Hiôb

 2 “I mam me nôgda mon ma ntinde me i timbhe,

inyule ñem u nlék me.

 3 U nsol me ni bibuk gwoñ;

ndi me nlama timbhe inyule me gwé bañga yi.*

 4 Ibabé pééna, u nyi i jam lini loñge,

inyule ibôdôl kiki mut binam* a yé hana ’isi, hala nyen mam ma yé ndigi:+

 5 Diléla di béba mut di nhoo mal,

yak maséé ma mut a nti bé Nyambe lipém* ma nom ndik ndék ngéda.+

 6 To ibale ngôk wé u mbet ipam i ngii,

yak ño wé u tihbaga ond,

 7 a’ ba ha bé i boga ni boga, kiki tjibi tjé;

i bôt ba bé tehe nye b’a bat le: ‘A yé hee?’

 8 Ba ga pala hôya nye* kiki eem, ba ga léba ha bé nye;

b’a luhul nye kiki yiinda mut a ntehe juu.

 9 I jis li bé béñge nye, li ga béñge ha bé nye,

to homa wé liyééne a ga tehe ha bé nye.+

10 Bon bé b’a yemhe diyeyeba le di kônôl bo ngoo,

nyemede nyen* a ga timbhe bôt i gwom gwobisôna a bi yoñ i boni.+

11 Bihés gwé bi bé nyonok ni ngui i mañge wanda,

ndi a ga témb* i biték ni ngui yé yosôna.

12 Inyu yé, i boñ béba i yé kiki i je bijek bi ne,

a nsôô yo mu isi hilémb hié,

13 a nwaa bé je yo, a nwaa bé to nok line jé,

a téédaga ndik yo mu nyo wé,

14 ndi i ngéda bijek gwé bi njôp i libum jé;

bi nyila kiki mbôñ* i nsiñ nyoo ikété yé.

15 A mil nkus, ndi a ga lo wo;

Nyambe a ga boñ le libum jé li ba hôlô.

16 A’ nyuñ mbôñ i nsiñ nyoo;

masoñ* ma péé m’a nol nye.

17 A’ tehe ha bé diléléba,

to balom ba wéi, to balom ba bota.

18 A ga timbhe bôt nkus wap ibabé le a bôñôl* wo;

a ga gwélél bé nseñ a ga kôs mu nyuñga+ yé.

19 Inyule a bi kok diyeyeba, a tjôô ki bo;

a kadal ki ndap a bi oñ bé.

20 Ndi ñem wé u ga ba bé nwee to ndék;

nkus wé u ga tohol bé nye.

21 A gwé ha bé yom a milba;

jon loñge yé niñ i ga nom bé.

22 I ngéda nkus wé u ga ba toi ngandak, ha nyen a’ lôôha bana nduña,

bikuu gwobisôna bi ga kwél nye.

23 I ngéda a’ yônôs libum jé,

Nyambe a ga om hiun hié le hi kwél nye;

kiki nop, mam mabe m’a kwél nye.

24 I ngéda a ga ke bijôl bi gwét bi bi yé ni kei* ngwéé,

ha nyen makoñ ma mpihlôñgô, ma ma yé ni mamuna, ma ga ôm nye.

25 A nup likoñ i mbus yé,

a nhéya ki jôl gwét i i mbai ngandak mu libaa jé,

ha nyen woñi u ngwel nye.+

26 A ga nimis masôô mé ma nkus momasôna;*

i hié mut to wada a nkoda bé hi ga ligis nye;

bikuu gwon bi mbem i mut a ga pei mu ndap yé libadô.

27 Ngii i ga yelel hihôha hié;

yak hisi hi ga kolba nye.

28 Malép m’a hôl, ma kulna ndap yé,

hundul malép i i ga ba i hilo hi hiun hi Nyambe.*

29 I mam mana mon Nyambe a ntéédana béba mut,

i ngababum ini yon Nyambe a mbiine nye.”