Kaat Yôhanes

7 I mbus ha, Yésu a kônde kiiña* mu Galiléa, ndi a bé gwés bé boñ hala i Yudéa inyule Lôk Yuda i bé yéñ nol nye.+ 2 Ndi ngand Bilap*+ i Lôk Yuda i bé bebee. 3 Jon lôknyañ+ i bi kal nye le: “Nyodi hana, kenek i Yudéa inyu boñ le yak banigil boñ ba tehe minson u mboñ. 4 Inyule mut to wada a mboñ bé jam jo ki jo bisôsôli i ngéda a nyéñ yiba i mbamba. Ibale u mboñ i mam mana, boñ le nkoñ ’isi u yi we.” 5 Ni maliga, lôknyañ i bé unda le i nhémle bé nye.+ 6 Jon Yésu a bi kal bo le: “Ngéda yem i yé ngi kola,+ ndi bé ni nla boñ hala to imbe ngéda. 7 Nkoñ ’isi u gwé bé njom yo ki yo i oo bé, ndi u ñoo me inyule me mbok mbôgi le minson mi nkoñ ’isi mi yé mimbe.+ 8 Bé beda i ngand; nano bé nyen me mbet inyu ke i ngand inyule ngéda yem i yé ngi tibil kola.”+ 9 Kiki a bi mal kal bo i mam mana, a yégle i Galiléa.

10 Ndi i ngéda lôknyañ i bi bet inyu ke i ngand, yak nye a bet, ha i mbamba bé, ndi bisôsôli. 11 Jon Lôk Yuda i bi bôdôl yéñ nye mu ngand, i kalak le: “I mut nu a yé hee?” 12 Ndi i si ni si, limut li bé pot ngandak inyu yé. Bahogi ba bé kal le: “A yé loñge mut.” Bape ba kalak le: “A ta bé loñge mut. A nyumus limut.”+ 13 Ndi mut to wada a bé pot bé inyu yé i mbamba inyule ba bé kon Lôk Yuda* woñi.+

14 I ngéda ngand i bé i ñemkété, Yésu a bet i témpel, a bôdôl niiga. 15 Ndi Lôk Yuda i bé nhelek, i kalak le: “Hee i mut nunu a nyôñôl i nya yi i Bitilna*+ ini, ki le a bi ke bé i suklu?”*+ 16 Ha nyen Yésu a bi timbhe bo le: “I jam me niiga li ta bé jem ndi li yé li nu a bi ep me.+ 17 Ibale mut a ngwés boñ sômbôl yé,* a’ yi too i mam me niiga ma nlôl yak Nyambe+ tole me mpot ni memede. 18 Nu ni nu a mpot ni nyemede a nyéñ lipém inyu yé nyemede; ndi nu ni nu a nyéñ lipém li nu a bi ep me,+ nyen a yé maliga, to ngitelepsép i ta bé ikété yé. 19 Bé bon Môsi a bi ti Mbén,+ hala bé? Ndi mut to wada ikété nan a nôgôl bé mbén Môsi. Inyuki ni nyéñ nol me?”+ 20 Limut li timbhe le: “U gwé mbuu mbe. Njee a nyéñ nol we?” 21 Yésu a timbhe bo le: “Me bi boñ ndik hélha jam yada, hala a nhélés bébobasôna. 22 Inyu hala nyen Môsi a bi ti bé likwee+—ndi li nlôl bé ni Môsi, li nlôl ni basôgôlsôgôl+—ndi ni nkwee mut yak i kel sabat. 23 Ibale ni nkwee mut i kel sabat inyu boñ le ni bôk bañ mbén Môsi, inyuki ni nlôôha unbene me inyule me mélés mut kon wé wonsôna i kel sabat?+ 24 Ni waa kéés inoñnaga ni yom i nene i mis, ndi ni kéés lôñni telepsép.”+

25 Ha nyen bahogi ikété bôt ba Yérusalem ba bi bôdôl kal le: “Baa i mut nunu bé nyen ba nyéñ nol?+ 26 Ndi nuna-ki! A yé i pot i mbamba, ndi ba nkal bé nye to jam. Baa i nla ba le baéga ba nsôk yi le nyen a yé toi Kristô? 27 Ndi bés di nyi hee i mut nunu a nlôl;+ ndi i ngéda Kristô a’ lo, mut to wada a’ yi bé hee a nlôl.” 28 Kiki a bé niiga i témpel, Yésu a bédés kiñ, a kal le: “Ni nyi me, ni nyi ki i homa me nlôl. Me bi lo bé ni memede,+ ndi Nu a bi ep me a niñ toi, ndi bé ni nyi bé nye.+ 29 Me nyi nye,+ inyule me yé nu a nlôl i jôl jé, a lôlak i nyeni; nye ki nyen a bi ep me.” 30 Jon ba bi bôdôl yéñ njel i gwel nye,+ ndi mut to wada a bi ha bé nye moo, inyule ngeñ yé i bé ngi kola.+ 31 To hala, ngandak bôt ikété limut i bi hémle nye,+ i kalak le: “I ngéda Kristô a’ loo, baa a’ boñ bihélha bi mam iloo kiki i mut nunu a mboñ?”

32 Farisai i bi emble limut li mpot i mam mana i si ni si inyu yé; ha nyen baéga biprisi lôñni Farisai ba bi ep batat* inyu gwel* nye. 33 I mbus, Yésu a kal le: “M’a ba ki lôñni bé inyu ndék ngéda ilole me nke yak Nu a bi ep me.+ 34 N’a yéñ me, ndi n’a tehe bé me; to i homa me yé, ni nla bé lo.”+ 35 Jon Lôk Yuda i bé kalna le: “Hee i mut nunu a nsômbôl ke, kayéle di tehe ha bé nye? Baa a nsômbôl ke yak Lôk Yuda i i niñ ipôla bôt ba Grikia inyu boñ le a niiga yak bôt ba Grikia? 36 Kii a nyéñ kal i ngéda a mpot le: ‘N’a yéñ me, ndi n’a tehe bé me; to i homa me yé, ni nla bé lo’?”

37 I hilo hi nsôk, hilo hikeñi hi ngand,+ Yésu a telep, a bédés kiñ, a kal le: “Ibale nyus i gwé mut, a loo i meeni, a nyo.+ 38 Kiki tilna i nkal inyu nu ni nu a nhémle me le: ‘Malép ma niñ m’a pémél ikétékété yé, ma kulak.’”+ 39 Ndi a bé pot inyu mbuu mpubi, u ba ba nhémle nye ba bé bebee ni kôhna; inyule ipam ha ngéda i, ba bé ngi kôhna mbuu mpubi+ inyule Yésu a bé ngi yoñ tel yé i lipém.+ 40 Bahogi ikété limut, ba ba bi nok bibañga bi, ba bôdôl kal le: “Nunu toi nyen a yé Mpôdôl nu a nlama lo.”+ 41 Bape ba bé kal le: “Kristô nunu.”+ Bape ki ba kalak le: “To! Kristô a nlôl bé i Galiléa, hala bé?+ 42 Baa tilna i nkal bé le Kristô a nlôl i mbôda David+ ni i Bétléhém,+ i mbai David a bé lôl?”+ 43 Jon limut li bi bagla inyu yé. 44 To hala, bahogi ikété yap ba bééna ngôñ i gwel nye,* ndi mut to wada a bi ha bé nye moo.

45 I mbus hala, batat ba témb yak baéga biprisi ni Farisai; ha nyen ba bi bat batat le: “Inyuki ni nlona bé nye?” 46 Batat ba timbhe le: “Mut to wada a ma pot bé i nya ini.”+ 47 Ha nyen Farisai i bi kal bo le: “Baa a nyumus yak bé? 48 Mut to wada ikété baéga to ikété Farisai a nhémle bé nye, hala bé?+ 49 Ndi i limut lini, li li nyi bé mbén Môsi, li yé ntiihege.” 50 Nikôdémô nu a bi lo i tehe nye i ngéda bisu, nu a bé ki wada wap, a kal bo le: 51 “Inoñnaga ni mbén Môsi, ba mbagal bé nkaa u mut bo ngi emble nye ni yi i yom a yé i boñ, hala bé?”+ 52 Ba timbhe nye le: “Baa yak we u yé mut Galiléa? Yéñ, ndi w’a tehe le mpôdôl to wada a’ pémél bé i Galiléa.”*