Yérémia
38 Nano, Séfatia man Matan, Gédalia man Pasur, Yukal+ man Sélémia, ni Pasur+ man Malkiya ba bi nok bibañga Yérémia a bé kal bôt ba litén bobasôna: 2 “Haana nyen Yéhôva a mpot: ‘I mut a ga yégle munu tison ini, pansoñ, njal ni himala*+ bi ga nol nye. Ndi i mut a nke* yak bôt ba Kaldéa, a ga niñ, bibom gwé bi yé le a ga pei, a ga wo bé.’+ 3 Haana nyen Yéhôva a nkal: ‘Ni maliga, i tison ini i ga kwo i moo ma ntôñ gwét u kiñe Babilôn, u ga yémbél ki yo.’”+
4 Ha nyen baane ba litén ba bi kal kiñe le: “Soho, i mut nunu a nlama nôla,+ inyule a ntômbôs moo ma bisônda bi bi ngi yii munu tison ini, a ntômbôs ki moo ma bôt ba litén bobasôna ni bipôdôl gwé. I mut nunu a nyéñ bé nsañ inyu bôt ba litén lini, ndi bikuu gwoñ a nyiñil bo.” 5 Kiñe Sédékia a timbhe bo le: “Boña nye kiki ni ngwés, inyule kiñe i nla bé sôña bé i boñ jam jo ki jo.”
6 Ha nyen ba bi gwel Yérémia, ba ha nye i bee i Malkiya man kiñe; i bee ini i bé i kotoo Batat.+ Ba bi suhus nye mu bee ni minkôô. Ndi malép ma bé bé mu bee, ndik liboo; Yérémia a bôdôl sôôbe ikété liboo.
7 Ébed-Mélek+ man Étiôpia, nwak wada u u bé sal i ndap kiñe,* a bi nok le ba nha Yérémia i bee. Ha ngéda i, kiñe i bé i yii i nwemel u Benyamin,+ 8 Ébed-Mélek a bi ke i ndap* kiñe, a kal kiñe le: 9 “A nwet wem, a kiñe, i jam i bôt bana ba mboñ mpôdôl Yérémia li yé libe! Ba nleñ nye i bee, njal i ga nol nye mu inyule bret bi ta ha bé i tison.”+
10 Ha nyen kiñe i bi ti Ébed-Mélek man Étiôpia oda le: “Yoñ 30 ma bôt ikété bôt ba yé hana, u pémés mpôdôl Yérémia i bee ilole a nwo.” 11 Ébed-Mélek a kena i bôt ba, ba jôp i ndap* kiñe, i homa a yé isi tuñ ba nsôône nkus,+ ba yoñ bipéda bi mambot nyoo, lôñni bipéda bi mabadô, ba gwélél minkôô inyu suhus gwo nyoo ikété bee, i homa Yérémia a bé. 12 I mbus, Ébed-Mélek man Étiôpia a kal Yérémia le: “Soho, lép bipéda bi mambot ni bipéda bi mabadô munu minkôô, ha nwo i si nyambégdé.” Yérémia a boñ hala, 13 ba ôt minkôô, ba pémés Yérémia i bee. Yérémia a yén ha i kotoo Batat.+
14 Kiñe Sédékia a om le ba lona nye Yérémia i lijubul li nyônôs aa li témpel Yéhôva, kiñe i kal Yérémia le: “Me gwé jam i bat we. U sôô bañ me yom yo ki yo.” 15 Yérémia a kal Sédékia le: “Me nyi le, ibale me nkal we i jam li, w’a nol me. To maéba mon me nti we, w’a nôgôl bé me.” 16 Kiñe Sédékia a kum soñ bisôsôli bona Yérémia ndigi, a kal le: “Me nkum soñ ni niñ i Yéhôva nu a bi ti bés niñ, le m’a nol bé we, m’a sem bé to we i moo ma bôt ba nyéñ nol we.”*
17 Ha nyen Yérémia a bi kal Sédékia le: “Haana nyen Yéhôva, Nyambe nu mintôñ mi gwét, Nyambe nu Israel a nkal: ‘Ibale u nke* yak baane ba Babilôn, w’a wo bé, i tison ini i ga lék bé, we ni bôt boñ ba lihaa ni ga pei.+ 18 Ndi ibale u nke* bé yak baane ba Babilôn, i tison ini i ga kwo i moo ma bôt ba Kaldéa, ba ga ligis yo,+ to we w’a pei bé i moo+ map.’”
19 Kiñe Sédékia a kal Yérémia le: “I bon ba Lôk Yuda ba bi ke i pes i bôt ba Kaldéa, me nkon bo woñi. Inyule ibale me nkwo i moo map, ba yé le ba kép me mbai.” 20 Ndi Yérémia a kal nye le: “W’a kwo bé i moo map. Soho, nôgôl bibañga bi Yéhôva bi me yé i kal we, mam ma ga ke loñge inyu yoñ, w’a kônde niñ. 21 Ndi ibale u ntjél ke* yak bôt ba Kaldéa, i jam lini jon Yéhôva a nyeelene me: 22 emble! I bôda bobasôna ba ngi yii i ndap* kiñe Yuda, ba yé i kena bo yak baane ba Babilôn;+ i bôda bana ba yé i kal le:
‘I bôt u bi bôdôl ñem ba bi lôk we, ba yémbél ki we.+
Ba boñ le kôô woñ u sôôbe ikété liboo.
Nano, ba ntémb ni mbus, ba tjôô we.’
23 Ba yé i kena baa boñ bobasôna ni bon boñ yak bôt ba Kaldéa, w’a pei bé i moo map, kiñe Babilôn+ y’a gwel we, inyu yoñ nyen ba ga lighene i tison ini.”+
24 Ha nyen Sédékia a bi kal Yérémia le: “U añlege bañ mut nye ki nye i mam mana, tiga le ba nol we. 25 Ibale baane ba litén ba nok le me ni we di nkwel, ndi ba lo, ba kal we le: ‘Soho, añle bés i jam u nkal kiñe. U sôô bañ bés jam jo ki jo, di ga nol bé we.+ Kii kiñe a bi kal we?’ 26 U nlama timbhe bo le: ‘Me badak kiñe le a timbis bañ me i ndap Yéhônatan, tiga le me wo nyoo.’”+
27 I mbus ngéda, baane ba litén bobasôna ba ke yak Yérémia inyu bat nye mambadga. A timbhe bo kiki kiñe a bi kal nye. Jon ba bi bat ha bé nye to jam, inyule mut to wada a bi nok bé nkwel wé bo kiñe. 28 Yérémia a bi yén i kotoo Batat+ letee ni i kel ba bi yémbél Yérusalem gwét; a bé a ngii yii nyoo i ngéda ba bi yémbél Yérusalem gwét.+