Minson mi baôma

8 Ndi yak Saulô a bi ti kiñ yé le ba nol Étien.+

Ibôdôl ni kel i, ndééñga ikeñi i kwél likoda li Yérusalem; u héya baôma, banigil bobasôna ba tjama mu minkoñ mi Yudéa ni mi Samaria.+ 2 Ndi bôt ba ba nkon Nyambe woñi ba begee mim u Étien le ba jô wo, ba ee ki nye ngandak. 3 Ha nyen Saulô a bi bôdôl tééñga likoda iloo hihéga. A bé jôp ndap i mbus ndap, a pémhak bôlôm kiki bôda i mbégdé, a leñek bo i ndap mok.+

4 Ndi i bôt ba bi sanda, ba kenek, ba añlak ñañ nlam u bañga i Nyambe.+ 5 Ha nyen Filipô a bi sôs i tison* Samaria,+ a bôdôl tééne bo likalô inyu Kristô. 6 Ni ñem wada, limut li bé sédi ôô i nok i mam Filipô a bé kal, ba emblege nye, ba béñgege ki bihélha bi mam a bé boñ. 7 Inyule ngandak i bééna mimbuu mimbe,* nwon mi bé pam, mi londok ni ngui.+ Handugi hala, ngandak i i bé bibôk bi bôt ni bôt ba nlem i bé témbna mbôô wap. 8 Jon tison yosôna i bi yon ni maséé.

9 Ndi mut wada ba nsébél le Simôn a bé mu tison i, a bé mut makañ i ngéda bisu, a boñok mam ma hélha i loñ Samaria, a kadbaga le a yé bañga mut. 10 Bôt bobasôna, ibôdôl nuntitigi ikepam nunkeñi, ba bé sédi ôô i emble nye, ba kalak le: “I mut nunu a yé Lipémba li Nyambe, li li nsébla le Likeñi.” 11 Jon ba bé sédi ôô i emble nye inyule a bi hélés bo ntandaa ngéda ni makañ mé. 12 Ndi i ngéda ba bi hémle Filipô nu a bé añal ñañ nlam u Ane Nyambe+ ni jôl li Yésu Kristô, bôlôm ni bôda ba kôhna sôble.+ 13 Yak Simôn nyemede a bôdôl hémle, kiki a nkôhna sôble, a kônde yén ni Filipô;+ hala a bé hélés nye i tehe bihélha bi mam ni mimpémba mi mam minkeñi mi mi bé bôña.

14 Kiki baôma ba ba bi yégle i Yérusalem ba nok le Samaria a neebe bañga i Nyambe,+ ba ômle bo Pétrô bo Yôhanes; 15 ha nyen ba bi sôs nyoo, ba soohe inyu yap le ba kôhna mbuu mpubi.+  16 Inyule u bé ngi sôs i ngii to wada wap, ndi ba bi kôhna ndik sôble i jôl li Nwet le Yésu.+ 17 I ngéda ba bi kéhi moo i ngii yap,+ i bôt ba, ba kôhna mbuu mpubi.

18 Ndi kiki Simôn a bi tehe le bôt ba nkôhna mbuu mpubi i ngéda baôma ba nkéhi moo i ngii yap, a noode ti bo moni, 19 a kal le: “Tina yak me i kunde ini, inyu boñ le tonjee mut me nkéhi moo i ngii yé, a kôhna mbuu mpubi.” 20 Ndi Pétrô a kal nye le: “We ni silba yoñ ni tjiba, inyule u nhoñol le ni moni, u nla somb likébla Nyambe a nti yañga.+ 21 U gwé bé ngaba to jôga munu nson unu, inyule ñem woñ u téé bé sép i mis ma Nyambe. 22 Jon tam i béba yoñ ini, u yemhe ki Yéhôva* le, ibale hala a nla bôña, a nwéhél we mahoñol mabe ma ñem woñ; 23 inyule me ntehe le u yé mbôñ i nlol* ni nkol u ngitelepsép.” 24 Simôn a timbhe bo le: “Bébomede ni yemhe Yéhôva* inyu yem le ndi jam to jada mu mam ni mpot li kwél bañ me.”

25 Jon i ngéda ba bi mal bok mbôgi i nya i yôni, ba mal ki añal bañga i Yéhôva,* ba bôdôl témb i Yérusalem. Mu njel, ba bé añal ñañ nlam i ngandak mambai ma bôt ba Samaria.+

26 Ndi añgel+ i Yéhôva* i pôdôs Filipô, i kal le: “Telep, ke i nwelmbok, mu njel i nyodi i Yérusalem inyu sôs i Gasa.” (I nloñ u, u yé i ñoñ.) 27 Ha nyen a bi telep, a ke, ndi nuna-ki, mut Étiôpia wada nu a bé nwak,* a bé bañga mut nu a bé sélél Kandaké, kiñemuda Étiôpia, nyen a bé tééda ki nkus wonsôna u kiñemuda. A bé i Yérusalem inyu bégés Nyambe,+ 28 ndi a bé témb i nyeni, a bak a yii ikété kak yé, a añak kaat i mpôdôl Yésaya makeñi. 29 Ha nyen mbuu u kal Filipô le: “Kee nyoo, tiige bebee ni i kak ii.” 30 Filipô a ke ngwéé ipañ kak, a nok nye a ñañ kaat i mpôdôl Yésaya makeñi, a bat nye le: “Baa u ntibil toi nok* i yom u yé i añ?” 31 A timbhe le: “Ni maliga, lelaa me yé le me nok ibale mut a niiga bé me?” Ha nyen a yemhe Filipô le a bet, a yén lôñni nye. 32 Ndi i pes Bitilna ini yon a bé añ: “Kiki ntômba, ba bi kena nye inyu nol nye; kiki man ntômba nu a mom nwee i bisu bi nu a ñend nye, hala nyen a nyibil bé nyo wé.+ 33 I ngéda ba bé wéha nye nyuu, ba bi nim nye mbagi sép.*+ Njee a ga añal mam ma hiai hié?* Inyule ba bi héya niñ yé hana ’isi.”+

34 I mbus, nwak u kal Filipô le: “Soho, inyu njee mpôdôl a mpot i mam mana? Inyu yé nyemede tole inyu mut numpe?” 35 Filipô a yoñ hop, a bôdôl ni tilna i, a añle nye ñañ nlam inyu Yésu. 36 Ndi kiki ba bé ke mu njel, ba pam i homa malép ma yé, ha nyen nwak u kal le: “Nun-ki! Malép mana; kii i nkéñ me njel i kôhna sôble?” 37* —— 38 Ha nyen nwak u ti oda le ba téé kak; i mbus, Filipô lôñni nwak ba sôs, ba jôp ikété malép, Filipô a sôble nye. 39 Kiki ba nyodi ikété malép, mbuu u Yéhôva* u pala nyodna Filipô ha; nwak u tehe ha bé nye, ndi u noñ njel yé, u konok maséé. 40 Ndi Filipô a ke i Asdôd, a ke mu nkoñ, a kôndge añal ñañ nlam ikété bitison gwobisôna letee a pam i Kaisaréa.+