Hiôb
3 Baa i ga lôôha yemhe we,
to pôdôs we ni liyômba?
4 Baa i ga boñ malômbla ni we,
le ndi u yilha yo nkol woñ niñ yé yosôna?
5 Baa u ga tuk ni yo kiki mut a ntuk ni hinuni,
to kañ yo inyu nôlha dingongonda tjoñ?
6 Baa balop tjobi ba ga nuñul yo?
Baa bôt ba nyuñga ba ga kabna yo?
7 Baa u ga tôp kôgôô yé ni makoñ,+
to tôp ño wé ni makoñ?
8 Bii le woo woñ i ngii yé;
u ga bigda i sañ i, u boñ ha bé hala kekikel!
9 I mut a nhoñol le a nla yémbél yo, a tumbba yañga.
Ibale u ntehe ndik yo, ñem u ga bôô we matjél.*
10 Lôs mut i ta bé le i nyumbla yo.
Njee ni a yé le a telep i bisu gwem?+
11 Njee a bi bôk a ti me yom le ndi yak me, me timbhe nye yo?+
I gwom gwobisôna bi yé hana ’isi bi yé gwem.+
12 M’a yip bé nyo, me ta bé le me tjél pôdôl bijô gwé bi nyuu,
to lipémba jé, to maôñg mé malam.
13 Njee a bi héya yo mbot yé ngii?
Njee a ga jôp ikété mañg nwé i ngéda mi néhi?
14 Njee a nla yibil makôga ma nyo* wé?
Masoñ mé ma nkônhana woñi.
15 Mbus yé i gwé minlôñ mi maloi,*
mi mi yé ñadak loñge loñge.
16 Hiki liloi jada mu li édi yaga ni lii lipe,
kayéle to mbebi i nla bé tagbe ipôla yap.
17 Momasôna ma édi yaga bas bas;
ma ngwelbana loñge kayéle ma nla bé bagla.
18 Tjiimbe yé i nwégés mapubi,
yak mis mé ma mbai kiki mapubi ma maye ma kel.
19 Banwegnwek ba nwek mu nyo wé,
yak njanjat i mpémél mu.
20 Hiida hi mpémél mu mben yé môl
kiki biloloo le ba nha i juu.
21 Nhébék wé u mboñ le makalak ma yoñ hié,
yak lindômbôô li hié li mpémél mu nyo wé.
22 Lipémba jé li yéne mu joo jé,
hiki mut a ntehe yo, a nkon woñi, a kee ngwéé.
23 Manyeda ma kôgôô yé ma édi bas bas;
ma nlet kôñ kôñ wengoñle ba bi bañ mo ni ñôôg kei, kayéle ma nla bé piñgla.
24 Ñem wé u nlet kiki ngok,
ñ, u nlet yaga wengoñle ngok kôgôl i i yé isi ngok kôgôl ipe.
25 I ngéda i ntelep, yak mimpémba mi bôt mi nsehla;
i ngéda i nyiñgha ni ngui, i nkônhana woñi.
26 Mut to wada a nla bé yémbél yo ni pansoñ,
to ni likoñ, to ni nsoñ likoñ, to ni jôl gwét ipe.+
27 I ntehe kei* kiki minumuk mi bikai,
i ntehe ki mamuna wengoñle mbolok kék.
28 Likoñ li nkis bé yo ngwéé;
inyu yé, dibaña di ndamb di yé kiki minumuk mi bikai.
29 I ntehe mboñgo kék wengoñle minumuk mi bikai,
i ngéda i nok liyôgbe li makoñ, i nol hiol.
30 Si yé libum i yé kiki bipes bi mabôi bi bi nlôôha hoo;
i nsambla mu ndobo wengoñle kak ba ntidil kôn.+
31 I mboñ le ndip malép i pél wengoñle hibee;
i mbôô ki tuye kiki ba mbôô hibee hi labinda.
32 I ngéda i ntagbe homa mu ngii malép, i homa nu a nyégle a mbai.*
Mut a yé le a hoñol le ndip malép i yé kiki ño mbu.
33 Yom ipe i ta bé kiki yo hana ’isi,
i yé nuga i i nkon bé woñi.
34 I nkon bé woñi i nun to imbe nuga i i yé ngôk.
I yé kiñe i mimpémba mi binuga bi bikai nwominsôna.”