Yérémia

47 I bibañga bini gwon Yéhôva a bi kal mpôdôl Yérémia inyu bôt ba Filistia,+ ilole Faraô a nyémbél Gasa gwét. 2 Haana nyen Yéhôva a mpot:

“Nuna-ki! Malép ma yé i lôl i pes ñombok.

Ma ga yila lép u u nhoo, ma hôl ki.

Ma ga mil loñ ni gwom gwobisôna bi yé mu,

tison ni bôt ba nyééne mu.

Bôlôm ba ga lond,

yak hiki mut a nyééne mu loñ a ga ee.

3 I ngéda ba ga nok makôô ma bihosi gwé bi nke ngwéé,

ba nok ki mbimba i bikak gwé bi gwét,

ni mbimba i makôô ma bikak,

basañ ba ga nun bé bon bap inyu hôla bo,

inyule ba ga nimis makénd.*

4 Ndi kel i ga lo le bôt ba Filistia+ bobasôna ba ga tjiba;

yak bôt ba Tir+ ni ba Sidôn+ ba ba bé nit bo, ba ga wo.

Inyule Yéhôva a ga tjé bôt ba Filistia,

bon ba yé bôt ba nsôk ba ba bi lôl i ôn i Kaftôr.*+

5 Gasa a ga bana liseha.*

Yak Askélôn, ba nyip nye nyo.+

A bôt ba nsôsôgô* ba ba ngi yii,

letee ni ngéda mbe n’a kek manyuu manan?+

6 A pansoñ i Yéhôva!+

Ngéda mbe w’a mom nwee?

Témb i sogoo yoñ.

Noi, u mom nwee.

7 Ndi lelaa i nla mom nwee

i ngéda Yéhôva nyen a nti yo oda?

I nlama tjé Askélôn ni bôt ba nyééne i mbaa tuye,+

nyoo nyen a ñom yo.”