Yérémia

28 I nlélém nwii, i bibôdle bi ane i Sédékia,+ kiñe Yuda, hala wee i sôñ i nyônôs itan i nwii mi nyônôs mina mi ane yé; mpôdôl Hanania man Azur, mut Gibéôn,+ a bi pôdôs me i témpel Yéhôva i bisu bi biprisi ni bôt ba litén bobasôna, a kal le: 2 “Haana nyen Yéhôva nu mintôñ mi gwét, Nyambe nu Israel, a mpot: ‘Me ga bôk kop nson i kiñe Babilôn.+ 3 Ilole nwii ima mi ntagbe,* m’a témbna bisélél bi témpel Yéhôva gwobisôna hana homa nunu, i bisélél Nébukadnézar, kiñe Babilôn, a bi yoñ hana homa nunu, a kena i Babilôn.’”+ 4 “‘M’a témbna ki Yékônia+ man Yéhôyakim,+ kiñe Yuda, hana homa nunu, nye lôñni bôt ba Yuda bobasôna ba ba bi ke minkôm i Babilôn,’+ hala nyen Yéhôva a mpot, ‘inyule m’a bôk kop nson i kiñe Babilôn.’”

5 Ha nyen mpôdôl Yérémia a bi timbhe mpôdôl Hanania i bisu bi biprisi ni bôt ba litén bobasôna ba ba bé ba téé i témpel Yéhôva. 6 Mpôdôl Yérémia a kal le: “Amen!* Yéhôva a boñ hala! Yéhôva a yônôs mam momasôna u mpot, a témbna bisélél bi témpel Yéhôva hana homa nunu, yak ni bôt bobasôna ba bi ke i minkôm. 7 Ndi soho emble i nwin unu me nsômbôl legel bé, we ni bôt ba litén bobasôna. 8 I ngéda kôba, bapôdôl ba ba bi bôk me ni we i bisu ba bi legel manwin ma gwét, ma bikuu ni ma dimala* inyu ngandak biloñ ni biane bikeñi. 9 Ibale mpôdôl a mpot le nsañ u ga ba, ndi bibañga gwé bi yon, hala nyen bôt ba ga yi le Yéhôva toi nyen a ñom i mpôdôl nu.”

10 Ha nyen Hanania a bi héya kop nson i joo li mpôdôl Yérémia, a bôk+ yo. 11 I mbus, Hanania a kal bôt ba litén bobasôna le: “Haana nyen Yéhôva a mpot: ‘Hala nyen me ga héya kop nson i Nébukadnézar, kiñe Babilôn, i joo li biloñ gwobisôna ilole nwii ima mi ntagbe, me bôk yo.’”+ I mbus, mpôdôl Yérémia a ke.

12 I ngéda mpôdôl Hanania a bi bôk kop nson i bé i joo li mpôdôl Yérémia, Yéhôva a ômle Yérémia i nwin unu: 13 “Ke kal Hanania le: ‘Haana nyen Yéhôva a mpot: “U mbôk kop nson i i yé ni bikék,+ ndi w’a bañ kop nson ipe i i yé ni bikei,* inyu héñha i bisu.” 14 Inyule haana nyen Yéhôva nu mintôñ mi gwét, Nyambe nu Israel, a mpot: “Me ga ha kop nson i bikei* i joo li biloñ bini gwobisôna, le bi gwélél Nébukadnézar, kiñe Babilôn; ñ, bi ga ba nyégsaga i gwélél nye.+ Me ga ti yak nye binuga bi bikai.”’”+

15 I mbus, mpôdôl Yérémia a kal mpôdôl Hanania+ le: “Soho emble a Hanania! Yéhôva a ñom bé we, u ntinde bôt ba litén lini i hémle bitembee.+ 16 Inyu hala nyen Yéhôva a nkal le: ‘Emble ki! Me ga sas we hana ’isi. I nwii unu, u ga wo, inyule u ntinde bôt i ndogbene Yéhôva.’”+

17 Mpôdôl Hanania a bi wo mu nwii u, i sôñ i nyônôs isaambok.