Minson mi baôma

22 “A bôt, a lôk kéé ni basañ, emblana, me toñle bé i mam ma ntagbe.”+ 2 Kiki ba nok nye a mpôdôs bo ni hop Lôk Héber, ba tibil yaga mom nwee; a kal le: 3 “Me yé man Lôk Yuda,+ me bi gwééne i Tarsô, i pes mbok Kilikia,+ ndi me bi boñ suklu munu tison ini, i makôô ma Gamaliel,+ me nigil yaga i tibil noñ mbén i basôgôlsôgôl,+ me ban-ga makénd inyu nson u Nyambe kiki yak bébobasôna ni gwé mo i len ini.+ 4 Me bi tééñga bôt ba Njel ini letee ni nyemb, bôlôm kiki bôda, me kañak bo, me hak bo i mok,+ 5 prisi keñi ni ntôñ wonsôna u mimañ mi litén ba yé me mbôñ. Bo ki bon ba bi ti me bikaat inyu lôk kéé i Damaskô; me bé ke inyu gwel i bôt ba bé nyoo le ndi me lona bo nkañak i Yérusalem inyu boñ le ba kogse bo.

6 “Ndi kiki me bé i njel, me tiigege bebee ni Damaskô, hala a bé jam kiki bo kosi; kunda yada, mapubi makeñi ma lôl i ngii, ma béyéi me, ma kéña me,+ 7 me kwo ’isi, me nok ki kiñ i nkal me le: ‘A Saulô, a Saulô, inyuki u ntééñga me?’ 8 Me timbhe le: ‘U yé njee, a Nwet?’ A kal me le: ‘Men me yé Yésu, mut Nasaret, nu u ntééñga.’ 9 I bôt ba bé lôñni me ba bi tehe yaga mapubi, ndi ba bi nok bé kiñ i nu a bé pôdôs me. 10 Ha nyen me kal le: ‘Kii me nlama boñ, a Nwet?’ Nwet a kal me le: ‘Telep, jôp i Damaskô, nyoo nyen b’a kal we i mam ma ntééba le u boñ.’+ 11 Ndi kiki me bé la bé tehe to jam inyule mapubi ma bé bai ngandak, i bôt ba bé lôñni me bon ba bi gwel me i woo, ndi me bol i Damaskô.

12 “Ha nyen mut ba nsébél le Anania, nu a bé kon Nyambe woñi inoñnaga ni mbén Môsi, a ban-ga mbôgi ilam ikété bôt ba Lôk Yuda bobasôna ba ba niñ nyoo, 13 a lo i boma me. A telep me ipañ, a kal me le: ‘A Saulô, a mankéé, témb tehna!’ Ha nlélém ngéda, me pa mis, me tehe nye.+ 14 A kal le: ‘Nyambe nu basôgôlsôgôl bés a mpohol we le u yi sômbôl yé, u tehe nu a téé sép,+ u nok ki kiñ yé, 15 inyule w’a bok mbôgi inyu yé i bisu bi bôt bobasôna inyu mam u bi tehe ni ma u bi nok.+ 16 Ndi nano, inyuki u nlep ngéda? Telep, u kôhna sôble,+ u sébél ki jôl li Yésu le ndi bibéba gwoñ bi nwéhlana.’+

17 “Ndi i ngéda me bi témb i Yérusalem,+ me bé soohe i témpel, me tehe yiinda, 18 me tehe Nwet, a kal me le: ‘Hoo boñ, pala nyodi i Yérusalem inyule b’a neebe bé i mbôgi u nti inyu yem.’+ 19 Me kal le: ‘A Nwet, bomede ba nyi yaga le me bééna lem i jôp ikété hiki ndap bibégés, me leñek i bôt ba nhémle we i mok, me bébék bo disôô;+ 20 ni le i ngéda ba bé kôp matjél ma Étien nu a bé mbôgi yoñ, me bé me téé, hala a lémlak me, me téédaga ki mambot ma bôt ba bé nol nye.’+ 21 Ndi to hala, a kal me le: ‘Kenek, inyule m’a ep we i biloñ bi yé nonok.’”+

22 Ba bi emble nye letee ni i ngéda a bi pahal bibuk bini. I mbus, ba bédés makiñ, ba kal le: “I nya mut ini i nlama wo, i kôli bé niñ!”* 23 Kiki ba bé lond makeñi, ba lebek mambot map, ba leñek minluñ mi biték i ngii,+ 24 ñane hikôô hi bisônda a ti oda le ba kena Paul i ñamb* bisônda, ni le ba bép nye disôô inyu bat nye mambadga, kayéle a tibil yaga yi inyuki bôt ba londok hala ikolba Paul. 25 Ndi kiki ba nkañ nye inyu bép nye disôô, Paul a kal ñane mbôgôl bisônda nu a bé a téé ha le: “Baa u gwé kunde i bép mut Rôma* disôô, bo ngi kéés nye?”*+ 26 I ngéda ñane mbôgôl bisônda a bi nok hala, a ke yak ñane hikôô hi bisônda inyu añle nye hala, a kal nye le: “W’a boñ lelaa nano? Ngo i mut nunu a yé mut Rôma.” 27 Ha nyen ñane hikôô hi bisônda a tiige Paul bebee, a kal nye le: “Kal le me, baa u yé mut Rôma?” A kal le: “Ñ.” 28 Ha nyen ñane hikôô hi bisônda a timbhe le: “Me bi saa ngandak moni inyu bana kunde i ba mut Rôma.” Paul a kal le: “Ndi me me bi gwéé mut Rôma.”+

29 I nlélém ngéda, i bôt ba bé sômbôl kép nye mbai inyu boñ le a pot, ba ke nye haa; yak ñane hikôô hi bisônda a kon woñi i ngéda a bi yi le Paul a yé mut Rôma, inyule a bi kañ nye ni minsañ mi bikei.+

30 I kel i bé noñ ha, kiki a bééna ngôñ i yi ntiik inyuki Lôk Yuda i bé soman nye, a pémés nye, a ti ki oda le baéga biprisi ni Ntôñ bakéés bakeñi wonsôna ba kodba. I mbus, a sôhna Paul, a téé nye i ñemkété wap.+