Hiôb
22 Élifas,+ man Lôk Téman, a timbhe le:
2 “Baa mut binam a nla bane Nyambe nseñ?
I mut a gwé pék, baa a nla bane nye mahee?+
3 Hala a nkal kii Nu ngui yosôna* ibale u téé sép?
Tole, hala a nhôla kii nye ibale u yé ngi nsohi?+
4 Baa a ga kogse we,
a kena ki we i bikééhene inyule u nkon nye woñi?
5 Baa i ta bé inyule u mboñ béba ikeñi,
ni inyule u nwaa bé boñ dihôha?+
7 I mut a yé nwaak, u nti bé nye malép,
to i mut a yé njal, u nim nye bijek.+
8 Mimpémba mi bôt+ kiki we nwon mi gwé loñ,
mintôô mi bôt ki nwon mi nyééne mu.
9 Ndi u bi huuha biyik bi bôda moo nso,
u kok yak moo ma bon ba nyuu.*
10 Inyu hala nyen tjandi*+ di nkéña we,
yak ngandak woñi i nkwél we kunda yada;
11 inyu hala nyen jiibe likeñi li mboñ le u ntehe ha bé to yom,
yak ngandak malép i nhô we.
12 Baa Nyambe a ta bé i bahoma ba nyôgi ba ngii?
Béñge ki lelaa tjôdôt tjodisôna di nyôgi.
13 Ndi u nkal le: ‘Nyambe a nyi yaga kii?
Baa a nla pémés mbagi, a bak ikété jiibe likeñi?
14 Ond i nhô nye kayéle a ntehe bé to yom
i ngéda a nke a kiiñaga nyoo i ngii.’
17 Bo ni bon ba bé kal bañga Nyambe le: ‘Nwas bés nwee!’
Ba kalak ki le: ‘Nu ngui yosôna a nla boñ kii bés?’
18 Ndi ki le Nyambe nyen a bi yônôs mandap map ni gwom bilam.
(I mahoñol mabe mana ma yé haa ni mahoñol mem.)
19 Mut a téé sép a ga tehe tjiba yap, a kon maséé,
yak mut nginsohi a ga nol bo hiol, a kalak le:
20 ‘Baoo bés ba ntjiba,
yak hié hi ga ligis gwom gwap gwobisôna.’
21 Nigil i yi Nyambe, ha nyen u ga niñ ni nsañ,
u kôhna ki gwom bilam.
22 Neebe mbén i i mpémél mu nyo wé,
tééda ki bibañga gwé mukété ñem woñ.+
23 Ibale u ntémb yak Nu ngui yosôna, mam moñ m’a témb ma kee loñge;
ibale u nhéya ngitelepsép mu ndap yoñ libadô,+
24 ibale u nleñ gôl yoñ* i hisi,
u lep yak gôl i Ôfir+ mu maaa ma nsôsôgô,*
25 ha nyen Nu ngui yosôna a ga yila gôl yoñ,*
a ba ki bañga yoñ silba.
26 Inyule ha ngéda i nyen Nu ngui yosôna a ga ba maséé moñ,
u ga pa ki su woñ i bisu gwé.
27 U ga yemhe nye, a emble we;
u ga yônôs ki makak moñ.
28 U ga yônôs i mam momasôna u nkit le u mboñ,
yak mapubi ma ga béyéi njel yoñ.
29 Inyule i ngéda u ga pot ni ngôk, ba ga wéha we nyuu,
ndi Nyambe a ga tohol bôt ba suhulnyuu.*
30 A ga sôñ i mut nu a yé nginsohi;
jon ibale moo moñ ma mpôp, u ga pei ibabé pééna.”