Yérémia

32 Yéhôva a bi pôdôs Yérémia i nwii mi nyônôs 10 mi ane i Sédékia, kiñe Yuda; hala wee i nwii mi nyônôs 18 mi ane i Nébukadnézar.*+ 2 Ha ngéda i, mintôñ mi gwét mi kiñe Babilôn mi bi kéña Yérusalem; Yérémia a bak i mok i kotoo Batat,+ i i yé i ndap* kiñe Yuda. 3 Inyule Sédékia, kiñe Yuda, a bi ha nye i mok,+ a kal nye le: “Inyuki u mpot i nya jam ini? U nkal le: ‘Haana nyen Yéhôva a mpot: “M’a ti kiñe Babilôn i tison ini, a ga yémbél yo,+ 4 yak Sédékia, kiñe Yuda, a ga pei bé bôt ba Kaldéa; inyule me ga sem nye i moo ma kiñe Babilôn. A ga pôdôs nye mbom ni mbom, ba tehna ki.”’+ 5 ‘A ga kena Sédékia i Babilôn, Sédékia a ga yén nyoo letee me yoñ ngéda ni nye,’ hala nyen Yéhôva a mpot. ‘To hala kiki ni yé i jôs bôt ba Kaldéa, ni ga yémbél bé bo.’”+

6 Ha ngéda i, Yérémia a bi kal le: “Yéhôva a mpôdôs me, a kal le: 7 ‘Emble-ki! Hanamel, man Salum, manyañ isoñ a ga lo i weeni, a kal we le: “Somb wom wem u u yé i Anatôt,+ inyule wen u yé nkôdôlbum nu bisu, wen u gwé kunde i somb wo.”’”+

8 Hanamel, man manyañ tata, a bi lo i meeni i kotoo Batat, kiki Yéhôva a bi pot, a kal me le: “Soho, somb wom wem u u yé i Anatôt, i nkoñ u Benyamin, inyule wen u yé nkôdôlbum, we ki nyen u gwé kunde i somb wo. Soho, somb wo.” Ha nyen me bi yi toi le sômbôl i Yéhôva i.

9 Hala nyen me bi somb wom u Hanamel man manyañ tata, wom u u yé i Anatôt. Me hek moni+ me bé lama ti nye, sékel* isaambok ni jôm li batjañtjañ ba silba. 10 I mbus, me tila bikaat bi hisi,+ me ôm sitamp mu, me sébél bôt ba mbôgi,+ me hek moni i kilô, me ti nye. 11 Ha nyen me bi yoñ bikaat bi hisi, hala wee i kaat me bi ôm sitamp kiki mbén i nkal, lôñni ini kaat ipe i bééna bé sitamp, 12 me ti gwo Baruk,+ man Néria,+ man Maséya; i bisu bi Hanamel man manyañ tata, i bisu bi bôt ba mbôgi ba ba bi sane bikaat bi hisi, ni i bisu bi bon ba Lôk Yuda bobasôna ba ba bé ba yii i kotoo Batat.+

13 Nano, me ti Baruk oda i bisu gwap le: 14 “Haana nyen Yéhôva nu mintôñ mi gwét, Nyambe nu Israel, a mpot: ‘Yoñ bikaat bi hisi bini, ini i gwé sitamp ni ini i gwé bé sitamp, ha gwo ikété hibee hi biték, inyu boñ le bi nom ntandaa ngéda.’ 15 Inyule haana nyen Yéhôva nu mintôñ mi gwét, Nyambe nu Israel, a mpot: ‘Bôt ba ga témb ba somb mandap, nwom mi bijek ni nwom mi minkôô mi wai munu loñ ini.’”+

16 Kiki me nti Baruk man Néria bikaat bi hisi, me soohe Yéhôva le: 17 “Éé, a Nwet Bayemlikok le Yéhôva! Ngii ni hisi, u bi hek gwo ni ngui+ yoñ ikeñi lôñni lipémba li woo woñ. Jam jo ki jo li ta bé hélha inyu yoñ, 18 u ñunda dikôô di bôt loñgeñem,* ndi u nwas le bikuu bi bibéba bi basañ bi yik kwél bon,*+ wen u yé bañga Nyambe, Nyambe Nunkeñi ni Nu Lipémba, nu a gwé jôl le Yéhôva nu mintôñ mi gwét. 19 Sômbôl yoñ i yé hélha,* u mboñ mam ni lipémba,+ mis moñ ma ntehe maboñok ma bôt ba binam bobasôna,+ kayéle u ntimbhe hiki mut inoñnaga ni maboñok mé yak ni minson nwé.+ 20 U bi boñ bihélha bi mam ni manyaga i loñ Égiptô ma ma nyiba letee ni len, hala a bi boñ le bon ba Israel ni bôt ba binam ba yi we,+ kiki i yé i len ini. 21 U bi nyodna litén joñ Israel i loñ Égiptô lôñni bihélha bi mam, ni manyaga, ni woo woñ u ngui, ni woo woñ u lipémba, yak ni mam ma ma nkônhana woñi.+

22 “I mbus ngéda, u bi ti bo i loñ ini u bi bôn basôgôlsôgôl+ bap, loñ i i nkuli milik ni wéi.+ 23 Ba bi jôp mu loñ i, ba bôdôl yééne mu, ndi ba bi nôgôl bé we, ba bi noñ bé to mbén yoñ. Ba bi boñ bé i mam u bi kal bo le ba boñ, inyu hala nyen u bi boñ le bikuu bini gwobisôna bi kwél bo.+ 24 Nun-ki! Bôt bana ba nlo, ba téé ni bijôl gwap bi gwét inyu kadal tison;+ jon pansoñ,+ njal ni himala*+ bi ga boñ le tison i kwoo i moo ma bôt ba Kaldéa ba ba nlo i jôs yo. Mam momasôna u bi pot, ma mal yon kiki u yé i tehe. 25 Ndi to hala, a Nwet Bayemlikok le Yéhôva, u bi kal me le: ‘Yoñ moni, u somb hisi, u sébél bôt ba mbôgi,’ to hala kiki tison i ga kwo i moo ma bôt ba Kaldéa.”

26 Ha nyen Yéhôva a bi timbhe Yérémia le: 27 “Men me yé Yéhôva, Nyambe nu bôt ba binam bobasôna.* Baa jam li nla lôôha ba hélha inyu yem? 28 Jon Yéhôva a nkal le: ‘Me yé i sem i tison ini i moo ma bôt ba Kaldéa ni ma Nébukadnézar,* kiñe Babilôn; a ga yémbél yo.+ 29 Bôt ba Kaldéa ba ba yé i jôs i tison ini, ba ga jôp mu, ba ha yo hié, ba ligis ki yo,+ yak ni mandap i het bôt ba bé bet i ngii minyôl inyu sémél Baal bisesema, ba tinak banyambe bape makébla ma wai inyu unbaha me.’+

30 “‘Inyule bon ba Israel ba mboñ ndik mam mabe mo ni mo i bisu gwem, ibôdôl bo boñge;+ litén li Israel li ñunbaha me ni minson mi moo map,’ hala nyen Yéhôva a mpot. 31 ‘Inyu tison ini, ibôdôl nu ba bi oñ yo letee ni i len ini, i ñunbaha ndik me, i bédhak me liyot,+ jon i nlama nyodi me i mbom,+ 32 inyu mam mabe momasôna bon ba Israel ni bon ba Yuda ba bi boñ inyu unbaha me; bo ni bikiñe+ gwap, ni baane+ bap, ni biprisi gwap, ni bapôdôl+ bap, yak ni bôt ba Yuda ni bôt ba nyééne i Yérusalem. 33 Ba bé kôm me mbus, ba bé nun bé me;+ to hala kiki me bi noode niiga bo, me podok, me tiimbaga,* ndi to wada wap a bi emble bé me, a bi neebe bé to le me kodol nye.+ 34 Ba bi bii bisat gwap bi bi nsuñgaha ñem ikété ndap i i bééga jôl jem, ba yilha yo nyega.+ 35 Ba bi oñ yak bahoma ba nyôgi inyu Baal, i nsôsôgô u Man Hinom,*+ inyu ligis bon bap bôlôm ni bon bap bôda inyu Môlek;+ jam le me bi ti bé bo oda le ba boñ,+ hala a bi lo bé to me i mahoñol* le me boñ i nya jam i. Hala nyen ba bi tinde Yuda i kwo ikété béba.’

36 “Bé ni yé i kal le pansoñ, njal ni himala gwon bi ga boñ le i tison ini i kee i moo ma kiñe Babilôn. Ndi haana nyen Yéhôva Nyambe nu Israel a nkal: 37 ‘Me ga yoñ bo nyoo biloñ gwobisôna i het me bi sand bo ikété hiun hiem, liyot jem ni njôô ikeñi,+ me kot bo, me témbna bo hana homa nunu, ba yén ki mu ikété nsañ.+ 38 Ba ga yila litén jem, yak me, me yila Nyambe wap.+ 39 Me ga ti bo ñem wada,+ me boñ ki le ba nôñôl njel yada, kayéle ba kon me woñi ngéda yosôna inyu loñge yap ni inyu loñge i bon bap, ba ba ga gwéé i mbus yap.+ 40 Me ga boñ malômbla+ ma ma nom i boga ni boga lôñni bo, le m’a waa bé boñ bo loñge;+ m’a ha ikété miñem nwap le ba kon me woñi, inyu boñ le ba kôm bañ me mbus.+ 41 M’a kon maséé i bôñôl bo loñge,+ m’a bel yaga bo munu loñ ini+ ni ñem wem wonsôna ni ngui yem yosôna.’”*

42 “Inyule haana nyen Yéhôva a mpot: ‘Kiki me bi boñ le bikuu bikeñi bi kwél bôt ba litén lini, hala ki nyen me ga lona bo i mam malam momasôna me yé i bôn bo.+ 43 Bôt ba ga témb ba somb nwom munu loñ ini,+ to hala kiki ni yé i kal le: “I homa nunu a yé hôlô, a gwé bé mut, to nuga bikai, ba bi sem nye i moo ma bôt ba Kaldéa.”’

44 “‘Bôt ba ga pémés moni, ba somb nwom, ba tila bikaat bi hisi, ba ôm sitamp mu, ba sébél bôt ba mbôgi; hala a ga bôña i nkoñ u Benyamin,+ i minkoñ mi yé ipañ Yérusalem, i bitison bi Yuda,+ i bitison bi yé i mbok dikôa, i bitison bi yé isi dikôa,+ ni bitison bi yé i nwelmbok; inyule me ga témbna i bôt ba bi ke i minkôm,’+ hala nyen Yéhôva a mpot.”