Minson mi baôma
25 Jon kiki Festô+ a mpam i pes mbok, a yoñ énél; i mbus dilo daa, a nyodi i Kaisaréa, a bet i Yérusalem. 2 Ha nyen baéga biprisi ni mintôô mi bôt mi Lôk Yuda mi soman Paul i nyeni.+ I mbus, ba bôdôl soohe Festô, 3 ba badak nye le a bôñôl* bo jam, a ep le ba lona Paul i Yérusalem. Ba bé kôôba le ba ñamb Paul mu njel inyu boñ le ba nol nye.+ 4 Ndi Festô a timbhe le b’a kônde tééda Paul i Kaisaréa, ni le ndék ngéda nyemede a ga témb nyoo. 5 A kal le: “I bôt ba yé baéga ikété nan ba sôs ni me, ba soman nye ibale i mut nu a mboñ toi jam libe.”+
6 I ngéda a bi tégbaha jam kiki bo dilo juem tole jôm li dilo ni bo, a sôs i Kaisaréa; i kel i bé noñ, a yén i yééne bikééhene, a ti oda le ba jôbna Paul. 7 Kiki a njôp, Lôk Yuda i i bi sôs, i lôlak i Yérusalem, i kéña nye, i bôdôl ôm nye ngandak minsohi minkeñi, ndi ba bé la bé unda le mi yé maliga.+
8 Ndi inyu kaa hop wé, Paul a kal le: “Me bi boñ bé béba yo ki yo ikolba Mbén i Lôk Yuda, to témpel, to Kaisa.”+ 9 Kiki Festô a bé yéñ lémél Lôk Yuda,+ a bat Paul le: “Baa u nyéñ bet i Yérusalem le ndi ba kéés we nyoo inyu mam mana i bisu gwem?” 10 Ndi Paul a kal le: “Me téé i bisu bi yééne bikééhene i Kaisa, hana nyen ba nlama kéés me. Me mboñ bé Lôk Yuda jam libe jo ki jo, wemede u nyi yaga hala. 11 Ibale me yé toi mboñbéba, tole me mboñ jam li kôli ni nyemb,+ me nke bé nyemb ngwéé, ndi ibale minsohi i bôt bana ba ñôm me mi ta bé maliga, mut nye ki nye a gwé bé kunde i ti me i moo map inyu lémél bo. Me mbat le hop wem u kee yak Kaisa.”+ 12 I ngéda Festô a mal pot ni ntôñ wé u batipék, a timbhe le: “Kiki u mbat le hop woñ u kee yak Kaisa; hop woñ w’a ke yak Kaisa.”
13 I mbus ndék dilo, Kiñe Agripa bona Bernis ba lo i Kaisaréa yak Festô inyu yuuga nye. 14 Kiki ba nom ngandak dilo nyoo, Festô a añle kiñe hop u Paul, a kal le:
“Félix a bi yék mut wada hana i mok, 15 i ngéda me bé i Yérusalem, baéga biprisi lôñni mimañ mi Lôk Yuda ba bi soman nye i meeni,+ ba bat le a kôhna mbagi nôgôs. 16 Ndi me bi timbhe bo le hala a ta bé lem i bôt ba Rôma i ti mut nye ki nye i moo ma bôt ba nsoman nye inyu lémél bo; i mbéda ndugi le i mut ba ñôm nsohi a boma i bôt ba nsoman nye i mbombom inyu nkaa wé.+ 17 Jon i ngéda ba bi pam hana, me bi lep bé ngéda; ndi i kel i bé noñ, me yén i yééne bikééhene, me ti oda le ba jôbna i mut nu. 18 Kiki basoman nye ba ntelep, ba ôm bé nye minsohi le a mboñ i mam mabe me bé hoñol.+ 19 Ba bé pééna ndigi inyu base yap,*+ ni inyu mut wada ba nsébél le Yésu, nu a bi wo ndi Paul a nai ndigi ni kal le a yé i niñ.+ 20 Kiki me bi yi bé lelaa me boñ ni ndañ wap, me bat nye too a nla gwés ke i Yérusalem le ndi ba kéés nye nyoo inyu mam mana.+ 21 Ndi i ngéda Paul a bi bat le ba tééda nye i mok, letee hop wé u ke yak Nulipém,*+ le nyen a bagal nkaa wé, me ti oda le ba tééda nye letee ni i ngéda me ñep nye yak Kaisa.”
22 Ha nyen Agripa a kal Festô le: “Memede m’a ba maséé i emble i mut nu.”+ A kal nye le: “W’a emble nye yani.” 23 I kel i bé noñ ha, Agripa bo Bernis ba jôp i ndap minkaa ni ngandak binene lôñni mintôô mi bôt mi tison. I ngéda Festô a bi ti oda, ba jôbna Paul. 24 Ha nyen Festô a kal le: “A Kiñe Agripa ni bébobasôna ba ni yé hana lôñni bés; inyu mut nunu ni ntehe nyen bôt ba Lôk Yuda bobasôna ba bi sébél me i Yérusalem ni hana, ba londok le a nlama ha bé niñ.+ 25 Ndi me bi léba le a mboñ bé jam jo ki jo li li kôli ni nyemb.+ Jon kiki i mut nunu nyemede a bi bat le hop wé u kee yak Nulipém, me kit le m’a ep nye nyoo. 26 Ndi me gwé bé ntiik jam i tilna Nwet wem inyu yé. Jon me nlona nye i bisu binan bébobasôna, ndi téntén i bisu gwoñ, a Kiñe Agripa, inyu boñ le i ngéda ni mal emble hop wé, me bana jam i tila. 27 Inyule hala a nene bé me loñge i ep mut i mok ibabé i toñol minsohi ba ñôm nye.”