Yérémia
26 I bibôdle bi ane i Yéhôyakim+ man Yôsia, kiñe Yuda, i bibañga bini gwon Yéhôva a bi kal Yérémia: 2 “Yéhôva a nkal le: ‘Telep i kotoo i témpel Yéhôva, u pôdôs* bôt ba bitison bi Yuda bobasôna ba ba nlo i témpel Yéhôva inyu bégés nye.* Añle bo mam momasôna me nkal we; u héya bañ to buk yada. 3 Bebek ba ga emble, ba kôm ki béba yap mbus; yak me, me héñha mahoñol,* me kogse ha bé bo inyu maboñok map mabe.+ 4 Kal bo le: “Haana nyen Yéhôva a mpot: ‘Emblana me, nôglana mbén* me bi ti bé, 5 emblana ki bibañga bi bagwélél bem le bapôdôl, ba me bi ômle bé, me tiimbaga,* ndi ni bi emble bé bo;+ 6 jon me nyilha i ndap ini kiki Silô,+ biloñ bi nkoñ ’isi gwobisôna bi kahal tehe i tison ini kiki yom le ba ntiihe.’”’”+
7 Biprisi, bapôdôl ni bôt ba litén bobasôna ba bi nok Yérémia a mpot i mam mana i témpel Yéhôva.+ 8 I ngéda Yérémia a bi mal pot i mam momasôna Yéhôva a bi kal nye le a añle bôt ba litén bobasôna, biprisi, bapôdôl ni bôt ba litén bobasôna ba gwel nye, ba kal nye le: “U kôli ni nyemb. 9 Inyuki u mpot i jôl li Yéhôva, u kalak le: ‘I ndap ini i ga yila kiki Silô, ni le i tison ini i ga tjiba, i yégle hôlô?’” Ha nyen bôt bobasôna ba bi lo, ba kéña Yérémia i témpel Yéhôva.
10 I ngéda baane ba Yuda ba bi nok i mam mana, ba nyodi i ndap* kiñe, ba lo i témpel Yéhôva, ba yén i lijubul li nwemel mondo u témpel Yéhôva.+ 11 Biprisi ni bapôdôl ba kal baane ni bôt ba litén bobasôna le: “I mut nunu a kôli ni nyemb,+ inyule a mpot i tison ini béba, bébomede ni nok hala ni maôô manan.”+
12 I mbus, Yérémia a kal baane bobasôna ni bôt ba litén bobasôna le: “Yéhôva nyen a ñom me le me pot i mam momasôna ni ntip nok inyu ndap ini ni inyu tison ini.+ 13 Jon nano, héñhana bilem binan ni maboñok manan, nôglana Yéhôva Nyambe nan; yak Yéhôva a ga héñha mahoñol,* a ga kogse ha bé bé kiki a bi pot.+ 14 Inyu yem, me yé i moo manan. Boña me i jam ni ntehe loñge, ni li li téé sép i mis manan. 15 Ndi yina le, ibale ni nol me, wee ni mbegee pil matjél ma mut nu a yé nginsohi, wee ni mbééga yak wo i tison ini ni bôt ba nyééne mu. Inyule, me nkal bé maliga le Yéhôva nyen a ñom me i kal bé i mam momasôna ni ntip nok.”
16 Ha nyen baane ni bôt ba litén bobasôna ba bi kal biprisi ni bapôdôl le: “I mut nunu a kôli bé ni nyemb, inyule a mpôdôs toi bés i jôl li Yéhôva Nyambe wés.”
17 Yak ngim mimañ mi litén mi telep, mi bôdôl kal i bôt bobasôna ba bi kodba ha le: 18 “Mika,+ mut Môréset a bé mpôdôl i dilo di Hézékia,+ kiñe Yuda. A bi kal bôt ba Yuda bobasôna le: ‘Haana nyen Yéhôva nu mintôñ mi gwét a mpot:
“Siôn a ga séla kiki ba nsal wom,
Yérusalem a ga yila likund,+
19 “Baa Hézékia, kiñe Yuda, ni bôt ba Yuda bobasôna ba bi nol nye? Baa kiñe i bi kon bé Yéhôva woñi? Baa i bi soohe bé Yéhôva le a kônôl bo ngoo,* kayéle Yéhôva a héñha mahoñol,* a kogse ha bé bo kiki a bi pot?+ I jam di nsômbôl boñ, li ga lona bés bikuu bikeñi.
20 “Mut numpe le Uriya man Sémaya a bi pot i jôl li Yéhôva, a bé lôl i Kiriat-Yéarim.+ Yak nye a bi pot nlélém jam kiki Yérémia inyu tison ini ni inyu loñ ini. 21 I ngéda Kiñe Yéhôyakim+ ni mimpémba nwé mi bôt nwominsôna ni baane bobasôna ba bi nok bibañga gwé, kiñe i kahal yéñ njel i nol nye.+ Kiki Uriya a nok hala, a kon woñi, a ke ngwéé i Égiptô. 22 Ndi Kiñe Yéhôyakim a bi om Elnatan+ man Akbor lôñni bôt bape i Égiptô. 23 Ba gwel Uriya i Égiptô, ba lona nye yak Kiñe Yéhôyakim, a nol nye ni pansoñ,+ a leñ mim wé i wom soñ u gwañga bi bôt.”
24 Ndi Ahikam+ man Safan+ a bi sôñ Yérémia, le ba ti bañ nye i moo ma bôt ba litén le ba nol+ nye.