Kaat bisu i Miñañ

29 Kiñe David a kal litén jolisôna le: “Man wem Salômô nyen Nyambe a bi pohol,+ ndi a yé mañge, a yé ngi to boñ i nya bôlô i,*+ nson u yé nkeñi inyule témpel i mut binam bé i, ndi i Yéhôva Nyambe.+ 2 Me bi boñ biliya gwem gwobisôna inyu kôôba maoñ ma ndap Nyambe wem, me kôôba gôl inyu minson mi gôl, silba inyu minson mi silba, mamuna inyu minson mi mamuna, bikei* inyu minson mi bikei,+ bikék+ inyu minson mi bikék, ngok ônix, ngok ba ñéde ikété simet, bon ba ngok balam inyu lémés ndap,* mintén mi tik ngok nwominsôna, ni ngandak ngok i alabasta. 3 Kiki me ngwés ndap Nyambe+ wem, me nyoñ yak gôl ni silba ikété nkus wem+ memede, me kônde inyu maoñ ma ndap Nyambe wem, handugi i gwom gwobisôna me bi kôôba inyu maoñ ma ndap pubhaga ini, 4 i gwom bini gwon me nti: 3 000 di talént* i gôl i Ôfir,+ 7 000 di talént i bañga silba inyu hoo mu mabap ma ndap, 5 gôl inyu minson mi gôl, silba inyu minson mi silba ni inyu minson nwominsôna bôt ba maoñ ba nlama boñ. Nano, njee a gwé ngôñ i ti Yéhôva likébla?”+

6 Ha nyen baéga ba mandap ma bikôkôa, baane ba matén ma Israel, baane ba dikôô bi bôt, baane ba mbôgôl+ bôt ni baane ba ba ñéga mam ma kiñe+ ba neebe ni mahoñol malam le ba mboñ hala. 7 Inyu maoñ ma ndap i bañga Nyambe, ba bi ti 5 000 di talént i gôl, 10 000 di darik,* 10 000 di talént i silba, 18 000 talént i mamuna ni 100 000 i talént i kei.* 8 I bôt bobasôna ba bééna tik ngok, ba bi ti yo inyu litéédana* li nkus li ndap Yéhôva, Yéhiel,+ man Lôk Gersôn,+ nyen a bé tééda jo. 9 Litén li bi kon maséé i ti makébla ni ngôñ yap ñem, inyule ñem u bi tinde bo i ti Yéhôva makébla ni ñem wonsôna,+ yak Kiñe David a bi kon maséé ngandak.

10 I mbus, David a bégés Yéhôva i bisu bi litén jolisôna. David a kal le: “A Yéhôva, Nyambe nu isañ wés Israel, u kôli ni bibégés i boga ni boga.* 11 A Yéhôva, bikeñi,+ lipémba,+ bilama,+ mapubi ni lipém bi yé gwoñ; inyule mam momasôna i ngii ni hana ’isi ma yé moñ.+ A Yéhôva,+ ane i yé yoñ. Wetama nyen u kéhi i ngii mam momasôna. 12 Ligwañ ni lipém bi nlôl i weeni,+ u ñane ki mam momasôna.+ Ngui+ ni lipémba+ bi yé i woo woñ, woo woñ u nla yilha mut nkeñi,+ u ti ki bôt bobasôna ngui.+ 13 Nano, a Nyambe wés, di nti we mayéga, di mbégés ki jôl joñ likeñi.

14 “Ndi me me yé njee, yak litén jem li yé kii, le di ti we makébla mana ñem u ntinde bés i ti we? Inyule mam momasôna ma nlôl i weeni; i gwom di nti we, bi nlôl i woo woñ. 15 Inyule di yé bakén ba bôt ni biyoyo i mis moñ kiki basôgôlsôgôl+ bés. Inyule dilo tjés hana ’isi di yé kiki yiye,+ botñem i ta bé. 16 A Yéhôva Nyambe wés, i lingwañ jolisôna di nkôôba inyu oñ ndap i i nti jôl joñ lipubi lipém, li nlôl i woo woñ; ñ, jolisôna li yé joñ. 17 A Nyambe wem, me nyi loñge le u nwan miñem,+ u nkon ki maséé ni telepsép.*+ Me nti makébla mana ni ñem wem wonsôna;* me nkon ki maséé i tehe kiki litén joñ li kôdi hana inyu ti we makébla ni ñem wap wonsôna. 18 A Yéhôva, Nyambe nu basôgôlsôgôl bés Abraham, Isak ni Israel, hôla litén joñ le li tééda mahoñol mana ni ngôñ ini i boga ni boga, u tinde ki bo i gwés we.*+ 19 Ti man wem Salômô ñem u yôni*+ le a nôgôl mambén+ moñ, mabéhna moñ, matéak moñ, ni le a boñ mam mana momasôna, a oñ ki témpel,* inyule me mal kôôba maoñ.”+

20 I mbus, David a kal litén jolisôna le: “Nano, béghana Yéhôva Nyambe nan.” Bôt ba litén bobasôna ba bégés Yéhôva Nyambe nu basôgôlsôgôl bap, ba ôôp, ba ôm mbom ’isi i bisu bi Yéhôva ni bi kiñe. 21 Yokel ni i hilo hi bé noñ, ba ti Yéhôva bisesema, ba sémél ki Yéhôva bisesema bi ntul i hié:+ 1 000 hi bon ba balôm ba nyaga, 1 000 hi balôm ba mintômba, 1 000 hi bon ba mintômba lôñni makébla ma wai;+ ba bi ti ngandak bisesema inyu loñ Israel yosôna.+ 22 Ba bi kônde je, ba kônde nyo yokel i bisu bi Yéhôva, ba kon ki maséé+ ngandak. Ba témb ba téé Salômô, man David, kiñe inyu ngélé i nyônôs iba, ba hoo nye i bisu bi Yéhôva le nyen a ba ñéga,+ ba téé* yak Zadok le a ba prisi.+ 23 Hala nyen Salômô a bi yén i yééne ane i Yéhôva,+ a yila kiñe, a yoñ tel i isañ le David, mam mé ma bé ke loñge, yak bon ba Israel bobasôna ba bé nôgôl nye. 24 Baane+ bobasôna, mimpémba mi bôt ba gwét,+ yak ni bon ba Kiñe David+ bobasôna ba bi suhus bomede isi Kiñe Salômô. 25 Yéhôva a bi yilha Salômô nkeñi ngandak i mis ma bon ba Israel bobasôna, a ti ane yé lipém iloo bikiñe gwobisôna bi bi bôk+ bi ane Israel.

26 Hala nyen David man Yésé, a bi ane Israel. 27 Ane yé i Israel i bi nom 40 ma nwii. A bi ane nwii+ 7 i Hébrôn, a ane 33 nwii+ i Yérusalem. 28 A bi wo, a bak mañ mut,+ a ma nuu dilo di niñ, lingwañ ni lipém; man wé Salômô a yoñ tel yé,+ a yila kiñe. 29 Ñañ u Kiñe David ibôdôl i bibôdle ipam lisuk, u yé ntilga ikété bitilna bi ntehemam le Samuel, bi mpôdôl le Natan+ ni bi ntehemam le Gad.+ 30 I bitilna bi, bi ntoñol ñañ u ane i David yosôna, lipémba jé ni mam ma ngéda yé ma ma mbéñge nye, loñ Israel ni biane gwobisôna bi bi bé bo bebee.