Yérémia
49 Inyu Lôk Amôn,+ haana nyen Yéhôva a mpot:
“Baa Israel a gwé bé bon bôlôm?
Baa a gwé bé nkôdôlbum?
Inyuki bôt bé ba nyééne i bitison bi Israel?”
2 “‘Inyu hala nyen, dilo di ga lo,’ hala nyen Yéhôva a mpot,
‘me ga boñ le nlondok u gwét u léña inyu jôs tison i Lôk Amôn+ le Raba.+
A ga yila nwind binan,
yak minkoñ nwé* mi ga lék.’
‘Israel a ga kadal nkoñ u bôt ba bi kadal nye nkoñ,’+ hala nyen Yéhôva a mpot.
3 ‘A Hesbôn, bégél inyule Ai a ntjiba!
A minkoñ mi* Raba, londa.
Habnana minsugut.
4 A ngond i i téé bé sép, inyuki minsôsôgô* nwoñ
ni bitegep gwoñ bi mambok bi bi nkuli malép, bi mboñ we le u nyegep,
a we nu u mbôdôl nkus woñ ñem,
u kalak le: “Njee a nla lo i jôs me?”’”
5 “‘Me ga lona jam li li nkônha woñi i weeni,’ hala nyen Nwet Bayemlikok, Yéhôva nu mintôñ mi gwét a mpot,
‘I jam li li ga lôl i biloñ gwobisôna bi yé we ipañ.
Ni ga tjama bipes gwobisôna,
mut nye ki nye a ga kot bé i bôt ba nke ngwéé.’”
6 “‘Ndi i mbus ngéda, me ga kot bon ba Lôk Amôn ba ba bi ke i minkôm,’ hala nyen Yéhôva a mpot.”
7 Inyu Édôm, haana nyen Yéhôva nu mintôñ mi gwét a mpot:
“Baa pék i ta ha bé i Téman?+
Baa maéba malam ma bôt ba gwé yi ma mal?
Baa pék yap i mal?
8 Sona, kena ngwéé!
Ke solbana ikété bihôk bi bi yé ikété ’isi, a bôt ba nyééne i Dédan!+
Inyule me ga lona Ésau bikuu
i ngéda ngeñ y’a kola le me kogse nye.
9 Ibale baket matam ma nkôô wai ba nlo i weeni,
baa ba ga yék bé ndék matam le bôt bape ba bada mo?
Ibale bôt ba wip ba nlo juu,
ba ga nip ndik i gwom bi nkon bo ngôñ.+
10 Ndi me, m’a yoñ gwom bi Ésau gwobisôna.
M’a yelel masolbene mé,
a ga la ha bé solop.
11 Yigle me bon boñ ba ba gwé bé basañ,
m’a tééda bo i niñ,
biyik gwoñ bi bôda bi ga bôdôl me ñem.”
12 Inyule haana nyen Yéhôva a mpot: “Nun-ki! I bôt ba bi kôhna bé kogse le ba nyo libôndô li hiun, ibale ba yé nyégsaga i nyo jo, baa wen w’a pei kogse? To, w’a pei bé kogse, w’a nyo yaga jo.”+
13 “Inyule me nkum soñ ni memede,” hala nyen Yéhôva a mpot, “le Bôzra a ga yila yom bilim,+ yom i hison, homa nu a yé ntjék, yom i ndiihe; yak bitison gwé bi ga tjiba i boga ni boga.”+
14 Me bi nok nwin u nlôl yak Yéhôva,
nlegelnwin a bi ôma ikété biloñ inyu kal le:
“Kodbana, lona i jôs nye;
kôôbana gwét.”+
15 “Nun-ki! Me mal yilha we yañga jam ikété biloñ;
bôt ba mba ba nyan we.+
16 U bé kônha bôt woñi,
u ban-ga ñem ngôk, hala a bi lugha we,
a we nu u nyééne ikété bihôk bi maaa,
u yéénege i hikôa hi yé i ngingii.
To ibale kiki nyôgôl, u ñoñ jumbul joñ i homa a yé i ngii,
m’a suhul we hana isi,” hala nyen Yéhôva a mpot.
17 “Édôm a ga yila yom bilim.+ Hiki mut a ga tagbene nyoo, a ga hel, nyuu i kôp nye disuhuu, a hem ki hiôa inyu bikuu gwobisôna bi ga kwél nye. 18 A ga ba kiki i ngéda Sôdôm ni Gômôra ni bitison bi bé ha bebee bi bi tjiba;+ mut nye ki nye a ga yééne ha bé nyoo, mut nye ki nye a ga ba ha bé to nyoo,”+ hala nyen Yéhôva a mpot.
19 “Emblana! Mut a ga lo i tjé bahoma ba njéhne bilém, kiki mbondo njéé+ i mpémél i put lipan nu a yé i mbaa Yordan. Kunda yada, me ga boñ le ba so loñ yap. Me téé mut me mpohol le a ane yo. Inyule njee a yé kiki me, njee a nla suu me sañ? Numbe ntééda mintômba a nla kolba me?+ 20 Inyu hala nyen a bôt, emblana makidik* Yéhôva a nyoñ inyu kogse Édôm, ni mahoñol a gwééne bôt ba nyééne i Téman:+
ibabé pééna, bon ba mintômba ba bémba ba ga ke haa.
Inyu maboñok map mabe, a ga yilha mayééne map hôlô.+
21 Mbimba i tjiba yap i mboñ le hisi hi nyeñg.
Ñ, minlondok mi yé!
Mbimba i mpam letee ni i tuye Nkôibaga.+
22 Kiki nyôgôl u mbet i ngii; i mbus, u sôs, u pude nuga,+
hala nyen ñoo a ga sambal bipapai gwé, a pude Bôzra.+
I yokel nu, miñem mi bisônda bi Édôm
mi ga yila kiki ñem u muda nu a nkôôga.”
23 Inyu Damaskô:+
“Hamat+ ni Arpad ba nwo nyuu,
inyule ba nok béba nwin.
Ba nkon woñi.
Tuye a mpuñgla, a nla bé mom nwee.
24 Damaskô a nimis makénd.
A nhielba inyu ke ngwéé, ndi a nyôm.
Njiiha ni njôghe bi gwé nye
kiki muda nu a nkôôga.
25 Inyuki bôt ba ngi yii munu
tison i lipém, tison i maséé?
26 Inyu hala nyen boñge bé ba wanda ba ga kwo i minloñ,
bisônda gwé gwobisôna bi ga wo i yokel nu,” hala nyen Yéhôva nu mintôñ mi gwét a mpot.
27 “Me ga ha lipénd li Damaskô hié,
hi ga ligis minkum mi mandap mi Ben-Hadad.”+
28 Inyu Kédar+ ni biane bi Hazôr, bi Nébukadnézar* kiñe Babilôn a bi yémbél gwét, haana nyen Yéhôva a nkal:
“Telbana, ni bet i Kédar,
nola bon ba pes Likôl.
29 Kadlana bilap gwap ni bibémba gwap,
mandap map ma mabadô ni nkus wap wonsôna.
Ni kena yak kamél yap,
bôt ba ga lond, ba kalak bo le: ‘Woñi u yé homa nyensôna!’”
30 “Kena ngwéé, kena haa!
A bôt ba nyééne i Hazôr, ke solbana i bihôk bi maaa,” hala nyen Yéhôva a mpot.
“Inyule Nébukadnézar* kiñe Babilôn a yé i ôt minsoñgi inyu jôs bé gwét,
a gwé likeñge a nlama gwélél inyu jôs bé.”
31 “Telbana, kena i jôs loñ i i yé ikété nsañ,
loñ i i nkon bé yom yo ki yo woñi!” Hala nyen Yéhôva a mpot.
“I gwé bé makôga to bihimbil; i yé mbaglak ni biloñ bipe.
32 Bôt ba ga kadal kamél yap,
ba ga kena ki bibémba gwap bikeñi.
I bôt ba nkit tjôñ i mapañ ma ño,+
me ga sand bo bipes gwobisôna,*
me ga boñ le bikuu bi kwél bo bipes gwobisôna,” hala nyen Yéhôva a mpot.
33 “Hazôr a ga yila liyééne li dibaa di njéé,
a ga yégle hôlô i boga ni boga.
Mut nye ki nye a ga yééne ha bé nyoo,
mut nye ki nye a ga ba ha bé to nyoo.”
34 I bibañga bini gwon Yéhôva a bi kal mpôdôl Yérémia inyu Élam,+ i bibôdle bi ane i Sédékia,+ kiñe Yuda: 35 “Haana nyen, Yéhôva nu mintôñ mi gwét a mpot: ‘M’a bôk mpihlôñgô u Élam,+ u u nti nye ngui.* 36 Me ga yoñ mbebi yo ina i i nlôl i makas ma ngii mo ma-na, me lona yo i Élam, me ga boñ le i mbebi i yosôna i sand bôt bé. Bôt ba Élam ba ga tjama ni biloñ gwobisôna kayéle loñ to yada i ga yégle bé.’”
37 “Me ga boñ le bôt ba Élam ba sehla i bisu bi baoo bap, ni i bisu bi bôt ba nyéñ nol bo;* me ga boñ le bikuu ni hiun hiem hikeñi bi kwél bo,” hala nyen Yéhôva a mpot. “Me ga boñ le pansoñ i noñ bo letee me sas bobasôna.”
38 “Me ga téé yééne yem ane i Élam,+ me tjé ki kiñe yé ni baane bé,” hala nyen Yéhôva a mpot.
39 “Ndi i dilo di nsôk, me ga kot bôt ba Élam ba ba bi ke i minkôm,” hala nyen Yéhôva a mpot.