Kaat Matéô

18 Ha ngéda i nyen banigil ba bi tiige Yésu bebee, ba kal le: “Njee yaga a yé nunkeñi ikété Ane ngii?”+ 2 Jon a bi sébél mañge ntitigi, a téé nye i ñemkété wap, 3 a kal le: “Me nkal bé maliga le, handugi le ni hielba,* ni yila kiki boñge batitigi,+ ni yé mbén i jôp ikété Ane ngii.+ 4 Jon nu ni nu a’ suhus nyemede kiki mañge ntitigi nunu, nyen a’ ba nunkeñi ikété Ane ngii;+ 5 nu ni nu ki a nleege mañge ntitigi kiki nunu i jôl jem, wee a nleege yak me. 6 Ndi nu ni nu a mboñ le mut wada a baage ikété bôt batitigi* bana ba ba nhémle me, i yé nseñ inyu yé le ba yoñ ngok kôgôl* jagas li nkiiñaha, ba kañ nye yo i joo, ba boñ le a yin i ñem tuye.+

7 “Ngoo ni nkoñ ’isi inyule u gwé mam ma mboñ bôt le ba baage! Ni maliga, ngandak mam y’a ba ndigi i i ga boñ le bôt ba baage, ndi ngoo ni mut nu a yéne bape ngok baagene! 8 Jon ibale woo woñ tole kôô woñ u mboñ le u baage, kit wo, u lep wo.+ I yé we nseñ le u kôhna niñ, u ban-ga woo wada tole kôô wada, iloole u bana moo mo ima tole makôô mo ima, ndi ba leñ we ikété hié hi boga.+ 9 Jam lipe ki, ibale jis joñ li mboñ le u baage, sodol jo, u lep jo. I yé we nseñ le u kôhna niñ ni jis jada iloole ba leñ we ni mis mo ima ikété hié hi Géhéna.*+ 10 Yoña yihe le ni yan bañ to mut wada ikété bôt batitigi bana, inyule me nkal bé le biañgel gwap nyoo i ngii bi ntehe su* u Tata wem nu a yé i ngii hiki ngéda.+ 11* ——

12 “Bé ni nhoñol lelaa? Ibale mut a gwé 100 mintômba ndi wada u nimil,+ baa a’ yék bé mini 99 nyoo i dikôa, a ke i yéñ u u nimil?+ 13 Ibale a nléba ki wo, me nkal bé maliga le a nkon maséé iloo hihéga inyu u a nléba iloo inyu mini 99 mi mi nimil bé. 14 Nlélém jam, Tata wem* nu a yé i ngii a ngwés bé le mut to wada ikété bana bôt batitigi a tjiba.+

15 “Jam lipe ki, ibale manyuñ a mboñ we béba, ke yeelene nye béba yé* bé bo iba ndigi.+ Ibale a ñemble we, wee u ntémbna nye i loñge njel.*+ 16 Ndi ibale a ñemble bé we, yoñ mut wada tole bôt iba ni we inyu boñ le ni njel mbôgi* i bôt iba tole baa, pééna yo ki yo i ba bañ inyu ngim hop.+ 17 Ibale a ñemble bé bo, kal likoda. Ibale a ñemble bé to likoda, wee yoñ nye kiki mut matén+ ni kiki nkottas.+

18 “Me nkal bé maliga le, mam momasôna ni yé le ni téñ hana ’isi m’a ba mam ba mal téñ i ngii, yak mam momasôna ni yé le ni tiñil hana ’isi m’a ba mam ba mal tiñil i ngii. 19 Me nkal ki bé maliga le, ibale bôt iba ikété nan ba nôgla hana ’isi i soohe inyu to limbe jam li gwé mahee, Tata wem nu ngii a’ yônôs jo inyu yap.+ 20 Inyule i homa bôt iba tole baa ba nkodba i jôl jem,+ me yé ha ipôla yap.”

21 Ha nyen Pétrô a bi lo, a bat nye le: “A Nwet, ngélé yañen me nlama nwéhél mankéé i ngéda a mboñ me béba? Baa letee ni ngélé 7?” 22 Yésu a kal nye le: “Me nkal we le, ha letee ni ngélé 7 bé, ndi letee ni 77 ngélé.*+

23 “Inyu hala nyen Ane ngii i nla ba kiki kiñe i i bé yéñ le minkol nwé mi saa mapil map. 24 I ngéda a bi bôdôl yoñ moni a bé bat bo, ba lona nye nkol u a bé bat 10 000 di talént.* 25 Ndi kiki a bééna bé moni i saa, kiñe* yé i ti oda le ba nuñul nye ni nwaa ni bon ni gwom gwobisôna a bééna inyu boñ le kiñe i kôhna moni nwé.+ 26 Ha nyen nkol u kwo ’isi, u ti nye lipém,* u kal le: ‘Hônba me, m’a saa pil wem wonsôna.’ 27 Hala a kônha kiñe ngoo kayéle a nwas nkol u le u kee, a nwéhél ki wo pil wé.+ 28 Ndi i ngéda nkol u bi pam, u yéñ so nkol wé wada u a bé bat 100 dinariô,* a gwel nye ni ngui, a ha nye moo i joo kayéle nhébék u kahal kidi nye, a kalak le: ‘Saa pil wonsôna me mbat we.’ 29 Ha nyen so nkol wé a bi kwo ’isi, a bôdôl soohe nye, a kalak le: ‘Hônba me, m’a saa pil wem.’ 30 Ndi a tjél, kayéle a ke, a boñ le ba ha nye mok letee ni i ngéda a’ mal saa pil wé. 31 I ngéda mini minkol mimpe mi bi tehe i jam li bi tagbe, hala a tééñga bo ngandak kayéle ba ke, ba añle kiñe mam momasôna ma bi tagbe. 32 Ha nyen kiñe i bi om le ba sébél nye, i kal nye le: ‘A béba nkol unu, me bi nwéhél we pil woñ wonsôna i ngéda u bi soohe me. 33 Baa yak we u bak bé le u kon so nkol woñ ngoo kiki me bi kon we ngoo?’+ 34 Ha nyen kiñe i bi unup, i leñ nye i mok* letee ni i ngéda a’ saa pil wé wonsôna. 35 Hala yaga nyen Tata wem nu ngii a’ boñ hiki wada nan+ nu a nwéhél bé maasañ ni ñem wé wonsôna.”+