Sakaria

14 “Nun-ki! Hilo hi Yéhôva hi yé i lo, i hilo hi nyen b’a kap nkus ba bi yoñ i weeni.* 2 M’a kot biloñ gwobisôna le bi jôs Yérusalem gwét; ba ga yoñ tison, ba yoñ gwom bi mandap gwobisôna, ba nyégsaga ki bôda i lal ni bo. Pes yada i bôt ba tison i ga ke i minkôm, ndi i bôt ba nyégle mu, ba ga héya* bé bo mu tison.

3 “Yéhôva a ga pam, a jôs i biloñ bini gwét+ kiki a yé a njo i kel gwét.+ 4 I kel i nyen a ga téé makôô mé i ngii Hikôa Ôlivé,+ hi hi yé i mbombom Yérusalem, i pes likôl. Hikôa Ôlivé hi ga bôô bipes biba, ibôdôl i pes likôl* ipam i pes hiôñg,* ha nyen soso nsôsôgô a ga ba. Pes yada i hikôa i ga ke i pes ñombok, yak ii pes ipe i hikôa i ke i pes nwelmbok. 5 Ni ga ke ngwéé nyoo i nsôsôgô u u yé ipôla dikôa tjem, inyule nsôsôgô u u yé ipôla dikôa tjem u ga ke letee ni i Azel. Ni nlama ke ngwéé kiki ni bi ke nyeñg hisi ngwéé i dilo di kiñe Yuda le Ôsiya.+ Yéhôva a ga lo, yak bapubhaga bobasôna ba ga ba lôñni nye.+

6 “I kel i, mapubi m’a ba bé,+ yak mam ma ga telep.* 7 I kel ini i ga ba hilo hi tôbôtôbô; i ga yiba le hilo hi Yéhôva hi.+ Njamuha to juu bi ga ba bé; yak kôkôa, mapubi ma ga ba. 8 I kel i, malép ma ma nti niñ+ ma ga kuli, ma lôlak i Yérusalem;+ pes malép yada i ga ke i tuye* nu a yé nyoo i pes likôl,+ yak ini pes malép ipe i kee i tuye* nu a yé nyoo i pes hiôñg.+ I mam mana ma ga bôña i ngéda sép ni i ngéda mbéñ. 9 Yéhôva a ga ba Kiñe i hisi hiosôna.+ I kel i, Yéhôva nyetama nyen ba ga bégés,*+ yak jôl jé li ga ba jada.+

10 “Loñ yosôna i ga yila kiki Araba,+ ibôdôl i Géba+ letee ni i Rimôn,+ nyoo i pes nwelmbok i Yérusalem. Yérusalem a ga bédhana i nlômbi wé homa, bôt ba ga yééne ki mu+ ibôdôl i nwemel u Benyamin+ ikepam i nwemel u Bisu, letee ni i nwemel u Likas; ibôdôl ki i nwemel u Nkum ndap u Hananel+ letee ni i mawaa ma wai ma kiñe. 11 Ñ, bôt ba ga yééne mu; ba ga tiihe ha bé Yérusalem le a nlama tjiba,+ ndi bôt ba ga yén i Yérusalem ikété nwee.+

12 “Yéhôva a ga bép matén momasôna ma ma ga jôs Yérusalem gwét ni himala hini:+ Minsôn nwap mi ga bol, ba bak ba téé bitétéé; mis map ma ga bol ikété bihôk gwap bi mis, yak dilémb tjap di ga bol ikété manyo map.

13 “I kel i, Yéhôva a ga boñ le ba yôm bañga liyômôk; hiki mut a ga gwel woo u solôñ wé, a pa ki woo wé inyu jôs nye.*+ 14 Yak Yuda a ga jôp mu gwét nyoo i Yérusalem; ba ga kot nkus u biloñ gwobisôna bi bi yé ha ipañ: ngandak gôl, ngandak silba ni ngandak mambot.+

15 “Himala hipe kiki hini hi ga kwél bihosi, minyabén mi hosi,* kamél, magas, ni bilém gwobisôna bi bi ga ba nyoo i bahoma baoo ba nyééne.

16 “Hiki mut nu a ga yégle ikété biloñ gwobisôna, bi bi nlo i jôs Yérusalem gwét, a ga bet hiki nwii+ i tison inyu ôôp i bisu bi* Kiñe le Yéhôva nu mintôñ mi gwét,+ ni inyu tégbaha ngand Bilap.*+ 17 Ndi ikété biloñ gwobisôna bi hisi, ibale ngim mut i mbet bé i tison inyu ôôp i bisu bi Kiñe le Yéhôva nu mintôñ mi gwét, nop a ga nôl bé nye.+ 18 Ibale litén* li Égiptô li mbet bé i tison, li jôp bé to mu, nop a ga nôl bé jo. Ndi himala hi ga kwél jo, himala Yéhôva a ngwélél inyu bép biloñ bi bi mbet bé i tison inyu tégbaha ngand Bilap. 19 Hala a ga ba kogse inyu béba i Égiptô ni inyu béba i biloñ gwobisôna bi bi mbet bé i tison inyu tégbaha ngand Bilap.

20 “I kel i, bini bibañga le: ‘Libak lipubi li yé li Yéhôva!’+ bi ga ba ntilga mu mangeñee ma bihosi. Yak dibee*+ di di yé ikété témpel Yéhôva, di ga ba dipubhaga kiki biséya+ bi bi yé i bisu bi juu li bisesema. 21 Hiki hibee* hi yé ikété Yérusalem ni ikété Yuda hi ga ba hipubhaga, hi ba ki hi Yéhôva nu mintôñ mi gwét; i bôt bobasôna ba nti bisesema ba ga jôp, ba gwélél dibee dihogi mu inyu lamb binuga. I kel i, man Lôk Kanaan* a ga ba ha bé ikété témpel Yéhôva nu mintôñ mi gwét.”+