gwobisôna bi yé hôlô; ndi batééda mintômba ba ga témb ba léba bijek ni bahoma inyu nôyôs bilém gwap mu.’+

13 “‘Ikété bitison bi mbok dikôa, ikété bitison bi mbok i yé isi dikôa, ikété bitison bi nwelmbok, i nkoñ u Benyamin, i minkoñ mi yé ipañ Yérusalem+ ni i bitison bi Yuda,+ batééda mintômba ba ga témb ba bôdôl soñgol bibémba gwap,’ hala nyen Yéhôva a mpot.”

14 “Yéhôva a nkal le: ‘Dilo di ga lo le me ga yônôs i mam malam me bi bôn litén li Israel ni litén li Yuda.+ 15 I dilo di, ni mu mangéda ma, me ga pémhene David nkôdôlbum*+ nu a téé sép, a ga boñ le mbagi sép ni telepsép bi ba ikété loñ.+ 16 I dilo di, Yuda a ga kôhna tohi,+ yak Yérusalem a ga yén ikété nsañ.+ Ba ga sébél nye le: Yéhôva a yé telepsép yés.’”+

17 “Haana nyen Yéhôva a mpot: ‘Mut nu a nlôl i mbôda David a ga hañ bé inyu yén i yééne ane i Israel,+ 18 to biprisi le Lôk Lévi bi ga hañ bé mut nu a ntelep i bisu gwem inyu ti me bisesema bi ntul i hié, i ligis makébla ma bijek ni bisesema bipe.’”

19 Yéhôva a bi témb a pôdôs Yérémia, a kal nye le: 20 “Haana nyen Yéhôva a mpot: ‘Baa ni nla bôk malômbla me bi boñ ni u, tole malômbla me bi boñ ni njamuha, le kel i ye bañ, to u u sude bañ i ntéak ngéda?+ To! 21 Hala nyen jam jo ki jo li nla bé bôk malômbla me bi boñ ni ngwélél wem David,+ kayéle li nkéñ njel le a bana bañ man inyu yén i yééne ane;+ jam jo ki jo li nla bé to bôk malômbla me bi boñ ni biprisi le Lôk Lévi, bagwélél bem.+ 22 Kiki mut a ta bé le a soñgol tjôdôt di ngii, to lisege li tuye, hala nyen me ga bulus mbôda* i ngwélél wem David, me bulus ki Lôk Lévi i i ngwélél me.’”

23 Yéhôva a bi témb a pôdôs Yérémia, a kal nye le: 24 “Baa u nok bé jam i bôt bana ba yé i pot? Bo: ‘Yéhôva a ga tjôô mahaa mo ima a bi pohol.’ Ba nti bé bôt ba litén jem lipém, ba ntehe ha bé bo kiki ngim loñ.

25 “Haana nyen Yéhôva a nkal: ‘Kiki malômbla me bi boñ ni u lôñni njamuha+ ma ga set bé, to mambén* ma ngii ni ma hisi,+ 26 hala nyen m’a tjôô bé mbôda Yakôb, to mbôda ngwélél wem David; jam jo ki jo li ga kéñ bé me njel i pohol baane ikété mbôda* yé* inyu boñ le ba ane mbôda* Abraham, Isak ni Yakôb. Inyule me ga témbna bôt bap ba ba bi ke i minkôm,+ me ga kônôl ki bo ngoo.’”+