Yérémia

39 I nwii mi nyônôs 9 mi ane i Sédékia kiñe Yuda, i sôñ i nyônôs 10 nyen Nébukadnézar,* kiñe Babilôn a bi lo i Yérusalem ni ntôñ wé gwét wonsôna, ba kéña tison.+

2 I nwii mi nyônôs 11 mi ane i Sédékia, i sôñ i nyônôs ina, i hilo hi nyônôs bôô mu sôñ i, ba bôk homa mu lipénd li tison.+ 3 Baane ba Babilôn ba jôp i tison, ba yén i nwemel u Ñemkété.+ Môl map mana: Nergal-Saréser nu a yé samgar, Nébô-Sarsékim nu a yé rabsaris,* Nergal-Saréser nu a yé rabmag,* yak ni bana baane bape bobasôna ba Babilôn.

4 I ngéda Sédékia, kiñe Yuda, ni bisônda gwobisôna ba bi tehe hala, ba so,+ ba nyodi i tison juu ni juu, ba lôô i njel wom mbônji u kiñe, ba tagbene i nwemel u yé ipôla mapénd mo ima, ba yoñ njel i nke i Araba.+ 5 Ndi ntôñ u bôt ba Kaldéa u noñ bo, ba ada Sédékia i ñoñ, i tegep mbok Yérikô.+ Ba gwel nye, ba kena nye yak Nébukadnézar,* kiñe Babilôn, le a pémés mbagi inyu yé nyoo i Ribla,+ i loñ Hamat.+ 6 Kiñe Babilôn i nol bon bôlôm ba Sédékia i bisu gwé ha i Ribla; kiñe Babilôn i nol ki mintôô mi bôt mi Yuda+ nwominsôna. 7 I mbus, a kwés Sédékia ndim, a kañ nye minsañ mi mamuna i makôô, a kena nye i Babilôn.+

8 Bôt ba Kaldéa ba ligis ndap* kiñe ni mandap ma bôt ba litén,+ ba bôk ki mapénd ma Yérusalem.+ 9 Nébusaradan,+ ñane batat kiñe, a yoñ i bôt bobasôna ba bi yégle mu tison, i bôt ba bi so inyu lo i pes yé, lôñni bôt bobasôna ba ba bi yégle, a kena bo i minkôm i Babilôn.

10 Ndi Nébusaradan, ñane batat kiñe, a bi yék ndék diyeyeba di bôt i loñ Yuda, i bôt ba bééna bé to yom. A ti bo nwom mi minkôô mi wai le ba sal, yak ni nwom mi bijek.*+

11 Nébukadnézar,* kiñe Babilôn, a ti Nébusaradan ñane batat kiñe oda inyu Yérémia le: 12 “Yoñ nye, tééda nye loñge; u boñ bañ nye béba, ti ki nye hiki yom a ga bat we.”+

13 Ha nyen Nébusaradan ñane batat kiñe, Nébusasban nu a yé rabsaris,* Nergal-Saréser nu a yé rabmag,* ni mintôô mi bôt nwominsôna mi kiñe Babilôn ba bi om 14 bôt le ba pémés Yérémia i kotoo Batat,+ ba kal Gédalia,+ man Ahikam,+ man Safan,+ le a tééda nye; Gédalia a kena nye i mbai yé. Hala nyen Yérémia a bi yégle ni bôt ba loñ.

15 I ngéda Yérémia a bé a ngi yii i mok i kotoo Batat,+ Yéhôva a bi kal nye le: 16 “Ke kal Ébed-Mélek,+ man Étiôpia, le: ‘Haana nyen Yéhôva nu mintôñ mi gwét, Nyambe nu Israel, a nkal: “Me ga yônôs bibañga me bi pot inyu tison ini; me ga lona bikuu, he loñge bé. W’a tehe kiki i jam li, li ga bôña yokel.”’

17 “‘Ndi m’a sôñ we yokel,’ hala nyen Yéhôva a mpot, ‘u ga kwo bé i moo ma bôt u nkon woñi.’

18 “‘Inyule ibabé pééna, m’a tohol we, pansoñ y’a nol bé we. Bibom gwoñ bi yé le u ga pei,+ inyule u mbôdôl me ñem,’+ hala nyen Yéhôva a mpot.”