Yésaya
21 Mbagi kogse inyu ñoñ u u yé kiki tuye:*+
kiki mbuk mbebi nu a nhôñ i nwelmbok, a sahak gwom gwobisôna,
ndutu i nlôl i ñoñ, loñ i i nkônha woñi.+
2 Me ntehe yiinda i i nkônha woñi:
Mut nliba a nliibana bôt,
yak ntjé-bôt a ntjé bôt.
Bedek, a Élam! Kéña tison, a Média!+
M’a mélés i ndutu yosôna a nôgha bôt.+
3 Inyu hala nyen me nsiida ngandak.*+
Nkôôga u gwé me,
kiki muda nu a nsômbôl gwal.
Me nok njôghe ngandak kayéle maôô mem ma noga bé;
me nok njôghe ngandak kayéle mis mem ma ntehna bé.
4 Ñem u mpabla me; nyuu i nsehla me inyule me nkon woñi.
U u me bemek le u sude, wo unu u nkahal kônha me woñi.
5 Kôôbana téblé, tega biyééne!
Jena, nyona!+
Telbana a baane, hoa biben môô!
6 Inyule Yéhôva a nkal me le:
“Ke téé mut faa, a kal i yom a ntehe.”
7 A bi tehe kak gwét le bihosi bi ñôt,
kak gwét le magas ma ñôt,
kak gwét le kamél i ñôt.
A yoñok ngéda i béñge loñge loñge.
8 I mbus, a kônd kiki mbondo njéé le:
“A Yéhôva, me téé i ngii nkum ntat ngéda yosôna njamuha,
me yé i faa hiki u.+
9 Béñgnana i jam li yé i njel:
bôt ba bédi i ngii kak gwét le bihosi bi ñôt!”+
I mbus, a pot makeñi le:
“A mal kwo! Babilôn a mal kwo!+
Mintjok mi biôñgba nwominsôna mi banyambe bé mi nkwo ’isi, mi nyugda!”+
10 A litén jem, we nu ba bi tét kiki blé,
we nu u yé mimbom* mi litidil jem,+
me ñañle we i jam me bi nok yak Yéhôva nu mintôñ mi gwét, Nyambe nu Israel.
11 Mbagi kogse inyu Duma* ini:
Mut a yé i sébél me, a bak i Séir:+
“A mut faa,* ngeñ yañen i ngi yii ilole kel i nye?
A mut faa, ngeñ yañen i ngi yii ilole kel i nye?”
12 Mut faa a timbhe le:
“Kel i yé bebee ni ye, yak u u yé bebee ni sude.
Ibale ni nsômbôl bat mbadga, bada.
Tiimbana lo!”*
13 Mbagi kogse inyu tegep mbok i i yé i ñoñ:
N’a tégbaha u i lipan, i tegep mbok i i yé i ñoñ,
a bôt ba Dédan+ ba ni nke liké i ngii kamél.
14 I mut nyus malép i gwé, tina nye malép,
a bôt ba nyééne i loñ Téma,+
i bôt ba nke nyemb ngwéé, tina bo bret.
15 Inyule ba bi ke pansoñ ngwéé, pansoñ le ba mpémés i sogoo yé;
mpihlôñgô u u yé bebee ni leñ likoñ, yak ni mbimba i gwét, ba bi ke gwo ngwéé.
16 Inyule Yéhôva a bi kal me le: “I ngi yii nwii wada, kiki mut bôlô a nsoñgol nwii,* lipém li Kédar+ jolisôna li ga mal. 17 I baleñ mimpihlôñgô ba ga yégle ikété bôt ba gwét ba Kédar, ba ga ba ndék inyule Yéhôva, Nyambe nu Israel, a mal pot.”