Yérémia

7 I bibañga bini gwon Yéhôva a bi kal Yérémia: 2 “Telep i nwemel u témpel Yéhôva, u legel i nwin unu le: ‘Emblana lipôdôl li Yéhôva, a bé bôt ba Yuda bobasôna, bé ba ni njubul munu manwemel mana inyu ôôp i bisu bi Yéhôva. 3 Haana nyen Yéhôva nu mintôñ mi gwét, Nyambe nu Israel a nkal: “Héñhana bilem binan ni maboñok manan, ndi m’a nwas le ni yén hana homa nunu.+ 4 Ni bôdôl bañ bipôdôl bi bitembee ñem, ni kal bañ to le: ‘Témpel Yéhôva* i yé nga hana, témpel Yéhôva i yé nga hana, témpel Yéhôva i yé nga hana?’+ 5 Héñhana toi bilem binan ni maboñok manan; tiblana bagal nkaa ipôla mut ni maasañ;+ 6 ni tééñga bañ bakén ba bôt, to bon ba nyuu,* to biyik bi bôda;+ ni kôp bañ matjél ma bôt ba yé nginsohi hana, ni nôgôl bañ to banyambe bape inyu yiñil bébomede ndutu;+ 7 ha nyen me ga nwas le ni yén hana homa nunu, i loñ me bi ti basôgôlsôgôl banan i boga ni boga.”’”*

8 “Ndi ni mbôdôl bipôdôl bi bitembee ñem,+ bi ga lona bé bé to yom. 9 Ni mbéna nip,+ ni nolok, ni kenek i ndéñg, ni kumuk soñ bitembee,+ ni tinak Baal+ bisesema,* ni nôglak banyambe ni nyi bé; 10 ni nhoñol le ni nla boñ i mam ma nyega mana momasôna; i mbus, ni loo ni telep i bisu gwem munu ndap ini i bééga jôl jem, ni kalak le: ‘Di ga kôhna tohi?’ 11 Baa i ndap ini i bééga jôl jem i nyila hôk i mintonba i mis manan?+ Ñ, hala nyen me yé i tehe,” hala nyen Yéhôva a mpot.

12 “‘Kena i homa wem nyoo i Silô,+ i homa a bé a bééga jôl+ jem i ngéda bisu; ni tehe i jam me bi boñ nyoo inyule bôt ba litén jem Israel+ ba bé boñ mam mabe. 13 Ndi ni bi waa bé boñ i mam mana momasôna,’ hala nyen Yéhôva a mpot, ‘to hala kiki me bi pôdôs bé, me podok, me tiimbaga,* ni bi nôgôl bé.+ Me bi sébél bé, me waa, ndi ni bi timbhe bé.+ 14 Inyu hala nyen, i jam me bi boñ i Silô,+ jon me ga boñ i ndap ini i bééga jôl jem,+ i ni mbôdôl ñem;+ jo ki jon me ga boñ i homa nunu me bi ti bé ni basôgôlsôgôl banan. 15 Me ga luhul bé i bisu gwem, kiki me bi luhul lôkisoñ nan yosôna, mbôda Éfraim yosôna.’+

16 “Ndi we, u soohe bañ inyu litén lini. U lôndôl bañ me, u soohe bañ, u yemhe bañ to me inyu yap,+ inyule me ga emble bé we.+ 17 Baa u ta bé i tehe mam ba mboñ i bitison bi Yuda ni i minloñ mi Yérusalem? 18 Bon bôlôm ba ntjap tjéé, basañ ba koda hié, bôda ba bôô flawa, ba lamb bikoga le ba ga sémél Kiñemuda nu ngii,*+ ba nti ki banyambe bape makébla ma wai, inyu unbaha me.+ 19 ‘Ndi baa men ba mboñ béba?’* Hala nyen Yéhôva a mbat. ‘To! Ba mboñ bomede béba, ba ga kon hison!’+ 20 Inyu hala nyen Nwet Bayemlikok le Yéhôva a nkal le: ‘Nuna-ki! Me ga kôp hiun hiem ni liyot jem munu homa nunu,+ me ga kôp hio mut ni nuga, bie bi bi num matam ni bijek bi bi ño ’isi; hiun hiem hi ga kala, hi ga lém bé.’+

21 “Yéhôva nu mintôñ mi gwét, Nyambe nu Israel, a nkal le: ‘Kôndnana bisesema binan bi ntul i hié mu bisesema binan bipe, bébomede ni je ki minsôn mi binuga.+ 22 Inyule i kel me bi nyodna basôgôlsôgôl banan i loñ Égiptô, me bi pôdôs bé bo, to ti bo oda i i mbéñge bisesema bi ntul i hié ni bisesema bipe.+ 23 Ndi i oda ini yon me bi ti bo: “Nôglana kiñ yem, ndi m’a yila Nyambe nan, yak bé n’a yila litén jem.+ Ni nlama nôñôl i manjel momasôna me ga unda bé, inyu boñ le mam ma kee loñge inyu nan.”’+ 24 Ndi ba bi emble bé, ba bi sédi bé to ôô;+ njel i bipék* gwap bibe yon ba bi noñ, ba bi nai le ba mboñ ndik mam miñem nwap mimbe mi bé kal bo,+ ba bi bana bé maboñok malam, ndik maboñok mabe, 25 ibôdôl i kel basôgôlsôgôl banan ba bi nyodi i Égiptô letee ni len.+ Jon me bi ômle bé bagwélél bem bobasôna le bapôdôl, me bé om bo hiki kel, me omok, me tiimbaga.*+ 26 Ndi to hala, ba bi tjél emble me, ba bi sédi bé maôô.+ Ba bi nai ni ndok,* ba boñ yak mam mabe iloo basôgôlsôgôl bap!

27 “W’a añle bo bipôdôl bini gwobisôna,+ ndi ba ga nôgôl bé we; w’a sébél bo ndi ba ga timbhe bé we. 28 W’a kal ki bo le: ‘I loñ ini i bi nôgôl bé Yéhôva Nyambe wap, i bi tjél ki le a kodol bo. Maliga ma ta ha bé, mut nye ki nye a nsima ha bé to mo.’*+

29 “Kit mimbôñgô nwoñ mi tjôñ,* u lep nwo; ke tôp hiémbi hi maéya nyoo i dikôa di di gwé bé bikai, inyule Yéhôva a ntjél bôt ba hiai hini ba ba bi unbaha nye, a ga tjôô ki bo. 30 Yéhôva a nkal le: ‘Litén li Yuda li mboñ mam ma yé mabe i mis mem. Ba bi téé bisat gwap bi nyega ikété ndap i bééga jôl jem inyu hindis yo.+ 31 Ba bi oñ bahoma ba nyôgi i Tôfet, nu a yé mu nsôsôgô u man Hinom;*+ inyu ligis bon bap bôlôm ni bon bap bôda,+ me bi ti bé bo oda le ba boñ i jam li, li bi lo bé to me i mahoñol.’*+

32 “Haana nyen Yéhôva a mpot: ‘Nuna-ki! Ngéda y’a lo le ba ga sébél ha bé i homa nunu le Tôfet, to nsôsôgô u Man Hinom,* ndi nsôsôgô u Manola. Ba ga jô bôt i Tôfet letee homa a nene ha bé.+ 33 Dinuni di ngii ni binuga bi bikai bi ga je mim mi bôt ba litén lini, mut a ga ba bé ha inyu luhul bo.+ 34 M’a mélés maséé ni diléla, kiñ i munlôm nu a mbii muda ni i muda nu a nke libii+ i bitison bi Yuda ni i minloñ mi Yérusalem, inyule me ga sas loñ yosôna.’”+